MT News
၁. ၄.၂၀၂၅
တရုတ်ကိုးကန့် MNDAA၊ တအာန်းလက်နက်ကိုင် TNLA နဲ့ ရခိုင်လက်နက်ကိုင် AA သုံးဖွဲ့ စုဖွဲ့ထားတဲ့ မြောက်ပိုင်းလက်နက်ကိုင်သုံးဖွဲ့က ငလျင်ကြောင့် ခုခံစစ်တစ်လဆင်နွှဲမယ်လို့ ဒီနေ့ကြေညာလာပါတယ်။
မတ်လ ၂၈ က လှုပ်ခတ်ခဲ့တဲ့ ရစ်ချ်တာစကေး ၇ ဒသမ ၇ အဆင့် အင်အားအလွန်ပြင်းထန်သော ငလျင်ကြီးတစ်ခုနဲ့ နောက်ဆက်တွဲ ငလျင်ငယ်များစွာကြောင့် စစ်ကိုင်းတိုင်း၊ မန္တလေးတိုင်း၊ ရှမ်းပြည်နယ်၊ ပဲခူးတိုင်းနဲ့ နေပြည်တော် အပါအဝင် မြန်မာနိုင်ငံအတွင်းက နေရာဒေသ အများအပြားမှာ ပြည်သူလူထုများစွာ အသက်အိုးအိမ် စည်းစိမ်၊ အိမ်မွေးတိရစ္ဆာန်၊ လူနေအိမ်၊ တိုက်တာ အဆောက်အအုံ၊ စာသင်ကျောင်း၊ ဆေးရုံ၊ ကျေးလက်ဆေးပေးခန်း၊ ဘုရားကျောင်းကန် စေတီပုထိုး၊ ဗလီတွေ အပါအဝင် သာသနိကအဆောက်အအုံတွေ၊ တန်ဖိုးမဖြတ်နိုင်တဲ့ ရှေးဟောင်းယဉ်ကျေးမှုအမွေအနှစ် မြောက်မြားစွာ ပျက်စီးဆုံးရှုံးခဲ့ရတယ်လို့ ဆိုပါတယ်။
ဒါကြောင့် ညီနောင်မဟာမိတ် (၃) ဖွဲ့အနေနဲ့ ငလျင်နောက်ဆက်တွဲအခြေအနေတွေကို အလေးအနက်ထား စောင့်ကြည့်လေ့လာပြီး ငလျင်ဒဏ်သင့်မြို့တွေမှာ အရေးပေါ် ကူညီကယ်ဆယ်ရေး၊ ရှာဖွေရေးလုပ်ငန်းတွေ လုပ်ဆောင်နေကြတဲ့ ပြည်တွင်း၊ ပြည်ပ ကူညီကယ်ဆယ်ရေး စေတနာ့ဝန်ထမ်းတွေ၊ စိတ်လက် ကြည်သာစွာ လုပ်ကိုင်နိုင်ကြစေဖို့နဲ့ ငလျင်ဒဏ်သင့် ပြည်သူတွေအတွက် အရေးတကြီးနဲ့ အရေးပေါ်ချက်ချင်း လိုအပ်လျက်ရှိတဲ့ လူသားချင်းစာနာထောက်ထားမှုဆိုင်ရာ လုပ်ငန်းတွေကို အမြန်ဆုံး ထိထိရောက်ရောက် ဆောင်ရွက်နိုင်ဖို့ အထူးလိုလားတယ်လို့ ပြောပါတယ်။
ဒါကြောင့် ဒီထုတ်ပြန်ချက် ထုတ်ပြန်လိုက်တဲ့အချိန်ကစတင်ပြီး တပ်မတော်နဲ့ မြောက်ပိုင်းသုံးဖွဲ့ကြား တိုက်ပွဲဖြစ်ပွားနေတဲ့ နေရာတွေမှာ မိမိကိုယ်မိမိ ခုခံကာကွယ်တဲ့ တုံ့ပြန်မှုမျိုးကလွဲလို့ စတင်ထိုးစစ်ဆင်တိုက်ခိုက်မှု ပြုလုပ်မှာမဟုတ်ဘဲ ဧပြီလ (၁) ရက်နေ့ကနေ (၃၀) ရက်နေ့အထိတစ်လတာ တစ်ဖက်သတ် အပစ်အခတ်ရပ်စဲတယ်လို့ ဆိုပါတယ်။
