တပ်မတော်အနေဖြင့် မည်သည့်တိုင်းရင်းသား လက်နက်ကိုင်စခန်းကိုမျှ ဦးစွာတိုက်ခိုက်ခဲ့ခြင်းမရှိဘဲ ၎င်းတို့ လာရောက်တိုက်ခိုက်မှသာ လိုအပ်သည့်တုံ့ပြန်မှု ဆောင်ရွက်ခဲ့ဟုပါ ပြောကြား
၂. ၄. ၂၀၂၅
Written by Nyein Kyaw
ငလျင်ဒဏ်သင့်ဒေသများ ပြန်လည်ထူထောင်ရေးအတွက် တည်ငြိမ်အေးချမ်းမှုရှိရန် လိုအပ်သော်လည်း အကြမ်းဖက်သမားများက လျှပ်စစ်ဓာတ်အား ပြတ်တောက်ရေးအပြင် အခြားအဖျက်အမှောင့်လုပ်ရပ်များကိုပါ လုပ်ဆောင်နေကြောင်း နိုင်ငံတော်စီမံအုပ်ချုပ်ရေးကောင်စီ (SAC) ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်းက ငလျင်ဒဏ်သင့်ဒေသများ၌ ကူညီကယ်ဆယ်ရေးနှင့် ပြန်လည်တည်ဆောက်ရေး လုပ်ငန်းများ ဆောင်ရွက်ရန်အတွက် စေတနာရှင်၊ အလှူရှင်များက အလှူငွေများ ပေးအပ်လှူဒါန်းပွဲတွင် ပြောကြားခဲ့သည်။
ပြန်လည်တည်ထောင်ရေးလုပ်ငန်းများကို ဆောင်ရွက်နိုင်ရန်အတွက် တည်ငြိမ်အေးချမ်းမှုရှိရန်လည်းလိုကြောင်း၊ တည်ငြိမ်အေးချမ်းမှုရှိမှသာလျှင် စီးပွားရေးအရ ဖွံ့ဖြိုးတိုးတက်မှုများကို ပိုမိုဆောင်ရွက်နိုင်မည်ဖြစ်ကြောင်း၊ သို့သော်လည်း အကြမ်းဖက်အဖျက်သမားများအနေဖြင့် လျှပ်စစ်ဓာတ်အား ပြတ်တောက်စေရေးအပြင် အခြားသောအဖျက်အမှောင့် လုပ်ရပ်များကို လုပ်ဆောင်နေမှုများရှိကြောင်း SAC ဥက္ကဋ္ဌက ပြောကြားသည်။
ငလျင်ဘေးဒဏ်ကြောင့် လက်နက်ကိုင်အဖွဲ့များအနေဖြင့် နှစ်ပတ် အပစ်အခတ်ရပ်စဲမည်ဟု ထုတ်ပြန်ထားကြောင်း၊ တပ်မတော်အနေဖြင့် မည်သည့်တိုင်းရင်းသား လက်နက်ကိုင်အဖွဲ့စခန်းကိုမျှ ဦးစွာတိုက်ခိုက်ခဲ့ခြင်းမရှိဘဲ ၎င်းတို့လာရောက်တိုက်ခိုက်မှသာလျင် လိုအပ်သည့် တုံ့ပြန်မှု များကို ဆောင်ရွက်ခဲ့ခြင်းဖြစ်ကြောင်း၊ မိမိတို့အနေဖြင့် ငြိမ်းချမ်းရေးနှင့်ပတ်သက်၍ လက်တွေ့ကျကျ ထိထိရောက်ရောက် အကောင်အထည်ဖော်နိုင်ရန်အတွက် တိုင်းရင်းသားလက်နက်ကိုင်အဖွဲ့များ အားလုံးကို တွေ့ဆုံဆွေးနွေးရန် အမြဲဖိတ်ခေါ်တံခါးဖွင့်ထားပြီးဖြစ်ကြောင်း SAC ဥက္ကဋ္ဌက ပြောကြားသည်။
တိုင်းရင်းသားပြည်သူအားလုံး ငြိမ်းချမ်းရေးနှင့် ဖွံ့ဖြိုးတိုးတက်မှု၏ အရသာကိုခံစားနိုင်ရေး ရိုးသားပွင့်လင်းစွာ ဆွေးနွေးသွားကြရန် လိုအပ်မည်ဖြစ်ကြောင်း၊ လက်နက်ကိုင်အဖွဲ့များအနေဖြင့် ငြိမ်းချမ်းရေးလမ်းစဉ်များအတိုင်း အမှန်တကယ် လိုက်နာဆောင်ရွက်ကြရန်လိုကြောင်း၊ အကြမ်းဖက်သမားများအနေဖြင့် နိုင်ငံရေးအရဖြစ်ပေါ်လာသည့် ပြဿနာကို အကြမ်းဖက်သည့်နည်းလမ်းဖြင့် ဖြေရှင်းရန် ရွေးခြယ်ခဲ့ကြခြင်းဖြစ်ပြီး မိမိတို့အနေဖြင့် ချမှတ်ထားသည့် လုပ်ငန်းစဉ်များအတိုင်း ဆက်လက်ဆောင်ရွက်သွားမည်ဖြစ်ကြောင်း SAC ဥက္ကဋ္ဌက ပြောကြားသည်။
အချို့သောတိုင်းရင်းသားလက်နက်ကိုင် အဖွဲ့များအနေဖြင့် လက်ရှိအခြေအနေတွင် တိုက်ပွဲဖော်ဆောင်ခြင်းများ မရှိသော်လည်း တိုက်ခိုက်မှုများလုပ်ဆောင်ရန်အတွက် စုဖွဲ့ခြင်း၊ လေ့ကျင့်ပြင်ဆင်ခြင်းများလုပ်ဆောင်နေကြသည်ကို မိမိတို့အနေဖြင့် သိရှိပြီးဖြစ်ကြောင်း၊ ထိုသို့ဆောင်ရွက်နေခြင်းသည် တိုက်ခိုက်ခြင်းပင်ဖြစ်သဖြင့် တပ်မတော်အနေဖြင့် လိုအပ်သည့် ကာကွယ်ရေးဆိုင်ရာလုပ်ငန်းများကို ဆက်လက်ဆောင်ရွက်သွားမည်ဖြစ်ကြောင်း SAC ဥက္ကဋ္ဌက ပြောကြားသည်။
