၃.၄. ၂၀၂၅
Translated by Thettant
ပါကစ္စတန်နိုင်ငံမှ ပထမဆုံးအသုတ်ပေးပို့သည့် အရေးပေါ်ကူညီကယ်ဆယ်ရေး ပစ္စည်း (၃၅) တန်ကို မြန်မာအာဏာပိုင်များထံ လွှဲပြောင်းပေးအပ်ခဲ့ကြောင်း ပါကစ္စတန် အမျိုးသားသဘာဝဘေးအန္တရာယ်စီမံခန့်ခွဲမှုအေဂျင်စီ (NDMA) ထံက သိရသည်။
ပါကစ္စတန်ဝန်ကြီးချုပ်၏ ညွှန်ကြားချက်အရ NDMA သည် မကြာသေးမီက မြန်မာနိုင်ငံတွင် ဖြစ်ပွားခဲ့သော ပြင်းထန်သည့်ငလျင်ဒဏ်အား တုံ့ပြန်သည့်အနေဖြင့် အရေးပေါ်လူသားချင်းစာနာထောက်ထားမှုဆိုင်ရာပစ္စည်း တန် ၇၀ ကို ငှားရမ်းထားသော လေယာဉ်နှစ်စီးဖြင့် ပေးပို့ရန် စီစဉ်ညှိနှိုင်းခဲ့ရာ ပထမအဆင့်အနေဖြင့် အကူအညီပစ္စည်း ၃၅ တန်တင်ဆောင်လာသည့် ပထမလေယာဉ် (B-757) ကို အစ္စလာမာဘက်အပြည်ပြည်ဆိုင်ရာလေဆိပ်မှ မြန်မာနိုင်ငံ၊ ရန်ကုန်မြို့သို့ စတင်ပျံသန်းပေးပို့ခဲ့ခြင်း ဖြစ်သည်။
အဆိုပါအကူအညီပစ္စည်းများတွင် အဓိကလိုအပ်သည့် ပစ္စည်းများဖြစ်သော ရွက်ဖျင်တဲ (၅၆၅) လုံး၊ တာပေါ်လင် (၂၁၀) ချပ်၊ စောင် (၂၀၀၀)၊ အသင့်စားအစားအစာ (၁) တန်၊ ဆေးဝါး (၀.၅) တန်နှင့် ရေသန့်စင်စက် (၁၀) ခု ပါဝင်သည်။
အဆိုပါအကူအညီပစ္စည်းများ ပေးပို့သည့်အခမ်းအနားကို ယမန်နေ့ နေ့လယ်ပိုင်းက အစ္စလာမာဘက်အပြည်ပြည်ဆိုင်ရာလေဆိပ်တွင် ကျင်းပခဲ့ပြီး ပါကစ္စတန်ဝန်ကြီးချုပ်ကိုယ်စား ပါလီမန်ရေးရာဝန်ကြီးဌာန ပြည်ထောင်စုဝန်ကြီး ဒေါက်တာတာရခ် ဖိုင်ဇယ်ချောင်ဒရီ၊ NDMA၊ နိုင်ငံခြားရေးဝန်ကြီးဌာနမှ အရာရှိများနှင့် မြန်မာသံအမတ်ကြီးလည်း အခမ်းအနားသို့ တက်ရောက်ခဲ့ကာ မြန်မာသံအမတ်ကြီးက ပါကစ္စတန်အစိုးရနှင့် ပါကစ္စတန်ပြည်သူများအား မြန်မာ့ငလျင် အရေးအတွက် ရက်ရောစွာထောက်ပံ့ပေးသည့် လူသားချင်းစာနာထောက်ထားမှုအတွက် အထူးကျေးဇူးတင်ရှိကြောင်း ပြောကြားခဲ့သည်။
ထို့နောက် ယမန်နေ့ညပိုင်းတွင် ရန်ကုန်မြို့သို့ရောက်ရှိလာသော ပထမအသုတ် အကူအညီ ၃၅ တန်ကို ပါကစ္စတန်သံအမတ်ကြီး H.E. Imran Haider နှင့် သံရုံးဝန်ထမ်းများက ရန်ကုန်တိုင်းဒေသကြီးဝန်ကြီးချုပ်နှင့် နိုင်ငံခြားရေးဝန်ကြီးဌာန၊ ညွှန်ကြားရေးမှူးချုပ် (သင်တန်း) တို့ထံ တရားဝင်လွှဲပြောင်းပေးခဲ့သည်။
ပါကစ္စတန်အစိုးရနှင့် NDMA တို့သည် ငလျင်ဘေးသင့် မြန်မာနိုင်ငံသားများအား လူသားချင်းစာနာထောက်ထားမှုဆိုင်ရာ အကူအညီများ ဆက်လက်ထောက်ပံ့ပေးရန် ခိုင်မာစွာကတိပြုထားသလို ကျန်ရှိသည့် ကူညီထောက်ပံ့ရေးပစ္စည်း ၃၅ တန်ကိုလည်း ဆက်လက် ပေးပို့သွားမည်ဖြစ်ကြောင်း သိရသည်။
