၁. ၄. ၂၀၂၅
Written by Nay Moe
ငလျင်ကြောင့် NUG က နှစ်ပတ်အပစ်ရပ်မည်ကြေညာထားသော်လည်း ပေါင်းတည် PDF က မလိုက်နာဘဲ စစ်ရေးအရှိန်မြှင့်မည်ဆိုကာ တပ်စစ်ကြောင်းကို မိုင်းဆွဲတိုက်ခိုက်ခဲ့သဖြင့် တပ်မတော်သားနှစ်ဦးသေကာ ၃ ဦး ဒဏ်ရာရခဲ့သည်ဟု ယမန်နေ့ရက်စွဲဖြင့် ယနေ့တွင် ထုတ်ပြန်လာသည်။
ဖြစ်စဥ်မှာ ယမန်နေ့ မတ်လ ၃၁ ရက် နေ့လယ် ၂ နာရီ မိနစ် ၂၀ ခန့်က ပဲခူးတိုင်း၊ ပြည်ခရိုင်၊ ပေါက်ခေါင်းမြို့နယ် ဗောဓိကုန်းရွာအထိုင် စခန်းမှထွက်ခွာလာသော လုံခြုံရေးတပ်ဖွဲ့ဝင်များကို တည်ပင်ကြောလမ်းခွတွင် ပြည်ခရိုင်၊ ပြည်သူ့ကာကွယ်ရေးတပ်မတော် (၃၆၀၁) PPDF တပ်ရင်း တပ်ခွဲ (၄) နှင့် တပ်ခွဲ (၅) တို့မှအတူပူးပေါင်းပြီး မိုင်း (၃)ကြိမ်ဆွဲတိုက်ခိုက်ရာ ၂ ဦးမှာ နေရာတင် ပွဲချင်းပြီး သေဆုံးပြီး (၃) ဦးဒဏ်ရာရရှိသွားကြောင်း၊ ထို့နောက် သေဆုံးအလောင်းနှင့် ဒဏ်ရာရရှိသူများကို Faw ကားပေါ်တင်ဆောင်ပြီး ပေါက်ခေါင်း ဘက်သို့ထွက်ခွာသွားကြောင်း၊ ပြည်သူ့ကာကွယ်ရေးတပ်မတော်မှ စစ်ရေးအရှိန်မြှင့်တင်နေပြီဖြစ်ကြောင်း ပေါင်းတည် PDF ၏ ယနေ့ထုတ်ပြန်သည့် ချောင်းမြောင်းတိုက်ခိုက်မှု ဝန်ခံစာဖြင့် ဖော်ပြထားသည်။
မတ်လ ၂၈ ရက်က ဖြစ်ပွားပြီး လူထောင်ချီသေဆုံးသလို လမ်းတံတား၊ အဆောက်အအုံ ထောင်ချီပျက်စီးသော စစ်ကိုင်းငလျင်ဘေးကြောင့် လူသားချင်း စာနာထောက်ထားမှု အကူအညီပေးရေးဆိုင်ရာလုပ်ငန်းများ ဆောင်ရွက်နိုင်ရန်အတွက် ငလျင်ဒဏ်သင့်ဒေသများနှင့် ဆက်စပ်သော ခရိုင်များအတွင်း ခုခံကာကွယ်စစ်မှလွဲ၍ ထိုးစစ်အားလုံး ရက်သတ္တနှစ်ပတ်ကြာ (မတ် ၃၀ ရက် မှ ဧပြီ ၁၂ ရက်ထိ) ရပ်ဆိုင်းထားရန် မတ်လ ၂၉ ရက်တွင် NUG က အထူးညွှန်ကြားချက်(၂/၂၀၂၅)ဖြင့် ထုတ်ပြန်ထားသည်။
သို့သော်လည်း NUG ဩဇာခံ PDF များက NUG ၏ ထုတ်ပြန်ချက်လည်း မလိုက်နာ ပြည်သူများ အဓိကလိုအပ်နေသည့် လျှပ်စစ်ဓာတ်အားရရှိရေးတွင် အဓိကကဏ္ဍတွင် ပါဝင်သော လျှပ်စစ်ဓာတ်အားခွဲရုံများကိုပါ ဆက်လက်ဖျက်ဆီး တိုက်ခိုက်နေခဲ့သည်ကို ပြီးခဲ့သည့် မတ်လ ၃၁ ရက် နံနက် ၆ နာရီခန့်တွင်လည်း ကြုံခဲ့ရပြီး မကွေးတိုင်းဒေသကြီး၊ စလင်းမြို့၏ အနောက်မြောက်ဘက် မီတာ ၅၅၀၀ ခန့်အကွာရှိ တညောင်ဓာတ်အားခွဲရုံစက်ရုံနှင့် လုံခြုံရေးတပ်ဖွဲ့ဝင်များအား PDF များက လက်နက်ငယ်များဖြင့် လာရောက်ပစ်ခတ်တိုက်ခိုက်ခဲ့မှုလည်း ဖြစ်ပွားခဲ့သည်။
