၃၁.၃.၂၀၂၅
Written by Nyein Kyaw
ငလျင်ဒဏ်သင့်ဒေသများသို့ စေတနာရှင် ပြည်သူများက လှူဒါန်းငွေများအတွက် ဘဏ်စာရင်းနှင့် မိုဘိုင်းငွေကြေးဝန်ဆောင်မှုအားလုံး ငွေလွှဲခ ကင်းလွတ်ခွင့်ပြုပေးသွားမည်ဖြစ်ကြောင်း မြန်မာနိုင်ငံတော်ဗဟိုဘဏ်မှ အသိပေးကြေညာထားသည်။
မတ်လ ၂၈ ရက်တွင် ဖြစ်ပွားခဲ့သည့် ငလျင်ဒဏ်သင့်ဒေသများသို့ စေတနာရှင်ပြည်သူများက လှူဒါန်းငွေများအား မြန်မာ့စီးပွားရေးဘဏ်၊ နေပြည်တော်တွင် ဖွင့်လှစ်ထားသည့် အမျိုးသားသဘာဝဘေးအန္တရာယ်ဆိုင်ရာ စီမံခန့်ခွဲမှုရန်ပုံငွေ (OA-011834)စာရင်း၊ ရန်ကုန်မြို့၊ မြန်မာ့နိုင်ငံခြား ကုန်သွယ်မှုဘဏ်တွင် ဖွင့်လှစ်ထားသည့် နိုင်ငံခြားငွေစာရင်းအမှတ်၊ (0111284000000063) နှင့် မြန်မာ့စီးပွားရေး ဘဏ်၊ နေပြည်တော်ရှိ နိုင်ငံခြားငွေစာရင်းအမှတ် (EDN-600018) သို့ လှူဒါန်းနိုင်ကြောင်း အသိပေးထားသည်။
အဆိုပါ ဘဏ်စာရင်းများသို့ အများပြည်သူမှ မြန်မာ ကျပ်ငွေဖြင့် လှူဒါန်းလိုပါက ဘဏ်ကောင်တာမှတစ်ဆင့် ငွေသားဖြင့်တိုက်ရိုက်ဖြစ်စေ၊ အခြားဘဏ်များမှတစ်ဆင့် စာရင်းပြောင်းနည်း Account Transfer ဖြင့်ဖြစ်စေ၊ Mobile Application တစ်ဆင့် Mobile Payment ဖြင့် ဖြစ်စေ၊ MPU အပါအဝင်အခြား Electronic Card များဖြင့်ဖြစ်စေ Account ထည့်ဝင် လှူဒါန်းနိုင်မည်ဖြစ်သည်။
နိုင်ငံခြားငွေဖြင့် လှူဒါန်းလိုပါက နိုင်ငံခြားငွေ ရောင်းဝယ်ဖောက်ကားခွင့် လုပ်ငန်းလိုင်စင်ရရှိထားသည့် AD လိုင်စင်ရဘဏ်များမှ တစ်ဆင့် မည်သည့် နိုင်ငံခြားငွေအမျိုးအစားကိုမဆို လှူဒါန်းနိုင်မည်ဖြစ်သည်။
အများပြည်သူတို့၏ အလှူငွေများကို ဘဏ်များ၊ AD လိုင်စင်ရဘဏ်များ၊ မိုဘိုင်ငွေရေးကြေးရေး ဝန်ဆောင်မှုပေးသည့် အဖွဲ့အစည်းများအနေဖြင့် ငွေလွှဲခကောက်ခံခြင်းမပြုဘဲ ကူညီဆောင်ရွက်ပေးသွားမည်ဖြစ်ကြောင်း အကြောင်းကြား အသိပေးထားသည်။
