သာသနာ့နယ်မြေဖြစ်တဲ့ စစ်ကိုင်းမြို့နယ်ရှိ ဘုန်းကြီးကျောင်းတွေနဲ့ သီလရှင်ကျောင်းတွေကို ကျပ်သိန်း ၈၀၀၀၊ ဆေးကုသမှုခံနေတဲ့လူနာအယောက် ၁၀၀ ကို ကျပ်သိန်း ၂၀၀၀ လှူဒါန်းခဲ့တဲ့ ခိုင်နှင်းဝေ

၂.၄.၂၀၂၅
Written By Thandar

ပရဟိတကို စွမ်းစွမ်းတမံလုပ်ဆောင်နေလျက်ရှိတဲ့ မင်းသမီး ခိုင်နှင်းဝေကတော့ သာသနာ့နယ်မြေဖြစ်တဲ့ စစ်ကိုင်းမြို့နယ်ရှိ ဘုန်းကြီးကျောင်းတွေနဲ့ သီလရှင်ကျောင်းတွေကို ကျပ်သိန်း ၈၀၀၀ နဲ့ စစ်ကိုင်းဆေးရုံကြီးမှာ ဆေးကုသမှုခံယူနေတဲ့လူနာအယောက် ၁၀၀ ကို ကျပ်သိန်း ၂၀၀၀ တို့ကို လှူဒါန်းခဲ့ပါတယ်။

“အမ အလှူငွေသိန်း ၂ သောင်းရထားတယ်။ အမအနေနဲ့ စစ်ကိုင်းဘက်မှာ ပိုပြီး ထိခိုက် အပျက်အစီး များတာမို့ အမကိုယ်တိုင် ထိထိရောက်ရောက် သိန်း ၁ သောင်းကို လှူခဲ့တာပါ။ ပထမဦးဆုံး အမ စစ်ကိုင်းကို ရောက်ရောက်ချင်းမှာ စစ်ကိုင်းဆေးရုံမှာ ရှိနေတဲ့ လူနာတွေကို ငလျင်ကြောင့် ပိသွားတဲ့လူနာတွေကို လူနာအယောက် ၁၀၀ ရှိတာကို တစ်ဦးကို သိန်း ၂၀ နှုန်းနဲ့လှူခဲ့ပါတယ်။ ထိထိမိမိဖြစ်အောင် အရင်လှူဖြစ်တာပါ။ သူတို့ရှေ့မှာ အမကိုယ်တိုင်မြင်တွေ့ရတာ ဝမ်းနည်းရပေမယ့် မျက်ရည်မကျမိအောင် စိတ်ကိုထိန်းရတယ်။ ငယ်ငယ် ရွယ်ရွယ်နဲ့ ခြေဖြတ်လိုက်ရတာတွေလည်းရှိတယ်လေ။ အားမငယ်အောင် စကားလုံးရှာပြောရပေမယ့် စိတ်တော်တော်မကောင်းဖြစ်ရပါတယ်။ ရေဘေးကြောင့်တုန်းကလည်း ဝမ်းနည်းရသလို ငလျင်ကြောင့်လည်း ဝမ်းနည်းရတယ်။ လူတိုင်းမှာ လိုနေတာငွေဆိုပေမယ့် လိုနေတာက လူတိုင်းမှာက မေတ္တာပါ။ ဒီလိုဆုံတွေ့ခြင်းမျိုးနဲ့ မတွေ့ ချင်ပါဘူး”လို့ သရုပ်ဆောင် ခိုင်နှင်းဝေက ပြောပါတယ်။

သူမကတော့ စစ်ကိုင်းမြို့နယ်ရှိ မြေငလျင်ဒဏ်ကြောင့် ပျက်စီးဆုံးရှုံးခဲ့ကြတဲ့ ဘုန်းကြီးကျောင်းနဲ့ သီလရှင်တို့ ကျောင်းပေါင်း ၅၀ အတွက် သွပ်ချပ်ပေါင်း ၁၀၀၀၀ ရဲ့ တန်ဖိုးငွေ ကျပ် သိန်း ၃၀၀၀ နဲ့ ငွေသားကျပ်သိန်း ကျပ် ၅၀၀၀ စုစုပေါင်း ကျပ်သိန်း ၈၀၀၀ ကို ဧပြီလ ၁ရက်နေ့ ညနေပိုင်းက ရေစက်သွန်းချပြီး လှူဒါန်းခဲ့ပါတယ်။

စစ်ကိုင်းဆေးရုံကြီးမှာ ဆေးကုသခံယူနေသူတွေ လူနာ အယောက် ၁၀၀ ကို ကျပ်သိန်း ၂၀ နှုန်းနဲ့ စုစုပေါင်းသိန်း ၂၀၀၀ လှူဒါန်းခဲ့ပြီးတော့ နေ့လည်စာထမင်းဘူး ၅၀၀၀ ကျော်စာတို့ကိုလည်း လှူဒါန်းခဲ့ပါတယ်။

သရုပ်ဆောင် ခိုင်နှင်းဝေကကတော့ ယနေ့ ဧပြီ ၂ရက်မှာ မန္တလေးဘက်မှာ သွားရောက်လှူဒါန်းမှုတွေကို ဆက်လက်လုပ်ဆောင်နေတယ်လို့ သိရပါတယ်။