MT News
၁. ၄. ၂၀၂၅
ယနေ့ ဧပြီလ ၁ ရက်နေ့တွင် မြန်မာနိုင်ငံဆိုင်ရာ တရုတ်ကောင်စစ်ဝန်ရုံးမှသံမှူးကြီး Ms. Cao Jing နှင့် မြန်မာနိုင်ငံ ကြက်ခြေနီအသင်းဥက္ကဋ္ဌ ပါမောက္ခဒေါက်တာဦးမျိုးညွန့် တွေ့ဆုံခဲ့ပြီး မြန်မာနိုင်ငံသို့ တရုတ်နိုင်ငံကြက်ခြေနီအသင်းမှ ထောက်ပံ့ပေးသည့် ယွမ်ငွေ ၁ ဒသမ ၅ သန်းကို လွှဲပြောင်းပေးအပ်ခဲ့သည်။
သံမှူးကြီး Ms. Cao Jing က တရုတ်နိုင်ငံသည် အင်အားပြင်းထန်သောငလျင်လှုပ်ခတ်မှုကြောင့် ထိခိုက်သေဆုံးမှုများနှင့် အိုးအိမ်ဆုံးရှုံးမှုများကြုံတွေ့ခဲ့ရသော မြန်မာနိုင်ငံအစိုးရနှင့် ပြည်သူများအတွက် ဝမ်းနည်းစိတ်မကောင်းဖြစ်မိပါကြောင်း ပြောသည်။
တရုတ်နှင့်မြန်မာသည် ချစ်ကြည်ရင်းနှီးသော အိမ်နီးချင်းနှင့်ဆွေမျိုးပေါက်ဖော်ညီအစ်ကိုများဖြစ်၍ မြေငလျင်လှုပ်ခတ်ပြီးနောက် တရုတ်နိုင်ငံသမ္မတရှီကျင့်ဖျင်က မြန်မာနိုင်ငံအကြီးအကဲထံ စာနာထောက်ထားပါကြောင်း သဝဏ်လွှာပေးပို့ခဲ့သည်။
ထို့အပြင် တရုတ်နိုင်ငံသည် အရေးပေါ်လူသားချင်းစာနာထောက်ထားမှုအကူအညီ ယွမ်သန်း ၁၀၀ ပေးအပ်ခဲ့ပြီး အသက်ရှင်ကျန်ရစ်သူ (၆) ဦးကို ကယ်ဆယ်နိုင်ခဲ့သည့် ကယ်ဆယ်ရေးအဖွဲ့များစွာကို စေလွှတ်ခဲ့ကြောင်း၊ တရုတ်ကြက်ခြေနီ အသင်း၏ ကူညီမှုသည် မြန်မာနိုင်ငံပြည်သူများအတွက် တရုတ်ပြည်သူများ၏ နက်ရှိုင်းသော ချစ်ကြည်ရင်းနှီးမှုကို ဖော်ပြနေကြောင်း၊ တရုတ်နိုင်ငံသည် မြန်မာနိုင်ငံ၏ လိုအပ်ချက်များအပေါ် အခြေခံ၍ဘေးအန္တရာယ်ကယ်ဆယ်ရေး အထောက်အပံ့များ ဆက်လက် ပံ့ပိုးပေးပြီး အခက်အခဲများကျော်လွှားနိုင်အောင်ကူညီသွားရန်ဆန္ဒရှိကြောင်းကို Ms. Cao Jing က ပြောသည်။
ထို့အတူ ပါမောက္ခဒေါက်တာဦးမျိုးညွန့်သည် တရုတ်နိုင်ငံက အမြန်ဆုံးလာရောက်ပြီး မြန်မာပြည်သူများအား ကူညီထောက်ပံ့မှုပေး၍ အဖိုးတန်သော ပံ့ပိုးမှုများပေးအပ်ခဲ့သည့်အတွက် ကျေးဇူးအထူးတင်ရှိပါကြောင်း၊ မြန်မာနိုင်ငံကြက်ခြေနီအသင်းအနေဖြင့် တရုတ်နိုင်ငံနှင့်အတူ ပူးပေါင်းလက်တွဲကာ အခက်အခဲများကို မကြာမီ ကျော်လွှားနိုင်အောင် ဆောင်ရွက်သွားမည်ဖြစ်ပြီး နေရပ်ဌာနေများကို ပြန်လည်တည်ဆောက်နိုင်ရန် အားသွန်ခွန်စိုက် ကြိုးပမ်းသွားမည်ဖြစ်ကြောင်း ပြောကြားခဲ့သည်။
