ဆက်သွယ်ရေး မကြာခဏပြတ်တောက်မှုအပြင် ငလျင်ဒဏ်သင့်ဒေသ၏ ပူပြင်းသည့် ရာသီဥတုဒဏ်ကို ရင်ဆိုင်နေရသော်လည်း ကြိုးစားဆောင်ရွက်သွားမည်ဟုပါ ပြော
၁. ၄. ၂၀၂၅
Written by Nyein Kyaw
လူအင်အား ၅၀၀ နီးပါးရှိ တရုတ်နိုင်ငံတော်အဆင့် ကယ်ဆယ်ရေးအဖွဲ့ ၄ ဖွဲ့နှင့် အရပ်ဘက်ကယ်ဆယ်ရေးအဖွဲ့ ၁၅ ဖွဲ့ မြန်မာနိုင်ငံသို့ ရောက်ရှိနေပြီး ငလျင်ဘေးဒဏ်သင့် အသက်ရှင်ကျန်ရစ်သူများကို လိုက်လံရှာဖွေကယ်ဆယ်နေကြောင်း မြန်မာနိုင်ငံဆိုင်ရာ တရုတ်သံအမတ်ကြီး မစ္စမာကျားက မြန်မာနိုင်ငံပိုင်မီဒီယာသို့ ဖြေကြားထားသည်။
မြန်မာလူမျိုးနှင့် ပြည်သူများသည် ဇွဲသတ္တိရှိပြီး ကြံ့ကြံ့ခိုင်နိုင်စွမ်းရှိသည့် လူမျိုးဖြစ်ကြောင်း၊ မြန်မာပြည်သူများ အဆိုပါ သဘာဝဘေးအန္တရာယ်ကိုကျော်လွှားပြီး နေအိမ်များကို ပြန်လည်တည်ဆောက်နိုင်ကာ ယခင်လူနေမှုဘဝအတိုင်း အားလုံးပုံမှန် ပြန်ရောက်သွားနိုင်ကြမည်ဟု ယုံကြည်ကြောင်း တရုတ်သံအမတ်ကြီး မစ္စမာကျားက ပြောကြားသည်။
“မြန်မာနိုင်ငံရဲ့ အိမ်နီးချင်းနိုင်ငံနဲ့ ဆွေမျိုးပေါက်ဖော်အနေဖြင့် တရုတ်နိုင်ငံကလည်း မြန်မာနိုင်ငံရဲ့ လက်ရှိအခက်အခဲများကို ကျော်လွှားနိုင်ရန် အစွမ်းကုန် ကူညီဆောင်ရွက်ပေးသွားမှာဖြစ်ပါတယ်။ ဒါကလည်း ကျွန်မတို့ အေးတူပူအမျှ အသိုက် အဝန်း အတူတည်ဆောက်ရေးရဲ့ ရှိသင့်တဲ့ လိုက်နာစာင့်ထိန်းအပ်သော ဝတ္တရားများဖြစ်ပါတယ်” ဟု တရုတ်သံအမတ်ကြီး မစ္စမာကျားက ပြောကြားသည်။
တရုတ်နိုင်ငံသည်လည်း သဘာဝဘေးအန္တရာယ်အဖြစ်များသည့် နိုင်ငံတစ်နိုင်ငံဖြစ်ကြောင်း၊ မြန်မာနိုင်ငံမှ မတ်လ ၂၈ ရက်တွင် ငလျင်ဒဏ်ခံရပြီးနောက် တရုတ်ပြည်သူများကလည်း ဝမ်းနည်းစွာထပ်တူခံစားရကြောင်းနှင့် တရုတ်နိုင်ငံမှလည်း ကယ်ဆယ်ရေးအဖွဲ့များ ချက်ချင်းစေလွှတ်ပေးခဲ့ကြောင်း တရုတ်သံအမတ်ကြီး မစ္စမာကျားက ပြောကြားသည်။
“လက်ရှိမှာ တရုတ်နိုင်ငံတော်အဆင့် ကယ်ဆယ်ရေးအဖွဲ့ ၄ ဖွဲ့နဲ့ အရပ်ဘက်ကယ်ဆယ်ရေးအဖွဲ့ ၁၅ ဖွဲ့ မြန်မာနိုင်ငံသို့ ရောက်ရှိပါတယ်။ စုစုပေါင်း လူအင်အား ၅၀၀ နီးပါးရှိပါတယ်။ အဆိုပါ ကယ်ဆယ်ရေးအဖွဲ့များက တတ်စွမ်းသမျှ ငလျင်ဘေးဒဏ်သင့် အသက်ရှင်ကျန်ရစ်သူများကို လိုက်လံရှာဖွေကယ်ဆယ်နေကြပါတယ်။ လက်ရှိမှာ အခက်အခဲများစွာကို ရင်ဆိုင်နေရပေမဲ့ ကျွန်မတို့က အတတ်နိုင်ဆုံး ဆောင်ရွက်သွားမှာဖြစ်ပါတယ်” ဟု တရုတ်သံအမတ်ကြီး မစ္စမာကျားက ပြောကြားသည်။
လက်ရှိတွင် နောက်ဆက်တွဲငလျင်များ အဆက်မပြတ်လှုပ်ခတ်နေပြီး တရုတ်ကယ်ဆယ်ရေးအဖွဲ့များ၏ သယ်ယူပို့ဆောင်ရေး အထောက်အကူပြု ပစ္စည်းများနှင့် ဆက်သွယ်ရေးများ မကြာခဏ ပြတ်တောက်လျက်ရှိသည့်အပြင် ငလျင်ဒဏ်သင့်ဒေသ၏ ပူပြင်းသည့် ရာသီဥတုဒဏ်ကို ရင်ဆိုင်နေရကြောင်း သိရသည်။
“ဒါပေမဲ့ ကျွန်မတို့ရဲ့ ကယ်ဆယ်ရးအဖွဲ့ဝင်တွေဟာ ဘေးဒဏ်သင့်ဒေသမှာ အသက်ရှင်ကျန်ရစ်သူတွေကို အဆက်မပြတ် ရှာဖွေကယ်ဆယ်နေပါတယ်။ ကျွန်မတို့ကလည်း ငလျင်ကယ်ဆယ်ရေးလုပ်ငန်းများကို ဆက်လက်ပြီးတော့ ဆောင်ရွက်သွားမှာဖြစ်ပါတယ်” ဟု တရုတ်သံအမတ်ကြီး မစ္စမာကျားက ပြောကြားသည်။
