ငလျင်ဒဏ်သင့်ဒေသများအတွက် လှူဒါန်းရန် တန်ချိန် ၄၀ ရှိသော ကူညီကယ်ဆယ်ရေးပစ္စည်းများနှင့် စားသောက်ဖွယ် ရာများ တင်ဆောင်လာသည့် အိန္ဒိယရေတပ်စစ်ရေယာဉ် ၂ စင်း ရန်ကုန်သို့ ရောက်ရှိလာ

၁. ၄. ၂၀၂၅
Written by Nyein Kyaw

မြန်မာနိုင်ငံရှိ ငလျင်ဒဏ်သင့်ဒေသများအတွက် လှူဒါန်းရန်အတွက် တန်ချိန် ၄၀ ရှိသော ကူညီကယ်ဆယ်ရေးပစ္စည်းများနှင့် စားသောက်ဖွယ်ရာများ တင်ဆောင်လာသည့် အိန္ဒိယရေတပ်မှ စစ်ရေယာဉ် ၂ စင်း ယမန်နေ့တွင် ရန်ကုန်မြို့သို့ ရောက်ရှိခဲ့ကြောင်း သိရသည်။

မတ်လ ၂၈ ရက်တွင် အင်အားပြင်းမြေငလျင်လှုပ်ခတ်မှုကြောင့် မြန်မာနိုင်ငံတစ်ဝန်း ထိခိုက်ပျက်စီးဆုံးရှုံးမှုများဖြစ်ပေါ်ခဲ့သော စစ်ကိုင်းတိုင်းဒေသကြီး၊ မန္တလေးတိုင်းဒေသကြီး၊ မကွေးတိုင်းဒေသကြီးနှင့် ရှမ်းပြည်နယ်အရှေ့မြောက်ဒေသ၊ နေပြည်တော်ကောင်စီနယ်မြေ၊ ပဲခူးတိုင်းဒေသများရှိ ငလျင်ဒဏ်သင့်ပြည်သူများအား ကူညီကယ်ဆယ်ရေးနှင့် ပြန်လည် ထူထောင်ရေးလုပ်ငန်းများ ဆောင်ရွက်ရာတွင် အသုံးပြုနိုင်ရန်အတွက် အိန္ဒိယနိုင်ငံမှ လူသားချင်းစာနာထောက်ထားမှုဆိုင်ရာ အကူအညီများပေးအပ်ရန် ကူညီကယ်ဆယ်ရေးပစ္စည်းများနှင့် စားသောက်ဖွယ်ရာများ တင်ဆောင်လာသော အိန္ဒိယရေတပ်မှစစ်ရေယာဉ် INS Satpura (F-48) INS Savitri (P-53) တို့သည် သီလဝါဆိပ်ကမ်း MITT သို့ရောက်ရှိလာရာ တပ်မတော်(ရေ)မှ အရာရှိကြီးများနှင့် တာဝန်ရှိသူများက ကြိုဆိုနှုတ်ဆက်ခဲ့ကြသည်။

အဆိုပါရောက်ရှိလာသည့် ကူညီကယ်ဆယ်ရေး ပစ္စည်းများနှင့် စားသောက်ဖွယ်ရာများအား လွှဲပြောင်းပေးအပ်ခြင်းအခမ်းနားကို ဆက်လက်ကျင်းပရာရန်ကုန်တိုင်းဒေသကြီး အစိုးရအဖွဲ့ ဝန်ကြီးချုပ် ဦးစိုးသိန်း၊ ရန်ကုန်တိုင်းစစ်ဌာနချုပ်တိုင်းမှူး ဗိုလ်မှူးချုပ်ပြည့်စုံလင်း၊ တိုင်းဒေသကြီးဝန်ကြီးများနှင့်တပ်မတော်(ရေ)မှအရာရှိကြီးများမြန်မာနိုင်ငံဆိုင်ရာ အိန္ဒိယသံအမတ်ကြီးနှင့် တာဝန်ရှိသူများတက်ရောက်ခဲ့ကြသည်။

အဆိုပါ အိန္ဒိယရေတပ်မှ စစ်ရေယာဉ်များတွင် ကူညီကယ်ဆယ်ရေးပစ္စည်းများနှင့် စားသောက်ဖွယ်ရာများဖြစ်ကြသည့် အသင့်စားခေါက်ဆွဲ၊ အာဟာရပြည့် ဘီစကွတ်၊ ပလက်စတစ်ပုံး၊ ပလက်စတစ်ရေခွက်၊ တကိုယ်သုံးပစ္စည်းများ၊ ရွက်ဖျင်တဲ၊ တာပေါ်လင်စ၊ အဝတ်အထည်များ၊ သန့်ရှင်းရေးသုံးပစ္စည်းများနှင့် ဆေးဝါးများစသည်တို့ပါဝင်ပြီး စုစုပေါင်းတန်ချိန်(၄၀ )တန် ခန့်ဖြစ်ပြီး အဆိုပါ ပစ္စည်းများအား ငလျင်ဘေးသင့်ဒေသများသို့ ရန်ကုန်တိုင်းဒေသကြီးအစိုးရအဖွဲ့၏ ကြီးကြပ်မှုဖြင့် ဆက်လက်ပို့ဆောင်ပေးမည်ဖြစ်ဖြစ်သည်။