ယနေ့ အလှူငွေပေးအပ်ပွဲတွင် ငွေသားကျပ် ၁၀၄ ဘီလျံကျော်နှင့် အလှူပစ္စည်း ကျပ် ၁၂ ဘီလျံကျော် စုစုပေါင်း ကျပ် ၁၁၆ ဘီလျံကျော် လက်ခံရရှိခဲ့
ဧပြီ ၁ ရက်(ယနေ့) နံနက် ၈ နာရီအချိန်အထိ ငလျင်ဒဏ်ကြောင့် သေဆုံးခဲ့ရသူ ၂,၇၁၉ ဦး၊ ထိခိုက်ဒဏ်ရာရရှိသူ ၄,၅၂၁ ဦးရှိဟု SAC ဥက္ကဋ္ဌ ပြောကြား
၁. ၄. ၂၀၂၅
Written by Nyein Kyaw
ငလျင်ဒဏ်သင့်ဒေသများအတွက် နိုင်ငံတော်အနေဖြင့် ကျပ်ဘီလျံ ၅၀၀ မ တည်၍ ကူညီကယ်ဆယ်ရေးလုပ်ငန်းများ စတင်ဆောင်ရွက်နေပြီဖြစ်ကြောင်း နိုင်ငံတော်စီမံအုပ်ချုပ်ရေးကောင်စီ (SAC) ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က နေပြည်တော်တွင် ယနေ့ ပြုလုပ်သည့် ငလျင်ဒဏ်သင့်ဒေသများ၌ ကူညီကယ်ဆယ်ရေးနှင့် ပြန်လည်တည်ဆောက်ရေး လုပ်ငန်းများ ဆောင်ရွက်ရန်အတွက် စေတနာရှင်၊ အလှူရှင်များက အလှူငွေများ ပေးအပ်လှူဒါန်းပွဲတွင် ပြောကြားခဲ့သည်။
နိုင်ငံတော်အနေဖြင့် ကျပ်ဘီလျံ ၅၀၀ ကို မ တည်၍ ကူညီကယ်ဆယ်ရေးလုပ်ငန်းများကို စတင်ဆောင်ရွက်နေပြီဖြစ်ကြောင်း၊ ငလျင်နှင့် ပတ်သက်၍ ၁၉၁၂ ခုနှစ်ခန့်မှ စတင်၍ ငလျင်များလှုပ်ခတ်ခဲ့သည့် သင်ခန်းစာများ များစွာရရှိခဲ့ပြီးဖြစ်ကြောင်း၊ ငလျင်နှင့် ပတ်သက်၍ အလေးထားပြီးဆောင်ရွက်ရန် လိုအပ်ချက်များရှိသည်ကို တွေ့ရကြောင်း SAC ဥက္ကဋ္ဌက ပြောကြားသည်။
အဆောက်အဦများနှင့်ပတ်သက်၍လည်း အဆောက်အဦများ ဆောက်လုပ်ရာတွင် ဖြစ်ပေါ်လာနိုင်မည့် ငလျင်ဒဏ်ကိုထည့်သွင်းစဉ်းစားခြင်းမရှိဘဲ ဆောင်ရွက်ခဲ့သည်များရှိခြင်းကြောင့် ယခုဖြစ်ပေါ်ခဲ့သည့် ငလျင်သဘာဝဘေးတွင် မလိုလားအပ်ဘဲ သေဆုံးခဲ့ရမှုများ၊ ဒဏ်ရာရရှိခဲ့ရမှုများနှင့် အပျောက်အဆုံးများရှိခဲ့ရကြောင်း SAC ဥက္ကဋ္ဌက ပြောကြားသည်။
ယနေ့ နံနက် ၈ နာရီအချိန်အထိ စာရင်းကောက်ယူမှုများအရ ငလျင်ဘေးဒဏ်ကြောင့် သေဆုံးခဲ့ရသူ ၂,၇၁၉ ဦး၊ ထိခိုက်ဒဏ်ရာရရှိသူ ၄,၅၂၁ ဦး၊ ပျောက်ဆုံးနေသူ ၄၄၁ ဦးရှိသည်ဟု သိရှိရပြီး ကယ်ဆယ်ရေးလုပ်ငန်းများကို အင်တိုက်အားတိုက် ဆက်လက်ဆောင်ရွက်လျက်ရှိကြောင်း SAC ဥက္ကဋ္ဌက ပြောကြားသည်။
ထို့နောက် ၁၂ နာရီ ၅၁ မိနစ် ၀၂ အချိန်တွင် နိုင်ငံတော်အဆင့် ဝမ်းနည်းခြင်း အထိမ်းအမှတ်နေ့ရက် တစ်နိုင်ငံလုံးအတိုင်းအတာ လှုပ်ရှားမှုအဖြစ် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်နှင့် အဖွဲ့ဝင်များ၊ စေတနာရှင်၊ အလှူရှင် များ၊ တက်ရောက်လာကြသူများသည် တစ်မိနစ်ငြိမ်သက်စွာရပ်တန့်၍ တစ်နိုင်ငံလုံးမှ ပြည်သူလူထုနှင့်အတူ ဦးညွတ်ဂါရဝပြုကြသည်။
ယနေ့ နေပြည်တော်တွင် ကျင်းပပြုလုပ်သည့် ငလျင်ဘေးဒဏ်သင့်ဒေသများ၌ ကူညီကယ်ဆယ်ရေးနှင့် ပြန်လည်ထူထောင်ရေးလုပ်ငန်းများ ဆောင်ရွက်ရန်အတွက် စေတနာရှင်၊ အလှူရှင်များက အလှူငွေများပေးအပ်လှူဒါန်းပွဲ အခမ်းအနားတွင် ငွေသား ကျပ် ၁၀၄ ဒသမ ၄၄ ဘီလျံ၊ အလှူပစ္စည်း ၁၂ ဒသမ ၄ ဘီလျံ၊ စုစုပေါင်း ၁၁၆ ဒသမ ၈၄ ဘီလျံကို လက်ခံရရှိခဲ့ကြောင်း အသိပေး ထုတ်ပြန်ထားသည်။
