၁.၄.၂၀၂၅
Written By Thandar
ဆိုင်မိုင်းနာမည်နဲ့ ပရိသတ်အားပေးမှုအခိုင်အမာရရှိခဲ့တဲ့ မင်းသမီး ပိုးကြာဖြူခင်ကတော့ ယနေ့ ဧပြီ ၁ ရက်နေ့ကစ ငလျင်ဘေးသင့်သူတွေကို သင်္ကြန်မတိုင်ခင်အထိ နေ့စဉ် ထမင်း၊ ဟင်း၊ ရေသန့်စတာတွေ စတုဒိသာ နေ့စဉ် လှူဒါန်းသွားမယ်လို့ ဆိုပါတယ်။
“ယနေ့ ဧပြီ ၁ ရက်နေ့မှစပြီး နေ့စဉ် ထမင်းဘူး စတုဒိသာချက်လှူနေပါတယ်။ ဒီတစ်ခါတော့ ကိုယ်တိုင် ချက် ကိုယ်တိုင်ထည့် မနက် ၄ ခွဲထဲက ထမင်းထချက်ပြီး စီစဉ်ခဲ့တဲ့အလှူလေးပါ။ အိမ်နဲ့ ဆိုင်အတွင်းပိုင်း ကတော့ ငလျင်ဒဏ်ကြောင့် အနည်းငယ် ထိခိုက်ပျက်စီးမှုတွေ ရှိတာကြောင့် အချိန်အတိုင်းအတာ တစ်ခုထိ ရတနာ PK Htun စိန်ဆိုင်ကို ယာယီ ပိတ်ထားပါတယ်ရှင်။ ကျွန်မတို့ မိသားစုက အစွမ်းရှိသလောက် ငွေအားလူအား စိုက် ထုတ်လှူဒါန်းပေးပါမယ်ရှင်။ လတ်တလောမှာတော့ မန္တလေးမြို့တွင်းမှာရှိတဲ့ ငလျင်ဒဏ်ခံစားခဲ့ရတဲ့ ပြည်သူတွေအတွက် ထမင်းဘူး ၊ ရေသန့်နဲ့ လိုအပ်နိုင်မယ့်အရာတွေ အကူအညီ နိုင်တဲ့ လူသုံးကုန်ပစ္စည်းတွေကို လိုက်လံ လှူဒါန်းပေးပါတယ်။ သင်္ကြန်မတိုင်ခင်ထိ နေ့တိုင်း လှူနိုင်ဖို ကြိုးစားနေပါတယ်”လို့ သရုပ်ဆောင် ပိုးကြာဖြူခင်က ပြောပါတယ်။
သူမကတော့ ယနေ့ ဧပြီ ၁ ရက်နေ့မှ နံနက်ပိုင်းစာကို လက်ဖက်ထမင်း၊ ကြက်ဥပြုတ်၊ ငါးခြောက်ကြော်၊ သရက်ချဉ်သုပ်တို့ပါဝင်တဲ့ ထမင်းဘူး လှူဒါန်းနေတာလည်းဖြစ်ပါတယ်။ မနက်ပိုင်း တစ်ဖြတ်အပြီး ညနေ ၄ နာရီကျော်မှ ထပ်ကျွေးတယ်လို့လည်း သိရပါတယ်။
“ ဒီအလှူမှာ ပါဝင်ကူညီ ပေးကြတဲ့ အဆိုတော်မိုးထက်မြင့် ၊ ဖောင်းတောဘုရင်မ ၊ မမိုးထွေး ( မိုးထိအောင်စည်) နှင့် ချစ်မိတ်ဆွေများ အားလုံးကို ကျေးဇူးအများကြီးတင်ပါတယ်ရှင်။ ဒီနေ့ ဧပြီ ၁ ရက်က စပြီး ၆၆ လမ်းနဲ့ ၁၀၉ လမ်းထောင့်ရှိ ရတနာ PK Htun စိန်ဆိုင်ရှေ့မှာလည်း နေ့စဉ် ထမင်းဘူး စတုဒိသာ ဝေပေးမှာဖြစ်လို့ အကူအညီလိုသူများ လာရောက်သုံးဆောင်နိုင်ပါတယ်ရှင်”လို့ သူမက ဆက်ပြောပါတယ်။
