ပုံစာ။ TNLA ထုတ်ပြန်သည့် တရုတ်ရုပ်မပေါက်သူများပါဝင်သည်ဆိုသော ယာဥ်တန်း။
လက်ရှိတွင် နိုင်ငံတကာမှ ကူညီကယ်ဆယ်ရေးလုပ်ငန်း၊ ထောက်ပံ့ရေးပစ္စည်းများ လက်ခံခဲ့ရာတွင် သက်ဆိုင်ရာသံရုံးနှင့် စစ်သံရုံးများမှတစ်ဆင့် ဆက်သွယ်ဆောင်ရွက်နေခြင်းဖြစ်ဟု ဆို
၂. ၄. ၂၀၂၅
Written by Nyein Kyaw
TNLA ထုတ်ပြန်ထားသလို တရုတ်နိုင်ငံကြက်ခြေနီအသင်းအား တပ်မတော်က ပစ်ခတ်ခဲ့မှုမရှိခဲ့ကြောင်း၊ တရုတ်ကြက်ခြေနီအသင်းဆိုသည်မှာလည်း မြန်မာနံပါတ်ပါ ကုန်ကား ၉ စင်းခန့် လာသည့်ယာဉ်တန်းကိုသာ ရန်တန့်ရန် မီးပြအချက်ပေးသော်လည်း မရ၍ သေနတ် မိုးပေါ်ထောင် သုံးချက်ပစ်ကာ တားဆီးခဲ့ခြင်းသာဖြစ်ပြီး လူသေဆုံးမှုနှင့် ပစ္စည်းဆုံးရှုံးမှု လုံးဝမရှိခဲ့ကြောင်း SAC သတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းက ယနေ့တွင် ဖြေကြားသည်။
TNLA အဖွဲ့က ဖော်ပြထားသည့် တရုတ်ရုပ်မပေါက်သော လူများလိုက်ပါလာသည့် တရုတ်ကြက်ခြေနီယာဉ််တန်း ပစ်ခတ်ခံရမှုနှင့် ပတ်သက်ပြီး ပြန်လည်ဖြေရှင်းရာတွင် ဗိုလ်ချုပ်ဇော်မင်းထွန်းက အထက်ပါအတိုင်း ပြောကြားခဲ့ပြီး လက်ရှိတွင် မြေငလျင်နှင့် ပတ်သတ်၍ နိုင်ငံတကာမှ ကူညီကယ်ဆယ်ရေးလုပ်ငန်း၊ ထောက်ပံ့ရေးပစ္စည်းများ လက်ခံခဲ့ရာတွင် သက်ဆိုင်ရာသံရုံးနှင့် စစ်သံရုံးများမှတစ်ဆင့် ဆက်သွယ်ဆောင်ရွက်နေခြင်းဖြစ်ကြောင်း ပြောကြားသည်။
“အခုဖြစ်ခဲ့တဲ့အဖွဲ့အနေနဲ့ မြန်မာနိုင်ငံကိုရော၊ သက်ဆိုင်ရာသံရုံး၊ စစ်သံရုံးကိုရော အကြောင်းကြားထားခြင်း မရှိဘူးဆိုတာတော့ ပထမဦးစွာ ကျွန်တော်တို့ သိရပါတယ်” ဟု ဗိုလ်ချုပ်ဇော်မင်းထွန်းက ပြောကြားသည်။
ဖြစ်စဉ်ဖြစ်ပွားခဲ့သည့် နေရာသည်လည်း မြန်မာတပ်မတော်နှင့် TNLA အကြမ်းဖက်သောင်းကျန်းသူများနှင့် ထိတွေ့တိုက်ပွဲဖြစ်ပွားနေသည့် နောင်ချို့မြို့နယ်၊ အုမ္မတီးကျေးရွာအနီးတွင် ဖြစ်ပွားခဲ့ခြင်းဖြစ်သည်။
“ဒီဖြစ်စဉ်မှာ ဧပြီလ ၁ ရက်နေ့ ည ၉ နာရီခွဲလောက်မှာ နောင်ချိုဘက်ကနေပြီး ယာဉ်တန်းပေါ့ ၉ စီးလောက်ပါတယ်လို့ ပြောပါတယ်။ လာတာကို တွေ့ရပါတယ်။ အုမ္မတီးရွာနားမှာ ကျွန်တော်တို့ တပ်မတော်လုံခြုံရေးအဖွဲ့ရှိပါတယ်။ တပ်မတော်လုံခြုံရေးအဖွဲ့အနေနဲ့ ဒီယာဉ်တန်းကိုတွေ့တဲ့အခါမှာ တားဆီးပါတယ်။ တားဆီးလို့မရပါဘူး။ မီတာ ၁၀၀ လောက်၊ မီတာ ၂၀၀ လောက်အကွာကတည်းက မီးထိုးပြီးတားဆီးတယ်။ မီတာ ၁၀၀ လောက်အကွာမှာတော့ ကျွန်တော်တို့ မိုးပေါ်ထောင်ပြီး သေနတ် ၃ ချက် ပစ်ဖောက်ခဲ့တယ်လို့ သိရပါတယ်။ ဒါနဲ့နောက်ချိုဘက်ကို ပြန်သွားတယ်လို့ ကျွန်တော်တို့ အကြမ်းဖျင်းသိရပါတယ်” ဟု ဗိုလ်ချုပ်ဇော်မင်းထွန်းက ပြောကြားသည်။
