၁.၄.၂၀၂၅
Written By Thandar
တေးရေး တေးဆို အဆိုတော် ပိုပိုက ငလျင်ဘေးသင့်ပြည်သူတွေအတွက် ကျပ်သိန်း ၁၄၀ ကို စစ်ကိုင်းမြို့ကို သွားလှူမယ့် နာရေးကူညီမှုအသင်းနဲ့အတူ ပါဝင်လှူဒါန်းခဲ့ပါတယ်။
“ယနေ့ စစ်ကိုင်းကိုသွားမဲ့ ငလျင်ဘေးအလှူ သိန်း ၁၄၀ ကျော် ရေ လှူဖြစ်ပါတယ်။ Dead body bags နဲ့ အစားအသောက်လှူဒါန်းဖြစ်ပါတယ်။ ပိုတို့ သိန်း ၁၀၀ ကျပ်ပါဝင်လှူဒါန်းထားတဲ့ အဖွဲ့တွေက ယနေ့မနက်ပိုင်းက မန္တလေးသွားရင်း ပျဉ်းမနားကို ဝင်ကူခဲ့ပါတယ်။ မန္တလေးမှာ ရေကတ် ၁၀၀၀ လှူဖို့သွားနေပါပြီ။ မရသေးတဲ့နေရာတွေမှာ ဦးစားပေးလှူဒါန်းပါမယ်”လို့ အဆိုတော် ပိုပိုက ပြောပါတယ်။
ဒါ့အပြင် သရုပ်ဆောင် မှူးထိပ်ထားနဲ့ အနုပ ညာရှင်များစွာက စစ်ကိုင်းမှာ ငလျင်ပြင်းထန်စွာလှုပ်ခတ်ခံရတဲ့ မိသားစု အသက်အိုးအိမ်ဆုံးရှုံးသူတွေ အစားအ သောက်ခက်ခဲနေချိန်မို့ ယနေ့ ဧပြီ ၁ရက်နေ့မှာ ကိုယ်တိုင်ကိုယ်ကျ ချက်ပြုတ်လှူဒါန်းခဲ့ပါတယ်။
“မှူး ဒီနေ့မနက်ပိုင်းမှာပဲ စစ်ကိုင်းရောက်ပါတယ်။ စစ်ကိုင်းမြို့က ဒီနေ့မနက်ပိုင်း သံဃာတော်တွေနဲ့ သီလရှင်တွေ အပါး ၄၀၀၀ ကျော်အတွက် ဆွမ်း နဲ့ ရေသန့်တွေလှူဒါန်းဖြစ်ပါတယ်။ စစ်ကိုင်းက ထိခိုက် အိမ်ခြေ များတဲ့အတွက် နေ့လည်စာအာဟာရ အလှူကိုလည်း ဆက်လှူဒါန်းဖြစ်ပါတယ်။ မှူး ကိုယ်တိုင် ရောက်နေပြီဖြစ်တဲ့ အတွက် ငလျင် ဘေးသင့်သူများအတွက် အလှူငွေတွေလှူချင်ရင် မှူးနဲ့ဆက်သွယ်ပြီး လှူလို့ရပါတယ်”လို့ သရုပ်ဆောင် မှူးထိပ်ထားက ပြောပါတယ်။
သူမရဲ့ စစ်ကိုင်းက မိသားစုနေအိမ်လည်း ပျက်စီးဆုံးရှုံးထားတယ်လို့လည်း သိရပါတယ်။ အဆိုပါ အလှူမှာတော့ အနုပညာရှင်တွေဖြစ်တဲ့ အကယ်ဒမီ ခန့်စည်သူ၊ လှမျိုးသဥ္ဇာနွယ်၊ သင်းနဒီဇော်၊ ဆောင်းယွန်းစံ စတဲ့သူတွေပါ လိုက်ပါပြီး လှူဒါန်းမှုတွေကို လုပ်ဆောင်ခဲ့ကြတာလည်းဖြစ်ပါတယ်။
မှူးထိပ်ထားကတော့ စစ်ကိုင်းမြို့ရှိ ယဉ်ကျေးလိမ္မာစာသင်ကျောင်းပြိုကျပျက်စီးမှုနဲ့ ဒဏ်ရာရရှိသူတွေအတွက် ကျပ်သိန်း ၂၀ တိတိလှူဒါန်းခဲ့ပါတယ်။
