၁.၄.၂၀၂၅
Written By Thandar
“ငလျင်ဘေးသင့်ပြည်သူများအတွက် မျက်ရည်ဖြင့် ကမ်းသောလက်များ”အမည်နဲ့ မြန်မာနိုင်ငံတဝှမ်းက ငလျင်ဘေးသင့်ပြည်သူတွေအတွက် အနုပညာရှင်တွေက လိုက်လံအလှူခံခြင်းကို ယနေ့ ဧပြီ ၁ ရက်နေ့ နံနက်ပိုင်းက ရန်ကုန်မြို့ Junction Square နဲ့ Time City အနီးတဝိုက်မှာ ပြုလုပ်ခဲ့ပါတယ်။
“ဆရာဦးသီ@ဒါရိုက်တာ မောင်သီက မနေ့က ဆက်သွယ်လာတယ်။ ငလျင်ဘေးအတွက် ကုသိုလ်ပြုချင်တယ်ဆိုပြီး ဆက်သွယ်လာလို့ တတ်နိုင်တဲ့ဘက်က အလှူလာပြုတာပါ။ တစ်ဖက်တစ်လမ်းကနေ ကုသိုလ် လာပြုတာပါ။ အခုချိန်မှာ လူတိုင်းက သူ့အပူ၊ သူ့အခက်အခဲနဲ့ သူ ရှိကြပါတယ်။ ဒီလိုဖြစ်နေတဲ့ ကြားထဲကနေ အခုလိုမျိုး ဖြစ်သွားတာဆိုတော့ ဒီလိုမျိုး အခြေအနေ ဆိုတာကလည်း တော်တော်လေးကို ဆိုးတယ်။ ဒါကြောင့် လူတွေကလည်း ကိုယ့်မှာ အပူတွေ ဘယ်လောက်ပဲ ရှိရှိ ကုသိုလ် လုပ်ဖို စဉ်းစားလိုက်တာပါ။ သတင်းတွေ တက်လာတော့ တော်တော်လေး စိတ်မကောင်းဖြစ်ရတယ်။ မန္တလေး ဆိုတာလည်း ကိုယ့် မွေးရပ်မြေ ဖြစ်နေတော့ တော်တော်လေး စိတ်ထိခိုက်ရတယ်”လို့ သရုပ်ဆောင် ဆုဝတီက ပြောပါတယ်။
အဆိုပါ အလှူခံခြင်း အစီအစဉ်ကိုတော့ ဒါရိုက်တာ မောင်သီ ဦးဆောင်ပြီးတော့ MRTV – 4 သရုပ်ဆောင်တွေ ၊ Art & Act Film Production က သင်တန်းဆင်း သရုပ်ဆောင်တွေ ၊ ၂၀၂၄ခုနှစ် အကယ်ဒမီ ရွှေကြို မောင်မယ်လေးတွေနဲ့ အတူ လူရွှင်တော် မေတ္တာမြင့်မြတ်ဟိန်း၊ လူရွှင်တော် စိစိတို့ကလည်း ပါဝင်ပြီး ပြုလုပ်ခဲ့ ကြတာပါ။
ခုလို အလှူခံရာကနေ ရရှိလာတဲ့ အလှူငွေတွေကို စစ်ကိုင်းတိုင်းဒေသကြီးနဲ့ မန္တလေးတိုင်းဒေသကြီး အတွင်းရှိ ငလျင်ဘေးသင့်ပြည်သူတွေရဲ့ လိုအပ်နေတဲ့ နေရာတွေကို လိုက်လံပို့ဆောင်လှူဒါန်းပေးသွားမယ်လို့ သိရပါတယ်။
