၂. ၄. ၂၀၂၅
Written by Thettant
ရန်ကုန်တိုင်းဒေသကြီး၊ ကမာရွတ်မြို့နယ်၊ အင်းစိန်လမ်းမပေါ်က လှည်းတန်းလူကူးကုန်းတံတားပေါ်ကနေ ဆယ်ကျော်သက် အမျိုးသမီးငယ် ၁ ဦး Selfie ရိုက်ချိန် ဖုန်းလွတ်ကျလို့ လှမ်းဖမ်းရာက လူပါပြုတ်ကျခဲ့မှု မနေ့က ဖြစ်ပွားခဲ့ရာမှာ ပြုတ်ကျတဲ့အမျိုးသမီးငယ်ဟာ ဆေးရုံအရောက် ကွယ်လွန်သွားခဲ့တယ်လို့ သိရပါတယ်။
ဖြစ်စဥ်က ဧပြီလ ၁ ရက်နေ့၊ မွန်းလွဲ ၃ နာရီခွဲဝန်းကျင်အချိန်ခန့်က ကမာရွတ်မြို့နယ်၊ အင်းစိန်လမ်းမကြီးပေါ်က လှည်းတန်းလူကူးကုန်းကျော်တံတားပေါ်မှာ လာမယ့် ဧပြီ ၁၃ ရက်မှာမှ အသက် ၁၉ နှစ်ပြည့်မယ့် မယွန်းနဒီဆိုသူ အမျိုးသမီးငယ်ဟာ Selfie ဓာတ်ပုံရိုက်နေရင်း ဖုန်းလွတ်ကျလို့ လှမ်းဖမ်းချိန် အရှိန်လွန်ကာ အမြင့်(၁၈)ပေရှိ တံတားပေါ်ကနေ တံတားအောက် လမ်းမပေါ် ပြုတ်ကျခဲ့တာလို့ CCTV စစ်ဆေးမှုတွေနဲ့ မျက်မြင်သက်သေတွေက ပြောခဲ့တာပါ။
မယွန်းနဒီရဲ့ဖုန်းက ကားတစ်စီးပေါ်ပါသွားခဲ့ပြီး သူမကလည်း ပြင်ပဒဏ်ရာမရှိဘဲ အတွင်းကြေ စိုးရိမ်ဒဏ်ရာတွေ ရခဲ့တာကြောင့် လှည်းတန်းလူမှုကူညီရေးပရဟိတအသင်းက ရန်ကုန်ဆေးရုံကြီးကို ကူညီ ပို့ဆောင်ပေးခဲ့ပေမဲ့လည်း ဆေးရုံအရောက် ကွယ်လွန်သွားခဲ့တာပါ။
မယွန်းနဒီဟာ မကြာခင် ဂျပန်နိုင်ငံကို သွားရောက်မှာဖြစ်ကြောင်းနဲ့ ပြုတ်ကျမှုကိုသိသိချင်းလိုက်သွားခဲ့ပေမဲ့ အသက်မမီခဲ့ကြောင်းကိုလည်း အကိုဖြစ်သူက “ကိုကြီး ဆေးရုံကိုအမှီလာခဲ့ပါတယ် ညီမလေးရယ်။ ညီမလေးက အသက် မရှိတော့ဘူးတဲ့လား
ကိုကြီး ညီမလေးဖြစ်ချင်တာတွေ ဦးစားပေးခဲ့တယ်လေ။ ခုဆို Japanကိုသွားရဖို့ နီးနေပြီလေ။ ဘာလို့ကိုကြီးတို့ မေမေတို့ကိုထားရက်ခဲ့တာလဲ ညီမလေးရယ်။ နောင်ဘ၀များ ပြန်ဆုံရင် ကိုကြီး ညီမလေးကို အများကြီးချစ်ပေးမှာပါ
” လို့ လူမှုကွန်ရက်မှာ ကွယ်လွန်သူပုံနဲ့တကွ ရေးသားခဲ့ပါတယ်။
