၃.၄.၂၀၂၅
Written by KL
မန္တလေးရှိ ငလျင်ဘေးသင့်ရာသို့ သွားရောက်လှူဒါန်းမည့်သူများလိုက်ပါလာသော PAJERO မော်တော်ယာဥ်တစ်စီး အမြန်လမ်း မိုင်တိုင်အမှတ် ၁၈၀/၇ တွင် ဧပြီလ ၃ ရက် နံနက် ၇ နာရီ ၁၅ မိနစ်ခန့်က ဖြစ်ပွားခဲ့ရာ လိုက်ပါလာသူ ၅ ဦး ထိခိုက်ဒဏ်ရာ ရရှိခဲ့ကြောင်း အမြန်လမ်းမီးသတ်စခန်းထံမှ သိရသည်။
ရန်ကုန်-နေပြည်တော် လမ်းပိုင်းတွင် ယာဥ်မောင်းအမျိုးသားတစ်ဦး အမျိုးသမီး ၄ ဦးလိုက်ပါလာပြီး ရန်ကုန်မှ နေပြည်တော်ဘက်သို့ မောင်းနှင်လာသော MITSUBISHI PAJERO အမျိုးအစား(ပြာ/ခဲ)ရောင်ယာဉ်မှာ မောင်းနှင်လာစဥ် ကားရှေ့ဘယ်ဘက်ဘီးပေါက်ကာ အရှိန်မထိန်းနိုင်ဘဲ ပက်လက်လန် တိမ်းမှောက်ခဲ့ကြောင်း သိရသည်။
ယာဥ်တိမ်းမှောက်မှုကြောင့် အသက် ၅၂ နှစ်အရွယ် ယာဥ်မောင်းအမျိုးသားကြီးတွင် ဘယ်ဘက်လက်ပြင်နာကျင်၊ လည်ပင်းနာကျင်ဒဏ်ရာများရရှိပြီး အသက် ၂၀ အရွယ်မှ ၆၅ နှစ်အရွယ် အမျိုးသမီး ၄ ဦးတွင် ဖူးယောင် ပေါက်ပြဲဒဏ်ရာ၊ နာကျင်ဒဏ်ရာများ ရရှိခဲ့ပြီး ဆွာ လူမှုကူညီရေးအသင်းပိုင်ယာဥ်ဖြင့် နေပြည်တော် ကုတင် (၁၀၀၀) ဆေးရုံသို့ ပို့ဆောင်ပေးခဲ့ကြောင်း သိရသည်။
ယာဥ်ပေါ်လိုက်ပါလာသူများမှာ မန္တလေးရှိ ငလျင်ဘေးသင့်ရာ မစိုးရိမ်ကျောင်းတိုက်သို့ သွားရောက်လှူဒါန်းမည့်သူများဖြစ်ကြောင်း သိရသည်။
“ဒဏ်ရာရသူတွေက သထုံမြို့က လူတွေပါ။ ထိခိုက်ဒဏ်ရာတွေရပေမယ့် အသက်အန္တရာယ် စိုးရိမ်စရာ မရှိပါဘူး”ဟု အမြန်လမ်းမီးသတ်တပ်ဖွဲ့ဝင်တစ်ဦးက ပြောသည်။
ယာဥ်တိမ်းမှောက်မှုကြောင့် ရှေ့လေကာမှန်ကွဲ အမိုးပိန်ချိုင့်ကာ အနောက်လေကာမှန်များ ကွဲအက်ပျက်စီးခဲ့ကြောင်း သိရသည်။
