တရုတ်နိုင်ငံက မြန်မာနိုင်ငံသို့ လောင်စာဆီနှင့် အသင့်တပ်ဆင်ရန်အိမ် အပါအဝင် အရေးပေါ် လူသားချင်းစာနာမှု သဘာဝဘေးကယ်ဆယ်ရေး အကူအညီ အသစ်တစ်သုတ် ထပ်မံထောက်ပံ့မည်

MT News
၁၁. ၄. ၂၀၂၅

မြန်မာနိုင်ငံ ငလျင်ဒဏ် ကယ်ဆယ်ရေးအတွက် ကူညီပေးမှု သက်ဆိုင်ရာအခြေအနေများနှင့် နောက်တစ်ဆင့် စဉ်းစားထားမှုများအရ ချစ်ကြည်ရင်းနှီးသော အိမ်နီးချင်းနိုင်ငံနှင့် ဆွေမျိုးပေါက်ဖော် ညီအစ်ကိုအနေဖြင့် တရုတ်နိုင်ငံက မြန်မာနိုင်ငံသို့ လောင်စာဆီနှင့် အသင့်တပ်ဆင်ရန်အိမ် အပါအဝင် အရေးပေါ် လူသားချင်းစာနာမှု သဘာဝဘေးကယ်ဆယ်ရေး အကူအညီ အသစ်တစ်သုတ် ထပ်မံထောက်ပံ့မည်ဖြစ်ကြောင်း တရုတ်နိုင်ငံ နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ လျင်ကျန့်က ဧပြီ ၁၀ ရက် ပုံမှန်သတင်းစာရှင်းလင်းပွဲ၌ ပြောကြားခဲ့သည်။

မြန်မာနိုင်ငံ၏ မတ်လ ၂၈ ရက် ငလျင် (မန္တလေးငလျင်ကြီး) လှုပ်ခတ်ပြီးကတည်းက တရုတ်နိုင်ငံအနေဖြင့် မြန်မာနိုင်ငံ ကယ်ဆယ်ရေးလုပ်ငန်းများလုပ်ဆောင်ရန် အစွမ်းကုန် ကူညီလုပ်ဆောင်ပေးခဲ့ရာ မြန်မာပြည်သူများနှင့် နိုင်ငံတကာအသိုက်အဝန်း၏ ချီးကျူးခြင်းခံခဲ့ရကြောင်း၊ တရုတ်နိုင်ငံက မြန်မာနိုင်ငံ ငလျင်ဒဏ် ကယ်ဆယ်ရေးအတွက် ကူညီပေးမှု သက်ဆိုင်ရာအခြေအနေများနှင့် နောက်တစ်ဆင့် စဉ်းစားထားမှုများအကြောင်းကို ပြောရေးဆိုခွင့်ရှိသူမှ မိတ်ဆက်ပေးရန် သတင်းထောက်က သတင်းစာရှင်းလင်းပွဲတွင် မေးမြန်းခဲ့သည်။

ထို့အပေါ် မြန်မာနိုင်ငံတွင် ငလျင်လှုပ်ခတ်ပြီးနောက် တရုတ်ကယ်ဆယ်ရေးအင်အားများက အမြန်ဆုံးစုစည်းကာ အချိန်လု၍ အသက်ကယ်ဆယ်မှုများ လုပ်ဆောင်ခဲ့ကြောင်း လျင်ကျန့်က ပြောကြားခဲ့သည်။ တရုတ်နိုင်ငံသည် မြန်မာနိုင်ငံအပေါ် အရေးပေါ်ကူညီမှုများ ထောက်ပံ့ပေးမည်ဟု ပထမဆုံး ထုတ်ပြန်ကြေညာခဲ့ပြီး မြန်မာနိုင်ငံသို့ ကယ်ဆယ်ရေးအဖွဲ့ ပထမဆုံးစေလွှတ်ခဲ့ကာ မြန်မာနိုင်ငံတွင် ပိတ်မိနေပြီး အသက်ရှင်ကျန်ရစ်သူအား ပထမဆုံးကယ်ထုတ်နိုင်ခဲ့သည့်အပြင် ငလျင်သင့်ဒေသ၌ ပထမဆုံး ပြန်လည်နေရာချထားရေးစခန်း တည်ဆောက်ခဲ့ကြောင်း ၎င်းက ပြောကြားခဲ့သည်။

