၃၁.၃.၂၀၂၅
Written by Nyein Kyaw
ယနေ့ နေ့လယ် ၁၂ နာရီအထိ နောက်ဆုံးရရှိထားသည့် စာရင်းများအရ ငလျင်ဒဏ်ကြောင့် သေဆုံးသူ ၂,၀၀၀ ကျော်၊ ဒဏရာရရှိသူ ၃,၉၀၀ ကျော်နှင့် ပျောက်ဆုံးနေသူ ၂၇၀ နီးပါးရှိကြောင်း နိုင်ငံတော်စီမံအုပ်ချုပ်ရေးကောင်စီ သတင်းထြတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းက ယနေ့ ညနေပိုင်းတွင် ပြောကြားသည်။
”ဒီနေ့ နေ့လယ် ၁၂ နာရီအချိန် ရရှိထားတဲ့သတင်းများအရ ပြင်းထန်စွာ ငလျင်လှုပ်ရှားမှုကြောင့် တစ်နိုင်ငံလုံးအတိုင်းအတာနဲ့ သေဆုံးသူ ၂,၀၅၆ ဦးရှိခဲ့ပါတယ်။ ဒဏ်ရာရရှိသူ ၃,၉၀၀ ကျော်နဲ့ ပျောက်ဆုံးသူ ၂၇၀ နီးပါးရှိပါတယ်။ ကူညီကယ်ဆယ်ရေးလုပ်ငန်းများ ဆက်လက်ဆောင်ရွက်ပေးလျက်ရှိပါတယ်” ဟု ဗိုလ်ချုပ်ဇော်မင်းထွန်းက ပြောကြားသည်။
မြန်မာ့ငလျင်ဘေးကို ကူညီကယ်ဆယ်ပေးကြသည့် ကူညီကယ်ဆယ်ရေးအဖွဲ့များနှင့် ကူညီကယ်ဆယ်ရေးအဖွဲ့များ စေလွှတ်ပေးကြသည့် တရုတ်နိုင်ငံ၊ အိန္ဒိယနိုင်ငံ၊ ရုရှားနိုင်ငံ၊ အာဆီယံအဖွဲ့ဝင်နိုင်ငံများ အားလုံးကို ကျေးဇူးတင်ရှိကြောင်း ဗိုလ်ချုပ်ဇော်မင်းထွန်းက ယနေ့ နံနက်ပိုင်းတွင် ပြောကြားထားသည်။
နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ၊ နိုင်ငံတော်ဝန်ကြီးချုပ်၏ မန္တလေးဒေသခရီးစဉ်၊ နေပြည်တော်အတွင်း ခရီးစဉ်များတွင် ကူညီကယ်ဆယ်ရေးအဖွဲ့ဝင်များ၏ အခက်အခဲများကိုလည်း တွေ့ဆုံမေးမြန်းခဲ့ကြောင်း ဗိုလ်ချုပ်ဇော်မင်းထွန်းက ပြောကြားသည်။
