MT News
၁.၄. ၂၀၂၅
မတ်လ ၂၈ ရက်က ပြင်းအား ရစ်ချ်တာစကေး ၇ ဒသမ ၇ ဖြင့် အဟုန်ပြင်းစွာ လှုပ်ခတ်ခဲ့မှုကြောင့် ပြိုကျပျက်စီးခဲ့သော ငလျင်အပျက်အစီးအောက် ၉၁ နာရီကြာ ပိတ်မိနေသည့် အသက် ၆၃ နှစ်အရွယ် အမျိုးသမီးကြီးကို ယနေ့နံနက်ပိုင်းတွင် အသက်ရှင်လျက် ကယ်တင်နိုင်ခဲ့သည်ဟု မီးသတ်ဦးစီးဌာနမှ သိရသည်။
ဖြစ်စဥ်မှာ နေပြည်တော်၊ ဇမ္ဗူသီရိမြို့နယ်၊ တိုက်အမှတ် ၃၃၆၉ တွင် အသက်(၆၃)နှစ်ခန့် အမျိုးသမီးကြီး (၁)ဦးအား ငလျင်စတင်လှုပ်ခတ်ပြီး ၉၁ နာရီအကြာ ယနေ့ ဧပြီ ၁ ရက် နံနက် ၇ နာရီ ၅၈ အချိန်တွင် အသက်ရှင်လျက် ပိတ်မိနေကြောင်း ရှာဖွေတွေ့ရှိခဲ့ခြင်းဖြစ်သည်။
ထို့ကြောင့် မီးသတ်ဦးစီးဌာန ညွှန်ကြားရေးမှူးချုပ် ဦးမြတ်သူ၏ အနီးကပ်ကြီးကြပ်ကွပ်ကဲမှုဖြင့် ရှာဖွေကယ်ဆယ်ရေးတပ်ဖွဲ့ဝင်များနှင့် သက်ဆိုင်ရာအဖွဲ့အစည်းများ ပူးပေါင်း၍ ကယ်ဆယ်ရေးလုပ်ငန်းများဆောင်ရွက်ခဲ့ရာ နံနက် ၉ နာရီ ၁၅ မိနစ်အချိန်တွင် အသက်ရှင်လျက် ကယ်ထုတ်နိုင်ခဲ့ပြီး ကုတင် (၁၀၀၀) ဆေးရုံသို့ ပို့ဆောင်ပေးခဲ့သည်ဟု သိရသည်။
