၁. ၄. ၂၀၂၅
Written by Nyein Kyaw
ငလျင်ဒဏ်သင့်ပြည်သူများအတွက် နိုင်ငံတော်အဆင့် ဝမ်းနည်းခြင်းအထိမ်းအမှတ်အဖြစ် ယနေ့ နေ့လယ် ၁၂ နာရီ ၅၁ မိနစ်၊ ၀၂ စက္ကန့်တွင် ပြုလုပ်မည်ဖြစ်ပြီး အစိုးရဝန်ကြီးဌာနှင့် ရုံးများတွင် နိုင်ငံတော်အလံအား တိုင်ဝက်လျှော့ချလွှင့်ထူထားသည်ကို တွေ့ရှိရသည်။
၂၀၂၅ ခုနှစ်၊ မတ်လ ၂၈ ရက်နေ့ မြန်မာစံတော်ချိန် ၁၂ နာရီ ၅၁ မိနစ်၊ ၀၂ စက္ကန့်တွင် ပြင်းအား ၇ ဒသမ ၇ ရစ်(ခ်)တာစကေးရှိ အလွန်ပြင်းထန်သည့် မြေငလျင်လှုပ်ခတ်ခဲ့မှုကြောင့် အသက်ဆုံးရှုံးမှုများနှင့် ပျက်စီးဆုံးရှုံးခဲ့ရမှုများအတွက် စာနာနားလည်မှုများနှင့်အတူ ထပ်တူခံစားလျက် နိုင်ငံတော်အဆင့် ဝမ်းနည်းခြင်းအထိမ်းအမှတ်နေ့ရက်အဖြစ် မတ်လ ၃၁ ရက်မှ ဧပြီလ ၆ ရက်အထိ (၇)ရက်အား သတ်မှတ်ကြေညာထားပြီးဖြစ်၍ အစိုးရဝန်ကြီးဌာနများနှင့် ရုံးများတွင် နိုင်ငံတော်အလံအား တိုင်ဝက်လျှော့ချ၍ လွှင့်ထူထားရှိသည်။
ငလျင်လှုပ်ခတ်မှုကြောင့် အသက်ဆုံးရှုံးမှုနှင့် ပျက်စီးဆုံးရှုံးခဲ့ရမှုများအတွက် ယနေ့ ဧပြီ ၁ ရက် မြန်မာစံတော်ချိန် ၁၂ နာရီ ၅၁ မိနစ်၊ ၀၂ စက္ကန့်တွင် နိုင်ငံတော်အဆင့် ဝမ်းနည်းခြင်းအထိမ်းအမှတ် နိုင်ငံတော်အလံ တိုင်ဝက်လျှော့ချလွှင့်ထူခြင်း၊ လှုပ်ရှားသွားလာနေသူများ တစ်မိနစ်ငြိမ်သက်စွာ ရပ်တန့် ဦးညွတ်ဂါရဝပြုခြင်း၊ ဥဩဆွဲဂါဝရပြုခြင်း၊ မီဒီယာများအနေဖြင့် ထုတ်လွှင့်လျက်ရှိသည့် အစီအစဉ်များအား ခေတ္တရပ်ဆိုင်း၍ ဝမ်းနည်းခြင်းအထိမ်းအမှတ် Logo များအား ထုတ်လွှင့်ခြင်း၊ သက်ဆိုင်ရာ ကိုးကွယ်ရာဘာသာအလိုက် ဘုရားစေတီများ၊ ဘုရားကျောင်းများ၊ ဝတ်ပြုနေရာများတွင် ဆုတောင်းမေတ္တာပို့သခြင်း၊ အန္တရာယ်ကင်း ပရိတ်များ၊ ဆုတောင်းစာများ ရွတ်ဆိုခြင်းနှင့် အမျှအတန်း ပေးဝေခြင်းများကို တစ်နိုင်ငံလုံးအတိုင်းအတာ ပြုလုပ်သွားမည်ဖြစ်သည်။
