ယနေ့ နံနက် ၈ နာရီအထိ စာရင်းအရ သေဆုံးသူ ၃,၀၈၅ ဦး၊ ဒဏ်ရာရရှိသူ ၄,၇၁၅ ဦးရှိလာ
၃. ၄. ၂၀၂၅
Written by Nyein Kyaw
ယနေ့ နံနက်ပိုင်းအထိ ငလျင်ဘေးဒဏ်အတွက် နိုင်ငံပေါင်း ၁၇ နိုင်ငံမှ စုစုပေါင်းလေယာဉ် ၅၉ စီးဖြင့် ကယ်ဆယ်ရေးဝန်ထမ်း ၁,၅၆၆ ဦး၊ ထောက်ပံ့ရေးပစ္စည်း ၄၁၈ တန်နှင့် ကယ်ဆယ်ရေးပစ္စည်း ၅၄၁ တန်ရောက်ရှိပြီးဖြစ်ကြောင်း SAC သတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းက ပြောကြားသည်။
“ကယ်ဆယ်ရေးဆောင်ရွက်မှုများအနေနဲ့ ရုရှား၊ တရုတ်၊ အိန္ဒိယ၊ ထိုင်း၊ စင်ကာပူ၊ မလေးရှား၊ ဘင်္ဂလားဒေ့ရှ်၊ ဗီယက်နမ်၊ ယူအေအီး၊ လာအို၊ ဘီလာရုစ်၊ အင်ဒိုနီးရှား၊ ဘူတန်၊ ဖိလစ်ပိုင်၊ ဂျပန်၊ နီပေါ၊ ပါကစ္စတန်၊ တရုတ်(ဟောင်ကောင်) နိုင်ငံပေါင်း ၁၇ နိုင်ငံက လေယာဉ်အစီးရေ စုစုပေါင်း ၅၉ နဲ့ ကူညီကယ်ဆယ်ရေးပစ္စည်းများ ရောက်ရှိခြင်း၊ ကယ်ဆယ်ရေးဝန်ထမ်းများ ရောက်ရှိခြင်းရှိပါတယ်။ ကယ်ဆယ်ရေးဝန်ထမ်း ၁,၅၆၆ ဦး ငလျင်ဒဏ်သင့်ဒေသတွေမှာ ဆက်လက်ဆောင်ရွက်လျက်ရှိပါတယ်။ ထောက်ပံ့ရေးပစ္စည်း ၄၁၈ တန်နဲ့ ကယ်ဆယ်ရေးပစ္စည်း ၅၄၁ တန်ရောက်ရှိပြီးဖြစ်ပါတယ်။ ဒါတွေကတော့ လေကြောင်းကနေ ရောက်ရှိတဲ့အကူအညီပဲဖြစ်ပါတယ်” ဟု ဗိုလ်ချုပ်ဇော်မင်းထွန်းက ပြောကြားသည်။
ကူညီကယ်ဆယ်ရေးနှင့် ထောက်ပံ့မှုများနှင့် ပတ်သက်ပြီး ယမန်နေ့က ထုတ်ပြန်ပြောကြားခဲ့သလို တရားဝင်သက်ဆိုင်ရာနိုင်ငံများမှ သံရုံး၊ စစ်သံရုံးများနှင့် ဆက်သွယ်ပြီးမှ မြန်မာနိုင်ငံရှိ နိုင်ငံခြားရေးဝန်ကြီးဌာန၊ သဘာဝဘေးအန္တရာယ် ကူညီကယ်ဆယ်ရေးအတွက် ဖွဲ့စည်းထားသည့် သဘာဝဘေးအန္တရာယ် စီမံခန့်ခွဲမှုအဖွဲ့ထံသို့ တရားဝင်ဆက်သွယ်ပြီး ဆောင်ရွက်ပေးကြရန် ဗိုလ်ချုပ်ဇော်မင်းထွန်းက မေတ္တာရပ်ခံထားသည်။
ဧပြီလ ၃ ရက် (ယနေ့) နံနက် ၈ နာရီ အချိန်အထိ ကောက်ယူရရှိသော စာရင်းများအရ တစ်နိုင်ငံလုံးအတိုင်းအတာဖြင့် ငလျင်ဒဏ်သင့်ခဲ့ရသည့် ဒေသများအားလုံး၌ ငလျင်ဘေးဒဏ်ကြောင့် သေဆုံးခဲ့ရသူ ၃,၀၈၅ ဦး၊ ဒဏ်ရာရရှိသူ ၄,၇၁၅ ဦး၊ ပျောက်ဆုံးနေသူ ၃၄၁ ဦးရှိကြောင်း ဗိုလ်ချုပ်ဇော်ထွန်းက ပြောကြားသည်။
ကူညီကယ်ဆယ်ရေး ဆောင်ရွက်လိုသည့် မည်သည့်အဖွဲအစည်းမဆို လုပ်ထုံးလုပ်နည်းနှင့်အညီ အကြောင်းကြား သတင်းပို့လာပါက ကြိုဆိုလက်ခံသွားမည်ဖြစ်ကြောင်းနှင့် ယခုအချိန်တွင် ကူညီကယ်ဆယ်ရေးကို အင်တိုက်အားတိုက် ဆောင်ရွက်နေရသည့်အပြင် လက်နက်ကိုင်သောင်းကျန်းသူများ၏ အန္တရာယ်နှင့် နိုင်ငံရေးအမြတ်ထုတ်လိုမှုများရှိသောကြောင့် အကောင်းဆုံး ချိန်ဆဆောင်ရွက်နေရကြောင်း ယမန်နေ့တွင် SAC က အသိပေးထုတ်ပြန်ထားသည်။
