မြန်မာနိုင်ငံတွင် ငလျင်ဒဏ်ခံခဲ့ရသော ပြည်သူများအတွက် ထိုင်းဘုရင်မင်းမြတ်လှူဒါန်းသည့် ကူညီထောက်ပံ့ရေးပစ္စည်းများကို ထိုင်းသံရုံးက လွှဲပြောင်းပေးအပ်

MT News
၁. ၄. ၂၀၂၅

မြန်မာနိုင်ငံတွင် ငလျင်ဒဏ်ခံခဲ့ရသော ပြည်သူများအတွက် ထိုင်းဘုရင်မင်းမြတ်လှူဒါန်းသည့် ကူညီထောက်ပံ့ရေးပစ္စည်းများကို မြန်မာနိုင်ငံဆိုင်ရာ ထိုင်းသံရုံးက ယနေ့နံနက်ပိုင်းတွင် လွှဲပြောင်းပေးအပ်ခဲ့သည်။

ယနေ့ ဧပြီလ ၁ ရက်နေ့ မနက် ၁၁ နာရီ ၁၅ မိနစ်အချိန်တွင် ထိုင်းဘုရင့်လေတပ်မှ အထူးလေယာဉ်နှစ်စင်းသည် မြန်မာနိုင်ငံတွင် ငလျင်လှုပ်ခတ်မှုဒဏ်ခံခဲ့ရသူများအတွက် ထိုင်းဘုရင်မင်းမြတ်နှင့်မိဖုရားကြီးမှ ပေးအပ်သော လူသားချင်းစာနာထောက်ထားမှုအကူအညီများဖြစ်သည့် လှူဒါန်းဖွယ်များပေးအပ်ရန် နေပြည်တော်လေဆိပ်သို့ ရောက်ရှိလာခဲ့သည်။

အဆိုပါလှူဒါန်းဖွယ်များတွင် ဆေးဝါးအိတ်များ၊ ယာယီတဲများ၊ အသင့်စားခေါက်ဆွဲခြောက်၊ ဆန်ပြုတ်ဘူး၊ ငါးသေတ္တာ၊ ဓာတ်မီး၊ မီးစက်နှင့် အခြားလိုအပ်သောကယ်ဆယ်ရေးပစ္စည်းများပါဝင်လာသည်။

လှူဒါန်းမှုကို မြန်မာနိုင်ငံဆိုင်ရာထိုင်းသံအမတ်ကြီး ဉီးဆောင်ပြီး ဘုရင်မင်းမြတ်၏ကူညီထောက်ပံ့မှုပစ္စည်းများကို လူမှုဝန်ထမ်း၊ကယ်ဆယ်ရေးနှင့် ပြန်လည်နေရာချထားရေး ဝန်ကြီးဌာန ဒုတိယဝန်ကြီး ဦးစိုးကြည် ထံသို့ လွှဲပြောင်းပေးအပ်ခဲ့သည်။

အဆိုပါပစ္စည်းများကို သဘာဝဘေးအန္တရာယ်ဆိုင်ရာစီမံခန့်ခွဲမှုဗဟိုဌာန (Disaster Management Center : DMC) ထံ ဆက်လက် ပေးအပ်သွားမည်ဖြစ်ပြီး ငလျင်ဘေးသင့်ပြည်သူများအားပေးအပ်ရန် နေရာအသီးသီးသို့ ဆက်လက်ဖြန့်ဝေသွားမည်ဖြစ်ကြောင်း သိရသည်။