၁. ၄. ၂၀၂၅
Written by Nyein Kyaw
ယခုနှစ် မြန်မာ့ရိုးရာသင်္ကြန်ကို အပျော်အပါးသီဆိုကခုန်မှုများ မပါဝင်ဘဲ ရိုးရာယဥ်ကျေးမှုနှင့်အညီ အေးချမ်းသာယာသောသင်္ကြန်အဖြစ် ကျင်းပသွားမည်ဖြစ်ကြောင်း နိုင်ငံတော်စီမံအုပ်ချုပ်ရေးကောင်စီ (SAC) သတင်းထုတ်ပြန်ရေးအဖွဲ့မှ ယနေ့တွင် အသိပေးထုတ်ပြန်ထားသည်။
လက်ရှိကြုံတွေ့နေရသော ပြင်းထန်သည့်ငလျင်ဘေးအန္တရာယ်ကြောင့် နေပြည်တော်ကောင်စီနယ်မြေ၊ စစ်ကိုင်း၊ ပဲခူး၊ မကွေး၊ မန္တလေးတိုင်းဒေသကြီးနှင့် ရှမ်းပြည်နယ်တို့အတွင်း၌ ပြည်သူအချို့ သေဆုံးဒဏ်ရာရ ထိခိုက်နစ်နာဆုံးရှုံးမှုများ ကြုံတွေ့နေရသည်။
ထိုကြောင့် တစ်နိုင်ငံလုံးဝမ်းနည်းကြေကွဲနေရသော ကာလဖြစ်ပါသဖြင့် ယခုနှစ် မြန်မာ့ရိုးရာသင်္ကြန်ကို အပျော်အပါးသီဆိုကခုန်မှုများ မပါဝင်ဘဲ ရိုးရာယဥ်ကျေးမှုနှင့်အညီ အေးချမ်းသာယာသောသင်္ကြန်အဖြစ် ကျင်းပသွားမည်ဖြစ်ကြောင်း အသိပေးထုတ်ပြန်ထားသည်။
၁၃၈၆ ခုနှစ်၊ မြန်မာ့ရိုးရာမဟာသင်္ကြန်ပွဲတော်သည် ကမ္ဘာ့ဒြပ်မဲ့ယဉ်ကျေးမှုအမွေအနှစ် စာရင်းဝင်အဖြစ် ပထမဆုံးကျင်းပမည့် မြန်မာ့ရိုးရာနှစ်သစ်ကူး အတာသင်္ကြန်ပွဲတော်ဖြစ်ပြီး အဆိုပါ သင်္ကြန်ပွဲတော်တွင် မြန်မာ့ရိုးရာသနပ်ခါးကိုပါ ယူနက်စကို(UNESCO) စာရင်းဝင်ဖြစ်အောင် ထည့်သွင်း ဆောင်ရွက်ရန် ရည်ရွယ်ဆောင်ရွက်ထားခြင်းဖြစ်သည်။
သို့သော်လည်း လက်ရှိဖြစ်ပေါ်နေသည့် နိုင်ငံအတွင်း ငလျင်ဒဏ်ကြောင့် ဝမ်းနည်းပူဆွေးနေရခြင်းကြောင့် အပျော်အပါးသီဆိုကခုန်မှုများ မပါဝင်ဘဲ ရိုးရာယဥ်ကျေးမှုနှင့်အညီ အေးချမ်းသာယာသောသင်္ကြန်အဖြစ် ကျင်းပသွားမည်လည်းဖြစ်သည်။
