၃.၄.၂၀၂၅
Written By Thandar
အဆိုတော် ပိုးမီနဲ့အနုပညာရှင်တွေ၊ တက်တူးပညာရှင်တွေ စုပေါင်းပြီး ငလျင်ဘေးသင့်ပြည်သူများအတွက် အလှူငွေ ကောက်ခံတဲ့ အစီအစဉ်နဲ့ တက်တူးထိုးရင်းလှူအစီအစဉ်ကို ယနေ့ ဧပြီ ၃ ရက်က ရန်ကုန်မြို့၊ စမ်းချောင်းမြို့နယ် ၊ စမ်းချောင်းလမ်းရှိ Bliss Barရှေ့မှာ ကျင်းပခဲ့ပါတယ်။
“ဒီနေ့ Bliss Bar ရှေ့မှာ တိတ်ဆိတ်စွာ အလှူငွေကောက်ခံခဲ့တာ စုစုပေါင်း အလှူငွေ ၅၅ သိန်းကျော်ခန့်နဲ့ တက်တူးထိုးရင်းလှူ အစီအစဉ်က အလှူငွေ ၃၅ သိန်းကျော်ခန့် ကောက်ခံရှရိပါတယ်။ အလှူခံရက်ပြည့်ရင်ရရှိတဲ့ အလှူငွေကို အတိအကျကြေညာပေးသွားဦးပါမယ်နော်။ ဒီနေ့ လာကူပေးကြတဲ့ အနုပညာရှင် ညီအစ်ကိုမောင်နှမတွေနဲ့ Volunteer အားလုံးကို ကျေးဇူးအထူးတင်ပါတယ်”လို့ အဆိုတော် ပိုးမီက ပြောပါတယ်။
အဆိုပါ အစီအစဉ်ကို အဆိုတော် ပိုးမီနဲ့ အတူ အနုပညာရှင်တွေဖြစ်တဲ့ အောင်အေးချစ်၊ အေဏီဇော်၊ ငွေဇင်လှိုင်း၊ ထက်အဉ္ဇာလီစတဲ့သူတွေ၊ တက်တူးပညာရှင်တွေ၊ Gaming industry က Streamer တွေ ပါဝင် ခဲ့ကြပါတယ်။
“အခုလို အခြေနေမျိုးမှာ စိတ်အခြေအနေ ဘယ်လိုရှိလဲ မေးလာရင် ဖြေစရာက ဝမ်းနည်းယူကျူံးမရမှုတွေနဲ့ မြေပြင်ကို ဆင်းပြီး မကူနိုင်တဲ့ ကိုယ့်ကိုယ်ကိုယ် လည်း အားမလို အားမရ ဖြစ်ရပါတယ်။ သွားပြန်ရင်လည်း ကူညီရာ မရောက်ဘဲ အပိုဖြစ်နေမှာစိုးလို့ပါ။ အဲဒီတော့ ငါဘာလုပ်နိုင်မလဲ ဘယ်နေရာက ပါဝင်ပေးနိုင်မလဲ စဉ်းစားတယ်။ လမ်းပေါ်ထွက်ပြီး သီချင်းဆိုဖို့ ထွက်မှာ မဟုတ်ဘဲ အလှူခံဖို့ လမ်းပေါ်ထွက်မှာပါ။ ဒီအချိန်မှာ အနုပညာကိုလည်း ဘယ်သူမှ မခံစားနိုင်ပါဘူး။ ကိုယ်တိုင်လည်း သီချင်းဆိုဖို့ အားမရှိပါဘူး။ အဲဒါကြောင့် လမ်းပေါ်မှာ ဖလားကိုင်ပြီး မတ်တပ်ရပ်ပြီး အလှူခံပါတယ်။ လမ်းသွားလမ်းလာများ နည်းများမဆို ပါဝင် လှူဒါန်းပေးနိုင်ပါတယ်” လို့ သူမကဆက်ပြောပါတယ်။
ဒ့ါပြင် တက်တူးထိုးရင်း လှူ အစီအစဉ်အတွက် တက်တူးပညာရှင်များကလည်း လာရောက်လှူဒါန်းသူတွေ တက်တူးထိုးချင်သူတွေကို စောင့်ကြိုလျက်ရှိပြီး တက်တူးလာထိုးတဲ့ စေတနာရှင် အလှူရှင်တွေက လှူဒါန်းလာတဲ့ အလှူငွေတွေကို ငလျင်ဘေးသင့်ပြည်သူတွေအတွက် လှူဒါန်းပေးမှာဖြစ်ပါတယ်။
