ကူညီကယ်ဆယ်‌ရေးလုပ်ငန်းများကို အာရုံစိုက်အောင်မြင်အောင် လုပ်သွားမည်ဖြစ်၍ ငြိမ်းချမ်းရေးနှင့် အပစ်အခတ် ယာယီရပ်စဲမှုများအပေါ် မဟုတ်မမှန် ဝါဒဖြန့်နေမှုများကို သတိထားစေလိုကြောင်း ဗိုလ်ချုပ်ဇော်မင်းထွန်း ပြောကြား

ဝါဒဖြန့်မီဒီယာများက နိုင်ငံမတည်ငြိမ်မှုကိုသာလိုလားပြီး ထိခိုက်ပျက်စီးနေချိန် လက်တွေ့ကူညီရန်နေနေသာသာ အလကားရသည့် လေနှင့်တောင် မကူညီခဲ့ဟုပါ ပြော

၂. ၄. ၂၀၂၅
Written by Nyein Kyaw

နိုင်ငံတော်အနေဖြင့် ကူညီကယ်ဆယ်‌ရေးလုပ်ငန်းများကို အာရုံစိုက်အောင်မြင်အောင် လုပ်ဆောင်သွားမည်ဖြစ်၍ ငြိမ်းချမ်းရေးနှင့် အပစ်အခတ် ယာယီရပ်စဲမှုများအပေါ် ပြည်ပရောက် Exile မီဒီယာများ၏ မဟုတ်မမှန် ဝါဒဖြန့်နေမှုများကို သတိထားစေလိုကြောင်း SAC သတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းက ယနေ့တွင် ပြောကြားသည်။

“အခု ကျွန်တော်တို့ ကူညီရေးနဲ့ ကယ်ဆယ်ရေးလုပ်ငန်းတွေကို အာရုံစိုက်ပြီး လုပ်နေပါတယ်။ အောင်မြင်အောင် လုပ်ဆောင်သွားပါမယ်။ အားလုံးလက်တွဲပူးပေါင်းပြီး ဆောင်ရွက်သွားရမှာဖြစ်ပါတယ်။ ဘေးက ဒီလို မလိုလားအပ်တဲ့အသံတွေ၊ မလိုလားအပ်တဲ့ သွေးထိုးလှုံ့ဆော်မှုတွေကို သတိရှိကြဖို့လိုကြောင်း ပြောကြားလိုပါတယ်” ဟု ဗိုလ်ချုပ်ဇော်မင်းထွန်းက ပြောကြားသည်။

ငလျင်ဘေးကြောင့် လက်နက်ကိုင်အဖွဲ့အချို့၏ နှစ်ပတ် အပစ်အခတ်ရပ်စဲကြောင်း ထုတ်ပြန်ထားမှုများနှင့် ပတ်သက်ပြီး တပ်မတော်ဘက်မှ မည့်သည့်တိုင်းရင်းသား လက်နက်ကိုင်အဖွဲ့များကိုမှ ဦးစွာတိုက်ခိုက်ခြင်းမပြုလုပ်ခဲ့သော်လည်း ငလျင်ဒဏ်ကြောင့် ပြန်လည်ထူထောင်ရေး လုပ်ကိုင်နေချိန် အကြမ်းဖက်များက လျှပ်စစ်ဓာတ်အား ပြတ်တောက်ရေးအပြင် အခြားအဖျက်အမှောင့်လုပ်ငန်းများကို လုပ်ဆောင်နေကြောင်း နိုင်ငံတော်စီမံအုပ်ချုပ်ရေးကောင်စီ ဥက္ကဋ္ဌက ဧပြီ ၁ ရက် (ယမန်နေ့)တွင် ငလျင်ဘေးအတွက် အလှူငွေလက်ခံသည့် အခမ်းအနားတွင် ပြောကြားထားပြီးဖြစ်သည်။