အထက်ပါ ဖြစ်စဉ်မတိုင်မီ အဆိုပါ ကုန်းလမ်းအတိုင်း ဝင်ရောက်လာသည့် တရုတ်နိုင်ငံမှ နိုင်ငံတကာသို့ ကူညီပေးနေသည့် Blue Sky ကယ်ဆယ်ရေးအသင်း ဝင်ရောက်ခဲ့ပြီး မြန်မာနိုင်ငံရဲတပ်ဖွဲ့ အစောင့်အရှောက်ဖြင့် မတ်လ ၃၁ ရက် ၁၁ နာရီတွင် ၁၆ မိုင်ဂိတ်သို့ ရောက်ရှိပြီး ဧပြီလ ၁ ရက် နံနက် ၁ နာရီခွဲတွင် မန္တလေးသို့ အန္တရာယ်ကင်းစွာရောက်ရှိကာ မန္တလေးမြို့၌ ကယ်ဆယ်ရေးလုပ်ငန်းများ ဆောင်ရွက်နေပြီဖြစ်သည်။
“ကျွန်တော်ဆိုလိုတာက နိုင်ငံတကာ ကူညီကယ်ဆယ်ရေးလုပ်ငန်းတွေ ဆောင်ရွက်တဲ့အခါမှာ အသိပေးရတာတွေ၊ အကြောင်းကြားရတာတွေ၊ ကျွန်တော်တို့ မြန်မာနိုင်ငံမှာ အခုချိန်မှာ ကူညီကယ်ဆယ်ရေးလုပ်ငန်းတွေကို အင်တိုက် အားတိုက် ဆောင်ရွက်နေရတဲ့အပြင် သောင်းကျန်းမှုအန္တရာယ်ကလည်း ရှိပါသေးတယ်။ ဒီအပေါ်မှာ နိုင်ငံရေးအမြတ်ထုတ်လိုတဲ့ အဖွဲ့အစည်းတွေလည်း ရှိပါသေးတယ်။ ဒါတွေကို ကျွန်တော်တို့ ချိန်ဆပြီး အကောင်းဆုံးဖြစ်အောင် ကျွန်တော်တို့ ဆောင်ရွက်နေတာဖြစ်ပါတယ်။ ဒီကိစ္စနဲ့ပတ်သက်ပြီးလည်း ကျွန်တော်တို့ တပ်မတော်အနေနဲ့ရော တာဝန်ရှိသူများအနေနဲ့ရော စုံစမ်းနေပါတယ်။ ဒီအဖွဲ့တွေနဲ့ ပတ်သက်ပြီးလည်း မေးမြန်းနေပါတယ်။ တချို့ပုံတွေမှာ တက်လာတာတွေ့ပါလိမ့်မယ်။ ဒီကားတွေကတော့ မြန်မာနိုင်ငံက ကားတွေပါပဲ။ မြန်မာနိုင်ငံက နံပါတ်တွေနဲ့ ကားတွေပဲဖြစ်တာကို ဒီတရုတ်ကြက်ခြေနီအသင်းဆိုလို့ ပြောပါတယ်။ မြန်မာနိုင်ငံက ကုန်ကားတွေနဲ့ပဲ ဖြစ်ပေါ်လာတာရှိပါတယ်။ ဘာပဲပြောပြော မြန်မာနိုင်ငံ အခုလို အခက်အခဲကြုံနေရတဲ့အချိန်မှာ ကူညီကယ်ဆယ်ပေးတဲ့ စာနာထောက်ထားပေးတဲ့ အဖွဲ့အစည်းများ၊ နိုင်ငံများအားလုံးကို အထူးကျေးဇူးတင်ရှိပါတယ်။ ကြိုတင်အကြောင်းကြားခြင်း၊ ညှိနှိုင်းခြင်းများ လုံခြုံရေးအကူအညီရယူဆောင်ရွက်ခြင်းများကိုတော့ ဆောင်ရွက်ပေးကြဖို့ မေတ္တာရပ်ခံလိုပါတယ်” ဟု ဗိုလ်ချုပ်ဇော်မင်းထွန်းက ပြောကြားသည်။
တရုတ်နိုင်ငံကြက်ခြေနီအသင်းမှ မြန်မာနိုင်ငံ ငလျင်ဘေးသင့်ပြည်သူများအတွက် ပေးပို့သည့် ထောက်ပံ့ရေးပစ္စည်းများ တင်ဆောင်လာသော ကား ၉ စီးပါ ယာဉ်တန်းကို တပ်မတော်က နောင်ချိုမြိုနယ် အုမ္မတီးကျေးရွာတွင် ဧပြီလ ၁ ရက်နေ့ ည ၉ နာရီ ၂၁ မိနစ်ခန့်က ပစ်ခတ်ခဲ့ကြောင်း တအာင်းတပ် TNLA ကထုတ်ပြန်သည်။ အဆိုပါ ထုတ်ပြန်အရ မြန်မာနိုင်ငံသို့ တရားဝင်အကြောင်းကြား ဝင်ရောက်ခဲ့သည့် Sky Blue တရုတ်ကယ်ဆယ်ရေးအသင်း ရောက်ရှိပြီး တစ်ရက်ခန့် (နာရီ ၂၀ ကြာပြီး)မှ ဖြစ်ပွားခဲ့ခြင်းဖြစ်သည်။
