၁.၄.၂၀၂၅
Written By Thandar
ဂီတလမ်းကြောင်းပေါ်မှာ ပရိသတ်အားပေးမှုများစွာ ရရှိထားတဲ့ တေးရေး တေးဆို အဆိုတော် မိုးမိုးကတော့ ငလျင်ဘေးကြောင့် ဒုက္ခရောက်နေသူတွေကို ပြင်ဦးလွင်မှာ ယာယီနေထိုင်ခွင့်အခမဲ့ပေးထားတယ်လို့ သိရပါတယ်။
“ငလျင်ဒဏ်ကြောင့် ပြင်ဦးလွင်မှာ ယာယီနေထိုင်လိုသူများ ကျွန်တော့်အိမ်မှာ အခမဲ့ သွားရောက်နေထိုင်နိုင်ပါတယ်။ အိမ်မကြီးမှာတော့ အခန်းက တစ်ခန်းပဲ လွတ်တော့တာ ဆိုပေမယ့် ခြံက တစ်ဧက နီးပါးကျယ်လို့ ခြံထဲက (မဖွင့်တော့တဲ့ ဆိုင်အပါအဝင်) အဆောက်အအုံတချို့မှာ အေးအေးဆေးဆေးနေလို့ရပါတယ်။ ရေ၊ မီး (လာတဲ့အချိန်ပေါ့လေ) အပြည့်အစုံ သုံးခွင့်ပေးပါတယ်ဗျ။ အိမ်သာကအစ ဆိုင်ဖွင့်တုန်းက ၄ လုံး၊ ဆိုင်အဆောက်အအုံမှာရှိတဲ့အတွက် သုံးလို့ရပါတယ်။ ရပ်ကွက်ကြီး ၆ မို့ မြို့ထဲဖြစ်တဲ့အတွက် သွားရေးလာရေး ချက်ရေးပြုတ်ရေးကအစ အဆင်ပြေပါတယ်”လို့ အဆိုတော် မိုးမိုးက ပရိသတ်သိအောင်ပြောလာပါတယ်။
သူဟာတော့ လက်တလောဖြစ်ပေါ်ခဲ့တဲ့ ငလျင်ဘေးနဲ့ပတ်သက်ပြီး စိတ်မကောင်းဖြစ်မိသလို အမှန်တကယ်လိုအပ်နေသူတွေကို တစ်ဖက်တစ်လမ်းက ပါဝင်ကူညီဖြည့်ဆည်းပေးတဲ့ သဘောနဲ့ အိမ်မှာနေထိုင်ခွင့်ကို ပေးနေတာလည်းဖြစ်ပါတယ်။ အဆိုတော် မိုးမိုးရဲ့ စစ်ကိုင်းက အမျိုးတွေတချို့လည်း ငလျင်ဘေးအန္တရာယ်က ကင်းဝေးခဲ့တယ်လို့ သိရပါတယ်။
“စစ်ဘေးရှောင်များပေးသွားလို့ ခံလိုက်ရတဲ့ အတွေ့အကြုံလေးတွေ ရှိဖူးတာကြောင့် စည်းကမ်းလေး အနည်းငယ်တော့ ထား ထားပါတယ်။ ကိုယ့်ဝေယျာဝစ္စ ကိုယ့်သန့်ရှင်းရေး ကိုယ်တာဝန်ယူရပါမယ်။ သုံးချင် ယူချင်တဲ့ပစ္စည်း ယူမယ်ဆို အိမ်ကဝန်ထမ်းကို ပြောပြီး အသိပေးပြီးမှ ယူကြပါ။ ပြန်ထားရင်လည်း ယူတဲ့နေရာမှာပဲ ပြန်ထားပေးပါဗျ။ ဒီလောက်ပါပဲ။ စည်းကမ်းတကျလေး အဆင်ပြေပြေလေးနေချင်တဲ့သူတွေက 095165946 ကို ဆက်သွယ်ပေးပါ ခင်ဗျာ”လို့ သူကဆက်ပြောပါတယ်။
