၃၁.၃.၂၀၂၅
Written by Nyein Kyaw
ငလျင်လှုပ်ခတ်မှုကြောင့် အသက်ဆုံးရှုံးမှုနှင့် ပျက်စီးဆုံးရှုံးခဲ့ရမှုများအတွက် ဧပြီ ၁ ရက် (မနက်ဖြန်) မြန်မာစံတော်ချိန် ၁၂ နာရီ ၅၁ မိနစ်၊ ၀၂ စက္ကန့်တွင် နိုင်ငံတော်အဆင့် ဝမ်းနည်းခြင်းအထိမ်းအမှတ် နိုင်ငံတော်အလံ တိုင်ဝက်လျှော့ချလွှင့်ထူခြင်း၊ လှုပ်ရှားသွားလာနေသူများ တစ်မိနစ်ငြိမ်သက်စွာ ရပ်တန့် ဦးညွတ်ဂါရဝပြုခြင်း၊ ဥဩဆွဲဂါဝရပြုခြင်း အပါအဝင် အစီအစဉ် ငါးရပ်ဖြင့် တစ်နိုင်လုံးအတိုင်းအတာအရ ပါဝင်ဆောင်ရွက်ရန် SAC သတင်းထုတ်ပြန်ရေးအဖွဲ့က ယနေ့ ညနေပိုင်းတွင် ထပ်မံ အသိပေးထုတ်ပြန်ထားသည်။
၂၀၂၅ ခုနှစ်၊ မတ်လ ၂၈ ရက် မြန်မာစံတော်ချိန် ၁၂ နာရီ ၅၁ မိနစ်၊ ၀၂ စက္ကန့် တွင် ပြင်းအား ၇ ဒသမ ၇ ရစ်ချ်တာစကေးရှိ အလွန်ပြင်းထန်သည့် မြေငလျင်လှုပ်ခတ်ခဲ့မှုကြောင့် အသက်ဆုံးရှုံးမှုများနှင့် ပျက်စီးဆုံးရှုံးခဲ့ရမှုများအတွက် စာနာနားလည်မှုများနှင့်အတူ ထပ်တူခံစားလျက် နိုင်ငံတော်အဆင့် ဝမ်းနည်းခြင်းအထိမ်းအမှတ်နေ့ ရက်အဖြစ် ၂၀၂၅ ခုနှစ မတ်လ ၃၁ ရက် (ယနေ့)မှ ဧပြီလ ၆ ရက်အထိ (၇) ရက်အား နိုင်ငံတော် စီမံအုပ်ချုပ်ရေးကောင်စီဥက္ကဋ္ဌ က သတ်မှတ်ကြေညာခဲ့ပြီးဖြစ်သည်။
နိုင်ငံတော်အဆင့် ဝမ်းနည်းခြင်းအထိမ်းအမှတ်နေ့ရက် တစ်နိုင်ငံလုံးအတိုင်း အတာလှုပ်ရှားမှုအဖြစ် ၂၀၂၅ ခုနှစ်၊ ဧပြီ လ ၁ ရက်နေ့၊ မြန်မာစံတော်ချိန် ၁၂ နာရီ ၅၁ မိနစ်၊ ၀၂ စက္ကန့်တွင် ဝမ်းနည်းအထိမ်းအမှတ်အား အောက်ပါ အစီအစဉ်အတိုင်း ပြုလုပ်သွားမည်ဖြစ်သည်။
(က) နိုင်ငံတော်အဆင့် ဝမ်းနည်းခြင်းအထိမ်းအမှတ်အဖြစ် နိုင်ငံတော်အလံအား တိုင်ဝက်လျှော့ချ၍လွှင့်ထူထားသော အလံတိုင်ရှေ့(သို့မဟုတ်) သင့်လျော်ရာနေရာ (သို့မဟုတ်) ပြုလုပ်နေသည့်အခမ်းအနားများ၌ ဝမ်းနည်းခြင်းအထိမ်းအမှတ်အဖြစ် တစ်မိနစ်ငြိမ်သက်၍ ဦးညွတ်ဂါရဝပြုခြင်း။
(ခ) လှုပ်ရှားသွားလာနေသူများအနေဖြင့် ၎င်းအချိန်တွင် တစ်မိနစ်ငြိမ်သက်စွာ ရပ်တန့်၍ ဦးညွတ်ဂါရဝပြုခြင်း။
(ဂ) ၎င်းအချိန်တွင် ဝမ်းနည်းခြင်းအထိမ်းအမှတ်အနေဖြင့် ဥဩဆွဲ ဂါရဝပြု ခြင်း။
(ဃ) ၎င်းအချိန်တွင် မီဒီယာများအနေဖြင့် ထုတ်လွှင့်လျက်ရှိသည့် အစီအစဉ်များအား ခေတ္တရပ်ဆိုင်း၍ ဝမ်းနည်းခြင်းအထိမ်းအမှတ် Logo များအား ထုတ်လွှင့်ခြင်း။
(င) သက်ဆိုင်ရာ ကိုးကွယ်ရာဘာသာအလိုက် ဘုရားစေတီများ၊ ဘုရားကျောင်းများ၊ ဝတ်ပြုနေရာများတွင် ဆုတောင်းမေတ္တာပို့သခြင်း၊အန္တရာယ်ကင်း ပရိတ်များ၊ ဆုတောင်းစာများ ရွတ်ဆိုခြင်းနှင့် အမျှအတန်း ပေးဝေခြင်း။
အထက်ပါအစီအစဉ်များကို တစ်နိုင်ငံလုံးအတိုင်းအတာဖြင့် ပြုလုပ်သွားမည် ဖြစ်ပါသဖြင့် နိုင်ငံတော်အဆင့် ဝမ်းနည်းခြင်းအထိမ်းအမှတ်နေ့ရက် တစ်နိုင်ငံလုံး အတိုင်းအတာ လှုပ်ရှားမှုကို တစ်နိုင်ငံလုံးမှ ပါဝင်ဆောင်ရွက်ပေးနိုင်ပါရန် SACသတင်းထုတ်ပြန်ရေးအဖွဲ့မှ သတင်းထုတ်ပြန်ထားသည်။
