မြန်မာနိုင်ငံတွင်ဖြစ်ပွားခဲ့သည့် အင်အားပြင်းမြေငလျင်ကြောင့် ပျက်စီးဆုံးရှုံးရမှုများနှင့် ပတ်သက်၍ နိုင်ငံတကာမှ နိုင်ငံခေါင်းဆောင်များက SAC ဥက္ကဋ္ဌထံသို့ ဝမ်းနည်းကြောင်းသဝဏ်လွှာများ ပေးပို့

MT News
၁. ၄. ၂၀၂၅

၂၀၂၅ ခုနှစ်၊ မတ် ၂၈ ရက်တွင် မြန်မာနိုင်ငံအလယ်ပိုင်းကို ဗဟိုပြု၍ ဖြစ်ပွားခဲ့သော အင်အား ၇ ဒသမ ၇ ရစ်ချ်တာစကေးရှိသည့် အင်အားပြင်းငလျင်ကြောင့် ထိခိုက်ပျက်စီးမှုများ၊ အသက်ဆုံးရှုံးမှုများနှင့် ထိခိုက်ဒဏ်ရာရရှိမှုများ အမြောက်အများ ဖြစ်ပေါ်ခဲ့ခြင်းအတွက် နိုင်ငံ (၄)နိုင်ငံမှ နိုင်ငံ့ခေါင်းဆောင်များနှင့် အကြီးအကဲများက နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင်ထံသို့ ဝမ်းနည်းကြောင်းသဝဏ်လွှာများ ပေးပို့ကြသည်။

အင်အားပြင်းငလျင်ကြောင့် ထိခိုက်ပျက်စီးမှုများ၊ အသက်ဆုံးရှုံးမှုများနှင့် ထိခိုက် ဒဏ်ရာရရှိမှုများ အမြောက်အများဖြစ်ပေါ်ခဲ့ခြင်းအတွက် တရုတ်ပြည်သူ့သမ္မတနိုင်ငံ သမ္မတ မစ္စတာရှီကျင့်ဖျင် က လည်းကောင်း၊ တရုတ်ပြည်သူ့သမ္မတနိုင်ငံ ဝန်ကြီးချုပ် မစ္စတာ လီချမ်း က လည်းကောင်း၊ ကမ္ဘောဒီးယားဘုရင်မင်းမြတ် ပရယ်ဘတ်ဆမ်ဒတ် ပရယ်ဘိုရိုနိုနစ်နိုရိုဒွန်သီဟာမိုနီ က လည်းကောင်း၊ ကမ္ဘောဒီးယား အထက်လွှတ်တော် ဥက္ကဋ္ဌ ဆမ်ဒတ်အာခါမိုဟာဆီနာပါဒိုင်းတဲ့ချိုဟိုဆန် က လည်းကောင်း၊ ကမ္ဘောဒီးယားနိုင်ငံ ဝန်ကြီးချုပ် ဟွန်မာနိုက် က လည်းကောင်း၊ ဘရူနိုင်းနိုင်ငံ ဘုရင်မင်းမြတ် ဆူလ်တန် ဟာဂျီဟာဆာနာလ်ဘိုလ်ကီးယားမူအစ်ဇာဒင်ဝါဒူလာ က လည်းကောင်း၊ နီကာရာဂွာနိုင်ငံ သမ္မတ ဒယ်နီရယ်အော်တီဂါဆာဗေဒရာ နှင့် ဒုတိယသမ္မတ ရိုဆာရီမူရီလို တို့က လည်းကောင်း နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင် ထံသို့ ဝမ်းနည်းကြောင်း သဝဏ်လွှာများ အသီးသီး ပေးပို့ကြသည်။

အဆိုပါ သဝဏ်လွှာများတွင် မြန်မာနိုင်ငံအနေဖြင့် ပြင်းထန်သည့် ငလျင်ဒဏ် ခံစားခဲ့ရပြီး အသက်အိုးအိမ်စည်းစိမ် အများအပြား ထိခိုက်ဆုံးရှုံးရသည်ကို သိရှိရသည့်အတွက် များစွာ ဝမ်းနည်းမိပါကြောင်း၊ ငလျင်ဒဏ်ခံစားရသည့် ပြည်သူများအတွက် ဝမ်းနည်းစိတ်မကောင်းဖြစ်မိပါကြောင်း၊ ငလျင်ဒဏ်ကြောင့် ထိခိုက်ဒဏ်ရာရရှိသူများ နှင့် ၎င်းတို့၏ မိသားစုဝင်များအတွက် စာနာထောက်ထားပါကြောင်း၊ မြန်မာနိုင်ငံ အတွက် လိုအပ်သည့် အကူအညီများပေးရန် အဆင်သင့်ရှိကြပြီး ထိခိုက်ခံစားရသည့် မြန်မာပြည်သူများ ဘေးအန္တရာယ်ကျော်လွှားနိုင်ရေးနှင့် မြန်မာနိုင်ငံကို အစောဆုံး ပြန်လည်တည်ဆောက်နိုင်ရေးအကူအညီများပေးအပ်သွားမည် ဖြစ်ပါကြောင်း၊ မြန်မာနိုင်ငံအစိုးရ၏ ခိုင်မာအားကောင်းသည့် ဦးဆောင်မှုအောက်တွင် ငလျင်ဒဏ်သင့်ဒေသများရှိ မြန်မာပြည်သူများအနေဖြင့် ဘေးအန္တရာယ်များကို အောင်မြင်စွာ ကျော်လွှားနိုင်ပြီး ကောင်းမွန်သည့် လူမှုဘဝကို အမြန်ဆုံးပြန်လည်တည်ဆောက် နိုင်မည်ဟု ယုံကြည်ကြောင်း၊ ငလျင်ဖြစ်ပွားခဲ့သည့် ဒေသများ၌ ကယ်ဆယ်ရေး လုပ်ငန်းများကို ရွပ်ရွပ်ချွံချွံ ဆောင်ရွက်နေမှုများအား ချီးကျူးဂုဏ်ပြုအပ်ပါကြောင်း၊ ငလျင်ကြောင့် အသက်ဆုံးရှုံး ရသူများအနေဖြင့် အေးချမ်းကောင်းမွန်သော ဘဝသို့ ရောက်ရှိပါစေကြောင်းနှင့် ထိခိုက်ဒဏ်ရာရရှိသူများအနေဖြင့် အမြန်ဆုံးပြန်လည် ကျန်းမာလာစေရန် ဆုမွန်ကောင်း တောင်းပါကြောင်း၊ ယခုကဲ့သို့ ခက်ခဲသည့် အချိန်ကာလတွင် မြန်မာပြည်သူများနှင့်အတူတကွ ရပ်တည်လျက်ရှိပါကြောင်းတို့ဖြင့် ဝမ်းနည်းစိတ်မကောင်းမှုများကို အသီးသီးဖော်ပြထားကြကြောင်း သတင်းရရှိသည်။