၃၁. ၃. ၂၀၂၅
Written by Thettant
ငလျင်စတင်လှုပ်ခတ်သည့်နေ့မှ သုံးရက်အတွင်း မန္တလေးတိုင်းဒေသကြီးတွင် လူဦးရေ ၄၀၃ ဦးကို အသက်ရှင်လျက် ကယ်ထုတ်နိုင်ခဲ့သော်လည်း ၂၅၉ ဦးကိုမူ အလောင်းအဖြစ်သာ ကယ်ထုတ်ခဲ့ရရှာသည်ဟု မီးသတ်ဦးစီးဌာနက သိရသည်။
မန္တလေးတိုင်းဒေသကြီးအတွင်း ငလျင်လှုပ်ခတ်မှုကြောင့် အဆောက်အဦထိခိုက်ပျက်စီးမှုများတွင် မြန်မာနိုင်ငံမီးသတ်တပ်ဖွဲ့မှ ရှာဖွေကယ်ဆယ်ရေးတပ်ဖွဲ့ဝင်များ၊ တရုတ်နိုင်ငံမှ ရှာဖွေကယ်ဆယ်ရေးတပ်ဖွဲ့ဝင်များ၊ ရုရှားနိုင်ငံမှ ရှာဖွေကယ်ဆယ်ရေးတပ်ဖွဲ့ဝင်များနှင့် အိန္ဒိယနိုင်ငံမှ ရှာဖွေကယ်ဆယ်ရေးတပ်ဖွဲ့ဝင်များ ပူးပေါင်း၍ ရှာဖွေကယ်ဆယ်ရေးလုပ်ငန်းများ ဆောင်ရွက်ခဲ့ရာ ယနေ့ မတ်လ ၃၁ ရက်နေ့တွင် အမျိုးသမီး (၅)ဦးအား အသက်ရှင်လျက်ကယ်ထုတ်နိုင်ခဲ့ပြီး သေဆုံးသူ အမျိုးသား (၁၆)ဦး၊ အမျိုးသမီး(၁၁)ဦး၊ စုစုပေါင်း (၂၇)ဦး၏ ရုပ်အလောင်းများအား ထုတ်ယူနိုင်ခဲ့သည်။
စတင်ဖြစ်ပွားအချိန်မှာ ယခုအချိန်ထိ မန္တလေးတိုင်းဒေသကြီးအတွင်း စုစုပေါင်းလူဦးရေ (၄၀၃)ဦးအား အသက်ရှင်လျက်ကယ်ထုတ်နိုင်ခဲ့ပြီး သေဆုံးသူ (၂၅၉)ဦး၏ ရုပ်အလောင်းများကို ထုတ်ယူနိုင်ခဲ့သည်ဟု သိရသည်။
ယနေ့ နေ့လယ် ၁၂ နာရီအထိ နောက်ဆုံးရရှိထားသည့် စာရင်းများအရ ငလျင်ဒဏ်ကြောင့် သေဆုံးသူ ၂,၀၀၀ ကျော်၊ ဒဏရာရရှိသူ ၃,၉၀၀ ကျော်နှင့် ပျောက်ဆုံးနေသူ ၂၇၀ နီးပါးရှိကြောင်း နိုင်ငံတော်စီမံအုပ်ချုပ်ရေးကောင်စီ သတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းက ယနေ့ ညနေပိုင်းတွင် ပြောကြားသည်။
