၁. ၄. ၂၀၂၅
Written by Thettant
မန္တလေးတိုင်းဒေသကြီးအတွင်း ငလျင်လှုပ်ခတ်မှုကြောင့် Sky Villa အဆောက်အဦ ပြိုကျပျက်စီးသည့်နေရာတွင် မြန်မာနိုင်ငံမီးသတ်တပ်ဖွဲ့ရှာဖွေကယ်ဆယ်ရေးတပ်ဖွဲ့ဝင်များသည် တရုတ်ပြည်သူ့သမ္မတနိုင်ငံမှ ရှာဖွေကယ်ဆယ်ရေးတပ်ဖွဲ့ဝင်များနှင့်ပူးပေါင်း၍ ရှာဖွေကယ်ဆယ်ရေးလုပ်ငန်းများ ဆောင်ရွက်လျက်ရှိရာ ယနေ့တစ်နေ့တည်း ရုပ်အလောင်း ၇ လောင်း တွေ့ရှိခဲ့သည်။
ရုပ်အလောင်းများကို ယနေ့ နေ့လယ် ၂ နာရီ မိနစ် ၂၀ အချိန်တွင် အမျိုးသား (၁)ဦး၊ ၂ နာရီ ၄၁ မိနစ်အချိန်တွင် အမျိုးသမီး (၁)ဦး၊ ၂ နာရီ ၅၂ မိနစ်အချိန်တွင် အမျိုးသမီး (၁)ဦး၊ ၃ နာရီ ၄၃ မိနစ်အချိန်တွင် အမျိုးသား (၁)ဦး၊ ၅ နာရီခွဲအချိန်တွင် အမျိုးသမီး (၁)ဦး၊ ၆ နာရီ မိနစ် ၅၀ အချိန်တွင် အမျိုးသမီး (၁)ဦးနှင့် ည ၇ နာရီခွဲအချိန်တွင် အမျိုးသား (၁)ဦးတို့၏ ရုပ်အလောင်းများအား ထပ်မံရှာဖွေတွေ့ရှိခဲ့သည်။
ထို့ကြောင့် အဆိုပါ Sky Villa အတွင်းမှ ယနေ့ ညပိုင်းအချိန်အထိ သေဆုံးသူ အမျိုးသား(၆)ဦး၊ အမျိုးသမီး (၇)ဦး၊ စုစုပေါင်း (၁၃)ဦး ၏ ရုပ်အလောင်းများအား ရှာဖွေတွေ့ရှိခဲ့ကာ ရှာဖွေကယ်ဆယ်ရေးလုပ်ငန်းများ ဆက်လက်ဆောင်ရွက်လျက်ရှိသည်ဟု မီးသတ်ဦးစီးဌာနက ထုတ်ပြန်သည်။
ငလျင်စတင်လှုပ်ခတ်သည့်နေ့မှ သုံးရက်အတွင်း မန္တလေးတိုင်းဒေသကြီးတွင် လူဦးရေ ၄၀၃ ဦးကို အသက်ရှင်လျက် ကယ်ထုတ်နိုင်ခဲ့သော်လည်း ၂၅၉ ဦးကိုမူ အလောင်းအဖြစ်သာ ကယ်ထုတ်ခဲ့ရရှာသည်ဟု မီးသတ်ဦးစီးဌာနက ယမန်နေ့က ထုတ်ပြန်ပေးထားသည်။
