MT News
၁. ၄. ၂၀၂၅
မြန်မာနိုင်ငံ၌ မတ်လ ၂၈ ရက်တွင် ပြင်းထန်စွာ ငလျင်လှုပ်ခတ်ခဲ့မှုကြောင့် မြန်မာနိုင်ငံအတွင်း ထိခိုက်ပျက်စီးမှုများ ဖြစ်ပေါ်ခဲ့မှုများနှင့်ပတ်သက်၍ အကူအညီများပေးအပ်နိုင်ရေး နိုင်ငံတော်စီမံအုပ်ချုပ် ရေးကောင်စီ ဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင်သည် ယမန်နေ့ညနေပိုင်းတွင် ပါကစ္စတန်နိုင်ငံ ဝန်ကြီးချုပ် H.E. Mr. Mian Muhammad Shahbaz Sharif နှင့် ဖုန်းဖြင့် ဆက်သွယ် ပြောကြားသည်။
ထိုသို့ ပြောကြားရာတွင် ပါကစ္စတန် နိုင်ငံဝန်ကြီးချုပ်က အဆွေတော်တို့ နိုင်ငံတွင် ပြင်းထန်သည့် ငလျင်လှုပ်ခတ်ခဲ့မှုကြောင့် ထိခိုက်ခံစားခဲ့ရမှုများနှင့် ပတ်သက်ပြီး မိမိတို့အနေဖြင့် များစွာ ဝမ်းနည်းမိပါကြောင်းနှင့် မြန်မာပြည်သူများနှင့်အတူ ထပ်တူခံစားမိကြောင်း၊ မြန်မာနိုင်ငံနှင့် မြန်မာပြည်သူများအနေဖြင့် ပြန်လည်ထူထောင်ရေးလုပ်ငန်းများကို အမြန်ဆုံးဆောင်ရွက်နိုင်ပါစေဟု ဆန္ဒပြုအပ်ကြောင်း၊ မကြာမီအချိန်အတွင်း ပါကစ္စတန်အစိုးရနှင့် ပါကစ္စတန် ပြည်သူများက မြန်မာနိုင်ငံအတွက် လူသားချင်းစာနာထောက်ထားမှုဆိုင်ရာ ပစ္စည်း ၃၅ တန်အား လေယာဉ်ခရီးစဉ် နှစ်ခုဖြင့် ပေးပို့သွားမည်ဖြစ်ပြီး ဆက်လက် ၍လည်း ကယ်ဆယ်ရေးပစ္စည်း ၁၇ တန်ကိုလည်း ဆက်လက်ပေးပို့သွားမည်ဖြစ်ကြောင်း၊ မိမိတို့ပါကစ္စတန်အစိုးရအနေဖြင့် အဆွေတော်တို့နိုင်ငံအတွက် ထပ်မံ လိုအပ်သည့် အကူအညီများရှိပါက ဆက်လက်ပေးအပ်သွားမည်ဖြစ်ကြောင်း၊ အဆွေတော်တို့ နိုင်ငံအနေဖြင့် ယခု ကြုံတွေ့နေရသော ခက်ခဲသည့်ကာလကို အမြန်ဆုံးကျော်လွှားနိုင်ပါစေရန် ဆုမွန် တောင်းပါကြောင်း၊ နှစ်နိုင်ငံသည် အတူတကွ ပူးပေါင်း၍ ချစ်ကြည်ရင်းနှီးသည့် ဆက်ဆံရေးကိုထူထောင်ထားသည့် နိုင်ငံများဖြစ်ကြပြီး နောင်အနာဂတ်တွင်လည်း နှစ်နိုင်ငံပူးပေါင်းဆောင်ရွက်မှုများကို ထပ်မံမြှင့်တင်လိုကြောင်း ပြောကြားသည်။
ထို့နောက် နိုင်ငံတော်စီမံအုပ်ချုပ်ရေး ကောင်စီ ဥက္ကဋ္ဌ နိုင်ငံတော်ဝန်ကြီးချုပ်က ယခုကဲ့သို့ မိတ်ဆွေနိုင်ငံတစ်နိုင်ငံမှ ဆက်သွယ်၍ အားပေးစကားပြောကြား ပေးခြင်းနှင့် အကူအညီများ ပေးအပ်သွားမည့်အပေါ်တွင်လည်း မိမိအနေဖြင့် ကျေးဇူးတင်ရှိကြောင်း၊ ဆက်လက်၍လည်း နှစ်ဖက်ပူးပေါင်းဆောင်ရွက်မှုများ ကို အခွင့်အလမ်းများအပေါ် မူတည်ပြီး ဆက်လက်ဆောင်ရွက်သွားမည်ဖြစ်ကြောင်း၊ အဆွေတော်၏ ယခုကဲ့သို့ တယ်လီဖုန်း ဆက်သွယ်ပြောဆိုမှု၊ ပါကစ္စတန်ပြည်သူများ၏ ဝမ်းနည်းကြောင်းဖော်ပြမှုနှင့် ပါကစ္စတန်နိုင်ငံမှ ကူညီကယ်ဆယ်ရေးပစ္စည်းများ ပေးပို့မှု များအတွက်လည်း ကျေးဇူးတင်ရှိသည်ကို ထပ်လောင်းပြောကြားလိုကြောင်း၊ မိမိတို့နှစ်နိုင်ငံသည် ချစ်ကြည်ရင်းနှီးသည့် နိုင်ငံများဖြစ်ကြောင်း၊ အဆွေတော်တို့ နိုင်ငံ၏ ယခုကဲ့သို့ အဖိုးတန်လှသည့် ပြောဆိုဆက်သွယ်မှုနှင့် ကူညီမှုများအပေါ် မိမိအနေဖြင့် တန်ဖိုးထားကြောင်း၊ မိမိတို့နိုင်ငံတွင် ငလျင်ဒဏ်ကြောင့် ယနေ့ (မတ်လ ၃၁ ရက်) နေ့လယ်အထိ သေဆုံးသူ ၂၀၆၅ ဦး ရှိပြီး ဒဏ်ရာရရှိသူ ၃၉၀၀ ကျော်ခန့်ရှိကာ ပျောက်ဆုံးသူ ၂၇၀ ခန့်ရှိကြောင်း၊ ငလျင် လှုပ်ခတ်မှုဖြစ်ပွားသည့် ၂၈ ရက်နေ့သည် သောကြာနေ့ဖြစ်သဖြင့် အစ္စလာမ်ဘာသာအရ ဝတ်ပြုဆုတောင်းသည့်နေ့ဖြစ်သောကြောင့် အချို့ပျက်စီးဆုံးရှုံးမှုများ ဖြစ်ပေါ်ခဲ့ကြောင်း၊ မိမိတို့အနေဖြင့်လည်း ကယ်ဆယ်ရေးလုပ်ငန်းများကို ဆောင်ရွက်လျက်ရှိကြောင်း၊ လူမှုကွန်ရက်များတွင် ဖော်ပြလျက်ရှိသည့် ဗလီများတွင် ဝတ်ပြု ဆုတောင်းနေသည့် အစ္စလာမ်ဘာသာဝင် ၇၀၀ ခန့် သေဆုံးသည်ဆိုသည်မှာ မှန်ကန်မှုမရှိပါကြောင်း၊ ၅၀၀ ပတ်ဝန်းကျင်ခန့်ရှိကြောင်း၊ ကယ်ဆယ်ရေးလုပ်ငန်းများတွင် သေဆုံးသူများ၏ ရုပ်အလောင်း များကိုလည်း ဖော်ထုတ်ရရှိပြီးဖြစ်ပြီး ဆက်လက်၍ လည်း ရှာဖွေကယ်ဆယ်ရေးလုပ်ငန်းများကို ဆောင်ရွက်လျက်ရှိသည်ကို အသိပေးပြောကြားလိုကြောင်း ပြောကြားသည်။
ယင်းနောက် ပါကစ္စတန်နိုင်ငံဝန်ကြီးချုပ်က ယခုကဲ့သို့အဆွေတော်အနေဖြင့် သေဆုံးဒဏ်ရာရရှိမှုများနှင့်ပတ်သက်ပြီး ရှာဖွေကယ်ဆယ်ရေး လုပ်ငန်းများကို စဉ်ဆက်မပြတ် ဆောင်ရွက်နေသည်ကို သိရှိရသည့်အတွက် မိမိတို့၏ ရင်ထဲ အသည်းထဲမှ လှိုက်လှဲစွာအသိအမှတ်ပြုပါကြောင်း၊ ထိခိုက်ခံစားရသည့် ပြည်သူများအနေဖြင့်လည်း အမြန်ဆုံးပြန်လည် ကောင်းမွန်စေရေးအတွက် မိမိတို့ဘုရားရှင်ထံတွင် ဆုတောင်းကြောင်း၊ အဆွေတော်တို့အနေဖြင့် ခက်ခဲနေသည့်အခြေအနေမျိုးတွင် ကြိုးပမ်းဆောင်ရွက်နေမှုများအပေါ် မိမိအနေဖြင့် အသိအမှတ်ပြုသည်ကို ပြောကြားလိုကြောင်း၊ အဆွေတော်တို့အနေဖြင့် ထပ်မံလိုအပ်လာနိုင်သည့် အကူအညီများနှင့်ပတ်သက်၍ လည်း မိမိတို့ထံအချိန်မရွေးဆက်သွယ် ပြောကြားနိုင်ကြောင်း၊ မိမိတို့နိုင်ငံမှ ပေးပို့ထားသည့် ကူညီကယ်ဆယ်ရေး ပစ္စည်းများ၊ ဆေးဝါးများနှင့် အသင့်စား အစားအစာများ အဆွေတော်တို့နိုင်ငံသို့ ၂၄ နာရီအတွင်း ရောက်ရှိအောင် မိမိတို့ အနေဖြင့် စီစဉ်ဆောင်ရွက်ထားကြောင်း ပြောကြားသည်။
ထို့နောက် နိုင်ငံတော်စီမံအုပ်ချုပ်ရေး ကောင်စီဥက္ကဋ္ဌ နိုင်ငံတော်ဝန်ကြီးချုပ်က အဆွေတော်နှင့် ပါကစ္စတန်ပြည်သူများ အနေဖြင့် စာနာထောက်ထားမှုများ ပေးပို့ သည့်အတွက် ကျေးဇူးတင်ရှိပါကြောင်း၊ ငလျင်ဒဏ်ခံရသည့် ပြည်သူများအတွက် အထောက်အကူပြုပစ္စည်းများ ပေးပို့သည့် အတွက်ကျေးဇူးတင်ရှိသည်ကိုထပ်လောင်း ပြောကြားလိုကြောင်း၊ မိမိတို့နှစ်နိုင်ငံ အနေဖြင့် မိတ်ဆွေနိုင်ငံများဖြစ်သဖြင့် ပူးပေါင်းဆောင်ရွက်မှုများကို ဆက်လက် မြှင့်တင်ဆောင်ရွက်သွားမည်ဖြစ်ကြောင်း၊ ယခုကဲ့သို့ ဆက်သွယ်အားပေးစကား ပြောကြားမှုများအတွက်လည်း ကျေးဇူး တင်ရှိကြောင်း ပြောကြားခဲ့ကြောင်း သိရသည်။