တရုတ်နိုင်ငံမှ ကယ်ဆယ်ရေးအဖွဲ့ ၃၀ ကျော်၊ ကယ်ဆယ်ရေးအဖွဲ့ဝင် ၆၀၀ ကျော် မြန်မာနိုင်ငံသို့သွားရောက်၍ ကယ်ဆယ်ရေးလုပ်ငန်းများ လုပ်ဆောင်ခဲ့ပြီး မြန်မာနိုင်ငံကို အရေးပေါ်ကယ်ဆယ်ရေး အကူအညီပစ္စည်းများ အသုတ်များစွာ ထောက်ပံ့ပေးခဲ့သဖြင့် တရုတ်နိုင်ငံ၏ အမြန်နှုန်း၊ တရုတ်နိုင်ငံ၏ အင်အား၊ တရုတ်နိုင်ငံ၏ နွေးထွေးမှုတို့ကို ဖော်ပြလိုက်ကာ မြန်မာပြည်သူများ၏ လှိုက်လှိုက်လှဲလှဲ ကြိုဆိုမှုနှင့် ကျေးဇူးတင်ရှိမှုများ ရရှိခဲ့ကြောင်း ၎င်းကဆိုသည်။

လက်ရှိ မြန်မာနိုင်ငံ၏ သဘာဝဘေးကယ်ဆယ်ရေးလုပ်ငန်းများသည် ကပ်ရောဂါ ကာကွယ်ထိန်းချုပ်ရေးနှင့် ပြန်လည်ထူထောင်ရေး လုပ်ငန်းများအဆင့်သို့ ပြောင်းလဲဝင်ရောက်သွားပြီဖြစ်ကြောင်း လျင်ကျန့်က ပြောကြားခဲ့သည်။

သို့သော် ချစ်ကြည်ရင်းနှီးသော အိမ်နီးချင်းနှင့် ဆွေမျိုးပေါက်ဖော် ညီအစ်ကိုအနေဖြင့် တရုတ်နိုင်ငံသည် မြန်မာနိုင်ငံသို့ အရေးပေါ် လူသားချင်းစာနာမှု သဘာဝဘေးကယ်ဆယ်ရေး အကူအညီ အသစ်တစ်သုတ် ထပ်မံထောက်ပံ့ပေးရန် ဆုံးဖြတ်ခဲ့ကြောင်း၊ အဆိုပါအကူအညီများတွင် လောင်စာဆီ၊ အသင့်တပ်ဆင်ရန်အိမ် (Prefabricated houses) ၊ ခွဲစိတ်ခန်း၊ ဆေးဝါး၊ ကာကွယ်ဆေး စသည့် အရေးပေါ်လိုအပ်သော ပစ္စည်းများ ပါဝင်ကြောင်း ၎င်းကဆိုသည်။

ထို့ပြင် ကုသကယ်ဆယ်ရေးနှင့် ပိုးသတ်ခြင်းများ လုပ်ဆောင်ရန်အတွက် ဆေးကုသရေးနှင့် ကပ်ရောဂါကာကွယ်ရေး ကျွမ်းကျင်ပညာရှင်အဖွဲ့များ စေလွှတ်သွားမည်ဖြစ်ကြောင်း၊ အဆောက်အအုံ ဘေးကင်းလုံခြုံမှုနှင့် ယဉ်ကျေးမှုပစ္စည်းများ ပျက်စီးမှု အခြေအနေအား စစ်ဆေးအကဲဖြတ်ရန်နှင့် ခိုင်ခံ့အောင် ပြုပြင်မွမ်းမံရန်အတွက်လည်း ပညာရှင်များ စေလွှတ်သွားမည်ဖြစ်ကြောင်း ၎င်းက ပြောကြားခဲ့သည်။

“သဘာဝဘေးအန္တရာယ်က မေတ္တာမရှိသော်လည်း လူ့လောကမှာ မေတ္တာတရားရှိပါတယ်” ဟု လျင်ကျန့်က ပြောကြားခဲ့သည်။

ထို့အ​ပြင် လျင်ကျန့်က” တရုတ်နိုင်ငံအနေဖြင့် တရုတ်-မြန်မာ ဆွေမျိုးပေါက်ဖော် ချစ်ကြည်ရေးသံယောဇဉ်ကို ပြန့်ပွားအောင်လုပ်ဆောင်ပြီး အခက်အခဲများကို အတူတကွကျော်ဖြတ်ကြသော တရုတ်-မြန်မာ အေးအတူပူအမျှအသိုက်အဝန်းစိတ်ဓာတ် အရင်းခံကာ မြန်မာပြည်သူများ အခက်အခဲကိုကျော်ဖြတ်၍ နေရပ်ဌာနေ ပြန်လည်တည်ဆောက်ရန် ကူညီပေးသွားမှာဖြစ်ပါတယ်” ဟုလည်း ဆိုခဲ့သည်။

တရုတ်နိုင်ငံသည် မြန်မာ့ငလျင်ဘေးအတွက် မူလက ယွမ်သန်း ၁၀၀ သာ ကူညီမည်ဟု ကြေညာခဲ့သော်လည်း ဧပြီ ၁၀ ရက်တွင်မူ ယွမ်တစ်ဘီလျံ ထပ်မံကူညီမည်ဟု ကြေညာခဲ့သည်။

Ref, Xinhua