တရုတ်နိုင်ငံကြက်ခြေနီအသင်းမှ မြန်မာနိုင်ငံသို့ ပံ့ပိုးပေးခဲ့သော သဘာဝဘေးကယ်ဆယ်ရေးပစ္စည်းများ မြန်မာနိုင်ငံသို့ ရောက်ရှိပြီးဖြစ်သလို ကယ်ဆယ်ရေးဝန်ထမ်းများနှင့် ပစ္စည်းများအားလုံး ဘေးကင်းလုံခြုံစွာရှိကြောင်း တရုတ်အစိုးရတာဝန်ရှိသူ ပြော

တရုတ်နိုင်ငံ၏ ကယ်ဆယ်ရေးအဖွဲ့ဝင်များနှင့် ထောက်ပံ့ရေးပစ္စည်းများ၏ လုံခြုံရေးနှင့် ကယ်ဆယ်ရေးပစ္စည်းများ၏ ပို့ဆောင်ရေးလမ်းကြောင်း အဆင်ပြေချောမွေ့မှုအတွက် ခိုင်မာသောအာမခံမှုရှိစေရန် မြန်မာနိုင်ငံမှ ဘက်အသီးသီးအား တရုတ်က အလေးအနက် တိုက်တွန်း

၂. ၄. ၂၀၂၅
Written by Tha Doe

တရုတ်နိုင်ငံကြက်ခြေနီအသင်းမှ မြန်မာနိုင်ငံသို့ ပံ့ပိုးပေးခဲ့သော သဘာဝဘေးကယ်ဆယ်ရေးပစ္စည်းများ မြန်မာနိုင်ငံသို့ ရောက်ရှိပြီးဖြစ်သလို ကယ်ဆယ်ရေးဝန်ထမ်းများနှင့် ပစ္စည်းများအားလုံး ဘေးကင်းလုံခြုံစွာရှိကြောင်း တရုတ်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ Mr. Guo Jiakun က ယနေ့ပြုလုပ်သော သတင်းစာရှင်းလင်းပွဲတွင် Bloomberg သတင်းဌာန၏ မေးမြန်းမှုအပေါ် ဖြေဆိုစဥ် ထည့်သွင်းပြောခဲ့သည်။

တရုတ်နိုင်ငံကြက်ခြေနီအသင်းမှ မြန်မာနိုင်ငံ ငလျင်ဘေးသင့်ပြည်သူများအတွက် ပေးပို့သည့် ထောက်ပံ့ရေးပစ္စည်းများ တင်ဆောင်လာသော မြန်မာနံပါတ်တပ် ကုန်ကား ၉ စီးပါ ယာဉ်တန်းကို တပ်မတော်က TNLA နှင့် တိုက်ပွဲဖြစ်ပွားနေသည့် နောင်ချိုမြိုနယ် အုမ္မတီးကျေးရွာအနီးတွင် ဧပြီလ ၁ ရက်နေ့ ည ၉ နာရီ ၂၁ မိနစ်ခန့်က စစ်ဆေးရန် တားဆီးချိန် ကားမရပ်သဖြင့် မိုးပေါ်ထောင်၍ သုံးချက်ပစ်ဖောက်သည်ကို TNLA က တပ်မတော်ဘက်က တရုတ်ကြက်ခြေနီအဖွဲ့ကို ပစ်သည်ဟု အပြစ်ပုံချကာ နိုင်ငံရေးအမြတ်ထုတ်ခဲ့သည်။ အဆိုပါ ​တရုတ်ကြက်ခြေနီအဖွဲ့သည် မြန်မာအစိုးရထံ တရားဝင်အကြောင်းမကြားခဲ့သလို အကြမ်းဖက်လက်နက်ကိုင်အဖြစ် ထုတ်ပြန်ထားသည့် TNLA ၏ နယ်မြေမှ ဖြတ်သန်းလာကာ TNLA ၏ စောင့်ရှောက်မှုကိုလည်း ရယူခဲ့သည်ဟု TNLA က ဖော်ပြခဲ့သည်။

