၁.၄.၂၀၂၅.
Translated by Htwe Ko Tun
တရုတ်ပြည်သူ့သမ္မတနိုင်ငံက သူ့ရဲ့ ကြည်းတပ်၊ရေတပ်၊ လေတပ်နဲ့ ဒုံးပျံတပ်ဖွဲ့တွေကို တိုင်ဝမ်ကျွန်းပတ်ပတ်လည်မှာ စစ်ရေးလေ့ကျင့်မှုတွေပြုလုပ်ဖို့အတွက် ဧပြီလ ၁ ရက် နံနက်မှာ ပို့လွှတ်ခဲ့တယ်လို့ သိရပါတယ်။ တရုတ်အစိုးရကစစ်ရေးလေ့ကျင့်မှုက တိုင်ဝမ်ကျွန်းကို ပိတ်ဆို့မှုတစ်ရပ်ပြုလုပ်ဖို့ ရည်ရွယ်တယ် လို့လည်း ပြောခဲ့ပါတယ်။
တရုတ်ပြည်သူ့သမ္မတနိုင်ငံအစိုးရကတော့ တရုတ်တိုင်ဝမ်ကို သူ့ရဲ့ အစိတ်အပိုင်း ပိုင်နက်နယ်မြေ ဖြစ်တယ်လို့သာပြောကြားနေပြီး တိုင်ဝမ်ကျွန်းကို ပြည်မကြီးရဲ့ထိန်းချုပ်မှုအောက်ရောက်အောင် အင်အားသုံး ဆောင်ရွက်မယ်လို့ခြိမ်းခြောက်ထားတာပါ။ ပြီးခဲ့တဲ့နှစ်တွေအတွင်းမှာလည်း တရုတ်အစိုးရက သူ့ရဲ့ ပြောကြားမှုအတိုင်း ဖိအားပေးနိုင်ဖို့ တိုင်ဝမ်ကျွန်းတစ်ဝိုက်မှာ တိုက်လေယာဉ်တွေနဲ့ စစ်သင်္ဘောတွေ ပိုလို့ ချထားခဲ့ပါတယ်။ ဒါပေမယ့် တရုတ်တိုင်ဝမ်အစိုးရကလည်း ဒါကို ငြင်းဆိုထားပါတယ်။
တရုတ်တိုင်ဝမ်ကာကွယ်ရေးဝန်ကြီးဌာနက တရုတ်အစိုးရရေတပ်ဟာ ရှန်ဒုံစစ်သင်္ဘောအုပ်စုကိုလည်း ကျွန်းပတ်ပတ်လည်ရှိ အဓိက စစ်သင်္ဘော ၁၉ စီးရဲ့ အစိတ်အပိုင်းတစ်ရပ်အဖြစ် ချထားတယ်လို့ ပြော ကြားခဲ့ပါတယ်။
တရုတ်ကြည်းတပ်အရှေ့ပိုင်းစစ်တိုင်းရဲ့ ပြောရေးဆိုခွင့်ရှိသူ ဗိုလ်မှူးကြီး ရှီရီကအခုပြုလုပ်မယ့် စစ်ရေး လေ့ကျင့်မှုမှာတရုတ်ပြည်သူ့သမ္မတနိုင်ငံရဲ့ တပ်ဖွဲ့တွေအနေနဲ့ တိုင်ဝမ်ကျွန်းကို ဦးတည်ဘက်မျိုးစုံက ချဉ်းကပ်မှုတွေကို လေ့ကျင့်မယ်လို့ ဆိုပါတယ်။
တရုတ်တိုင်ဝမ်သမ္မတ လိုင်ချင်းတီက မတ်လအတွင်းက တရုတ်နိုင်ငံတပ်ဖွဲ့တွေကို ရန်လိုမှုရှိတဲ့ ပြည်ပ တပ်ဖွဲ့တွေအဖြစ် ပြောခဲ့ပါသေးတယ်။
တရုတ်တပ်ဖွဲ့တွေရဲ့ အခုတစ်ကြိမ်စစ်ရေးလေ့ကျင့်မှုက ဖေဖော်ဝါရီလကစလို့ အကြီးမားဆုံးလည်းဖြစ်ပါတယ်။ တရုတ်တိုင်ဝမ်အစိုးရက တိုင်ဝမ်ကျွန်းရဲ့တောင်ဘက်ကမ်းခြေက ရေမိုင် ၄၀(၇၀ ကီလိုမီတာ) အကွာမှာ တရုတ်တပ်ဖွဲ့တွေဟာ ကျည်အစစ်နဲ့ပစ်ခတ်ပြီး လေယာဉ်ပျံနဲ့ သင်္ဘောတွေပါဝင်တဲ့ စစ်ရေးလေ့
ကျင့်မှုတစ်ရပ်ပြုလုပ်နေကြတယ်လို့ ပြောခဲ့ပါတယ်။
အမေရိကန်အောက်လွှတ်တော်ဥက္ကဋ္ဌ နန်စီပီလိုစီက တိုင်ဝမ်ကို လာရောက်လည်ပတ်ခဲ့ပြီးတဲ့နောက် ပြီးခဲ့တဲ့နှစ်တွေအတွင်း တရုတ်ပြည်သူ့သမ္မတနိုင်ငံက တိုင်ဝမ်ကျွန်းတစ်ဝိုက် စစ်ရေးလေ့ကျင့်မှုတွေ အများအပြားလုပ်ခဲ့ပါတယ်။ တိုင်ဝမ်ကိစ္စက တရုတ်နဲ့အမေရိကန်အကြား စစ်ပွဲတစ်ခုအဖြစ်တောင် ပေါက်ကွဲလာဖို့ အလားအလာရှိတဲ့ ပြဿနာလို့လည်း ယူဆကြပါတယ်။
Ref -AFP