ထို့ပြင် ငလျင်ဘေးအတွက် ကူညီကယ်ဆယ်ရေးနှင့် ပြန်လည်ထူထောင်ရေး လုပ်ငန်းများကို နိုင်ငံတော်က အင်တိုက်အားတိုက် လုပ်ဆောင်နေချိန် ရက် ၂၀ ယာယီပစ်ခတ်တိုက်ခိုက်မှု ရပ်စဲပေးမည်နှင့် ယာယီပစ်ခတ်တိုက်ခိုက်မှု ထုတ်ပြန် ကြေညာထားသည့်ကာလအတွင်း ငြိမ်းချမ်းရေးကို ထိခိုက်ပျက်စီးစေမည့် လုပ်ရပ်များလုပ်ဆောင်ပါက ပြည်သူလူထုကို ကာကွယ်ရန် တုံပြန်မည်ဟု ထုတ်ပြန်မှုများအပေါ်တွင်လည်း ပြည်ပရောက် Exile မီဒီယာများက လိုရာဆွဲရေးသား ဖော်ပြနေကြောင်း သိရသည်။

“ဒီအသိပေးပြောကြားချက်နဲ့ ပတ်သက်ပြီး ပြည်ဖျက်မီဒီယာများကတော့ ခေါင်းစဉ်အမျိုးမျိုးတပ်ပြီး တပ်မတော်အနေနဲ့ ငြိမ်းချမ်းရေးကို လက်မခံဘူးတို့၊ တပ်မတော်အနေနဲ့ ငြိမ်းချမ်းရေးကို ချိုးဖောက်တယ်ဆိုပြီး သူတို့ရဲ့ ထုံးစံအတိုင်းပါပဲ။ ရေးသားဖော်ပြနေတာရှိပါတယ်” ဟု ဗိုလ်ချုပ်ဇော်မင်းထွန်းက ပြောကြားသည်။

နိုင်ငံတော်အစိုးရနှင့် တပ်မတော်တို့မှ ငြိမ်းချမ်းရေးအတွက် လိုလားနေသော်လည်း မဖြစ်စေချင်သော အဖွဲ့အစည်းများရှိနေပြီး ယခုလက်တွေ့ ငလျင်ဘေးဒုက္ခခံစားနေရချိန်မှာပ် သွေးခွဲ၊ သပ်လျှိုချင်သော ပြည်ပရောက် Exile မီဒီယာများ၏ ရေးသားမှုများကို တွေ့ရှိရကြောင်း ဗိုလ်ချုပ်ဇော်မင်းထွန်းက ပြောကြားသည်။

“ကျွန်တော်တို့ ပြည်သူလူထုအနေနဲ့ သုံးသပ်ကြည့်ပါ ဒီမီယာတွေက ကျွန်တော်တို့ ခင်ဗျားတို့၊ ကျွန်တော်တို့ ပြည်သူလူထု အခုလိုထိခိုက်ခံစားနေရချိန်မှာ ဘာတွေများ ထောက်ပံ့ခဲ့လဲ၊ ဘာတွေများ ကူညီခဲ့လဲ၊ လက်တွေ့ကူညီဖို့နေနေသာသာ အလကားရတဲ့ လေနဲ့တောင် ကူညီတာမရှိဘူး။ ဒီနိုင်ငံမတည်ငြိမ်ဖို့ ဒီနိုင်ငံထဲမှာနေတဲ့ တစ်နိုင်ငံတည်းသားတွေ အချင်းချင်းရန်သူဖြစ်ဖို့ အိမ်ကြက်ချင်း အိုးမဲသုတ်ပြီး တိုက်ဖို့ နေ့စဉ်လုပ်နေ၊ သွေးခွဲနေတာဖြစ်ပါတယ်။ ဒါတွေကို သတိရှိကြဖို့လိုတယ်လို့ ပြည်သူလူထုကို အသိ၊ သတိ ပေးလိုပါတယ်” ဟု ဗိုလ်ချုပ်ဇော်မင်းထွန်းက ပြောကြားသည်။