ထိုဖြစ်စဥ်အပေါ် တရုတ်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ Mr. Guo Jiakun မှ ဖြေဆိုရာတွင် တရုတ်-မြန်မာ နှစ်နိုင်ငံသည် ချစ်ခင်ရင်းနှီးသော ဆွေမျိုးပေါက်ဖော် အိမ်နှီးချင်းနိုင်ငံဖြစ်ကြောင်း၊ မြန်မာနိုင်ငံတွင် ငလျင်ဖြစ်ပွားပြီးနောက် တရုတ်နိုင်ငံမှ အရေးပေါ်တုံ့ပြန်မှုယန္တရားကို စတင်ခဲ့ပြီး ကယ်ဆယ်ရေးလုပ်ငန်းများကို အင်တိုက်အားတိုက် ဆောင်ရွက်ခဲ့ကြောင်း၊ တရုတ်နိုင်ငံကြက်ခြေနီအသင်းမှ မြန်မာနိုင်ငံသို့ ပံ့ပိုးပေးခဲ့သော သဘာဝဘေးကယ်ဆယ်ရေးပစ္စည်းများသည် မြန်မာနိုင်ငံသို့ ရောက်ရှိပြီးဖြစ်ကာ မန္တလေးဘေးဒဏ်သင့်ဒေသသို့ ပို့ဆောင်ပေးနေပြီဖြစ်ကြောင်း၊ လက်ရှိအခြေအနေတွင် ကယ်ဆယ်ရေး ဝန်ထမ်းများနှင့် ပစ္စည်းများအားလုံး ဘေးကင်းလုံခြုံစွာရှိပါကြောင်း၊ ကြီးမားသောကပ်ဘေးကြီး ရင်ဆိုင်ရသောအခါတွင် လူသားတို့၏အသက်သည် အရေးကြီးဆုံးပင်ဖြစ်သည့်အတွက် လက်ရှိဦးစားပေးရမည်မှာ ငလျင်ဘေးအန္တရာယ် ကယ်ဆယ်ရေးကို အစွမ်းကုန်ကြိုးစားကြရမည် ဖြစ်ကြောင်း၊ တရုတ်နိုင်ငံသည် မြန်မာနိုင်ငံရှိ တိုင်းရင်းသားလူမျိုးနှင့် အဖွဲ့အစည်းများအားလုံး တစ်စိတ်တစ်ဝမ်းတည်း အခက်အခဲများကို အတူကျော်လွှားနိုင်ရန် မျှော်လင့်ပါကြောင်း၊ တရုတ်နိုင်ငံ၏ ကယ်ဆယ်ရေးအဖွဲ့ဝင်များနှင့် ထောက်ပံ့ရေးပစ္စည်းများ၏ လုံခြုံရေးနှင့် ကယ်ဆယ်ရေးပစ္စည်းများ၏ ပို့ဆောင်ရေးလမ်းကြောင်း အဆင်ပြေချောမွေ့မှုအတွက် ခိုင်မာသောအာမခံမှုရှိစေရန် မြန်မာနိုင်ငံဘက်အသီးသီးအား အလေးအနက် တိုက်တွန်းအပ်ပါကြောင်း၊ တရုတ်နိုင်ငံသည် မြန်မာနိုင်ငံရှိ ဘေးဒဏ်သင့်ဒေသများကို မြန်မာနိုင်ငံ၏လိုအပ်ချက်အရ တတ်စွမ်းသမျှ ပံ့ပိုးကူညီပေးသွားရန် ဆန္ဒရှိပါကြောင်း ပြောကြားခဲ့သည်။

အဆိုပါဖြစ်ရပ်နှင့်ပတ်သက်၍ TNLA ထုတ်ပြန်ထားသလို တရုတ်နိုင်ငံကြက်ခြေနီအသင်းအား တပ်မတော်က ပစ်ခတ်မှုမရှိခဲ့ကြောင်း၊ တရုတ်ကြက်ခြေနီအသင်းဆိုသည်မှာလည်း မြန်မာနံပါတ်ပါ ကုန်ကား ၉ စင်းခန့် လာသည့်ယာဉ်တန်းကိုသာ ရန်တန့်ရန် မီးပြအချက်ပေးသော်လည်း မရ၍ သေနတ် မိုးပေါ်ထောင် သုံးချက်ပစ်ကာ တားဆီးခဲ့ခြင်းသာဖြစ်ပြီး လူသေဆုံးမှုနှင့် ပစ္စည်းဆုံးရှုံးမှု လုံးဝမရှိခဲ့ကြောင်း SAC သတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်‌ဇော်မင်းထွန်းက ယနေ့တွင် ဖြေကြားသည်။

ထို့အပြင် လက်ရှိ မြေငလျင်နှင့် ပတ်သတ်၍ နိုင်ငံတကာမှ ကူညီကယ်ဆယ်ရေးလုပ်ငန်း၊ ထောက်ပံ့ရေးပစ္စည်းများ လက်ခံခဲ့ရာတွင် သက်ဆိုင်ရာသံရုံးနှင့် စစ်သံရုံးများမှတစ်ဆင့် ဆက်သွယ်ဆောင်ရွက်နေခြင်းဖြစ်ကြောင်း၊ တရုတ်ကြက်ခြေနီအဖွဲ့က ကြိုတင်အကြောင်းမကြားခဲ့ကြောင်းကိုလည်း “အခုဖြစ်ခဲ့တဲ့အဖွဲ့အနေနဲ့ မြန်မာနိုင်ငံကိုရော၊ သက်ဆိုင်ရာသံရုံး၊ စစ်သံရုံးကိုရော အကြောင်းကြားထားခြင်း မရှိဘူးဆိုတာတော့ ပထမဦးစွာ ကျွန်တော်တို့ သိရပါတယ်” ဟု ဗိုလ်ချုပ်ဇော်မင်းထွန်းက ပြောကြားသည်။