၂၅. ၄. ၂၀၂၅
Translated by Thettant
ရုရှားနိုင်ငံ၊ မော်စကိုဒေသ၊ ဗလာရှီခါမြို့တွင် ကားဗုံးပေါက်ကွဲမှုတစ်ခု ယနေ့ သောကြာနေ့ နံနက်ပိုင်းက ဖြစ်ပွားခဲ့ပြီး အဆိုပါ ပေါက်ကွဲမှုအတွင်း ရုရှားတပ်မတော်မှ ထိပ်တန်းအရာရှိတစ်ဦး သေဆုံးခဲ့ကြောင်း ရုရှားအာဏာပိုင်များက အတည်ပြု ပြောကြားခဲ့သည်။
ရုရှားလက်နက်ကိုင်တပ်ဖွဲ့များ၏ စစ်ဦးစီးချုပ်ရုံး၊ စစ်ဆင်ရေးဌာန၏ ဒုတိယအကြီးအကဲဖြစ်သူ ဗိုလ်ချုပ် ယာရိုစလာ့ မော့စကာလစ်သည် Volkswagen Golf ကားတစ်စီး ပေါက်ကွဲမှုအတွင်း သေဆုံးခဲ့ကြောင်း ရုရှား စုံစမ်းရေးကော်မတီက ထုတ်ပြန်သော ကြေညာချက်တွင် ဖော်ပြခဲ့သည်။
ယင်းပေါက်ကွဲမှုသည် သံစများထည့်ထားသော လက်လုပ်ဗုံးတစ်လုံးကြောင့် ဖြစ်ပွားခဲ့ခြင်းဖြစ်ကြောင်း၊ ယင်းအမှုနှင့်ပတ်သက်၍ ရာဇဝတ်မှုဆိုင်ရာ စုံစမ်းစစ်ဆေးမှုတစ်ခု စတင်ခဲ့ကြောင်းလည်းစုံစမ်းရေးကော်မတီက ပြောကြားခဲ့သည်။
မှုခင်းဆေးပညာရှင်များနှင့် ဥပဒေစိုးမိုးရေးအရာရှိများအပါအဝင် စုံစမ်းစစ်ဆေးရေးအဖွဲ့သည် မော်စကိုမြို့၏ အရှေ့ဘက် မိုင် ၂၀ အောက်သာ ဝေးကွာသော ဗလာရှီခါမြို့ရှိ ဖြစ်စဉ်နေရာကို စစ်ဆေးမှုများ စတင်နေပြီဖြစ်ကြောင်းလည်း သိရသည်။
အဆိုပါဖြစ်စဥ်သည် ရုရှားနိုင်ငံတွင်းလုံခြုံရေးအပေါ် မေးခွန်းထုတ်မှုများစွာဖြစ်စေခဲ့သလို ယူကရိန်းစစ်ပွဲများနှင့် ဆက်စပ်နေနိုင်ကြောင်း သုံးသပ်မှုများရှိသော်လည်း ယူကရိန်းကမူ ယခုလက်ရှိအချိန်အထိ ဖြစ်စဥ်အတွက် မှတ်ချက်မပြုပေ။
Ref, RT, CNN & Kyiv Independent
