ဒီတစ်နေ့တာအတွင်း ငလျင်ကြောင့် ပြိုကျအပျက်အစီးပုံအောက် နာရီ ၁၀၀ ကျော်ကြာ ပိတ်မိခဲ့သူ ကျောင်းအုပ်ဆရာတစ်ဦးအပါအဝင် အမျိုးသားလေးဦးကို အသက်ရှင်လျက် ကယ်တင်နိုင်ခဲ့
MT News
၂.၄. ၂၀၂၅
မန္တလေးမြို့က Golden Country Hotel ပြိုကျမှုမှာ ၁၂၅ နာရီကြာ ပိတ်မိနေသူ Huawei ဝန်ထမ်းကို အသက်ရှင်လျက် ကယ်တင်နိုင်ခဲ့ပြီး ဒီတစ်နေ့တာအတွင်း ငလျင်ကြောင့် ပြိုကျအပျက်အစီးပုံအောက် နာရီ ၁၀၀ ကျော်ကြာ ပိတ်မိခဲ့သူ ကျောင်းအုပ်ဆရာတစ်ဦးအပါအဝင် အမျိုးသားလေးဦးကို အသက်ရှင်လျက် ကယ်တင်နိုင်ခဲ့တယ်လို့ သိရပါတယ်။
မတ်လ ၂၈ ရက် နေ့လယ် ၁၂ နာရီ ၅၁ မိနစ် ၂ စက္ကန့်အချိန်က ပြင်းအား ရစ်ချ်တာစကေး ၇ ဒသမ ၇ ရှိ အင်အားအလွန်ပြင်းထန်သည့် ငလျင် လှုပ်ခတ်မှုကြောင့် မန္တလေးမြို့ Golden Country Hotel အဆောက်အအုံအောက် ပိတ်မိနေသူတွေထဲ အသက်ရှင်ကျန်ရှိနေကြောင်း သတင်းရရှိလို့ မြန်မာနိုင်ငံမီးသတ်တပ်ဖွဲ့ဝင်တွေ တရုတ်နိုင်ငံက Blue Sky ၊ SRVA ပါဝင်တဲ့ ရှာဖွေကယ်ဆယ်ရေးတပ်ဖွဲ့ဝင်တွေက ဒီနေ့လယ် ၃ နာရီက စတင်လို့ ရှာဖွေကယ်ဆယ်ရေးလုပ်ငန်းတွေ ဆောင်ရွက်ခဲ့ရာမှာ ပြိုကျသွားတဲ့ဟိုတယ်အဆောက်အအုံအောက် နာရီပေါင်း ၁၂၅ နာရီခန့်ကြာပိတ်မိနေတဲ့ ဦးဆန်းလွင်(ဘ)ဦးနီ အသက် (၅၃)နှစ်အလုပ်အကိုင် Huawei Co.,Ltd.ယာဉ်မောင်းကို ဒီညနေ ၅ နာရီ ၄၆ မိနစ်အချိန်မှာ အသက်ရှင်လျက် ကယ်ဆယ်ထုတ်ယူနိုင်ခဲ့တာပါ။
ဒီနေ့လယ်ကလည်း စစ်ကိုင်းဒေသကြီး၊ စစ်ကိုင်းမြို့၊ အိုးတန်းရပ်၊ စွယ်တော်နန်း တည်းခိုခန်းမှာ အဆောက်အဦပြိုကျပြီး (၆)ရက်မြောက်၊ (၁၂၃)နာရီခန့်ကြာ ပိတ်မိနေသူ အသက် ၄၇ နှစ်အရွယ် မူလတန်းကျောင်းအုပ် ဆရာကြီး ဦးတင်မောင်ထွေးကိုကို ဒီနေ့လယ် ၃ နာရီခန့်မှာ နာရေးကူညီမှုအသင်း (ရန်ကုန်) ရဲ့ သီးသန့်မီးသတ်တပ်ဖွဲ့၀င်တွေနဲ့ မြန်မာနိုင်ငံ မီးသတ်တပ်ဖွဲ့၀င်တွေ၊ ပရဟိတအဖွဲ့အစည်းတွေ၊ မလေးရှားနိုင်ငံက ရှာဖွေကယ်ဆယ်ရေး တပ်ဖွဲ့၀င်တွေနဲ့ ခက်ခက်ခဲခဲ အသက်ရှင်လျက် ကယ်ဆယ်နိုင်ခဲ့ပြီး စစ်ကိုင်းဆေးရုံဆီ ပို့ဆောင်ပေးခဲ့တာပါ။
ဒီနေ့မနက်ကလည်း နေပြည်တော်က ပြိုကျသွားတဲ့ ဟိုတယ်အေးချမ်းသာက အသက် ၂၆ နှစ်အရွယ်သာ ရှိသေးတဲ့ ပြင်/ထိန်းဝန်ထမ်း ကိုနိုင်လင်းထွန်းကို သန်းခေါင်ကျော်ပြီးစ ဧပြီ ၂ ရက်နေ့အကူး ည ၁၂ နာရီခွဲမှာ အသက်ရှင်လျက် ကယ်ထုတ်နိုင်ခဲ့သလို မွန်းလွဲ ၁ နာရီ ၅၅ မိနစ်မှာလည်း ၁၂၁ နာရီကျော်ကြာ ပိတ်မိနေသူ ကိုထက်မောင်မောင်ကို အသက်ရှင်လျက် ထပ်မံကယ်ထုတ်နိုင်ခဲ့လို့ ဒီတစ်နေ့တာအတွင်း အမျိုးသားလေးဦးကို အသက်ရှင်လျက် ကယ်ထုတ်နိုင်ခဲ့တာပါ။
