၃၁.၃.၂၀၂၅
Written By Zun
မြန်မာ့ငလျင်ဘေးကူညီရန် ကနဦး လေ့လာရေး ဂျပန်နိုင်ငံမှ JICA ဝန်ထမ်းနှင့် ဆေးဘက်ဆိုင်ရာပညာရှင်များပါ အဖွဲ့ဝင် ၅ ဦး မြန်မာနိုင်ငံသို့ ယနေ့ မတ်လ ၃၁ ရက်တွင် ရောက်ရှိပြီ ဖြစ်ကြောင်း သိရသည်။
ပြီးခဲ့သည့် မတ်လ ၂၈ ရက်တွင် မြန်မာနိုင်ငံ၌ လှုပ်ခတ်ခဲ့သော ငလျင်ကြောင့် ဖြစ်ပေါ်ခဲ့သည့် မြောက်များစွာသော ထိခိုက်ပျက်စီးမှုများကို ကူညီဆောင်ရွက်ရန် ဂျပန်အပြည်ပြည်ဆိုင်ရာ ပူးပေါင်းဆောင်ရွက်ရေးအေဂျင်စီ (JICA) မှတစ်ဆင့် သဘာဝဘေးအန္တရာယ်ကူညီကယ်ဆယ် ရေးဆိုင်ရာ ကျွမ်းကျင်ပညာရှင်များအဖွဲ့ကို ကနဦး အနေဖြင့် မြန်မာနိုင်ငံသို့စေလွှတ်ရန် မတ်လ ၃၀ ရက်တွင် ဂျပန်နိုင်ငံအစိုးရက ဆုံးဖြတ်ခဲ့ခြင်း ဖြစ်ကြောင်း သိရသည်။
ယခု ရောက်ရှိနေသော JICA ဝန်ထမ်းနှင့် ဆေးဘက်ဆိုင်ရာပညာရှင်များအပါအဝင် အဖွဲ့ဝင် ၅ ဦးတို့က လက်ရှိမြေပြင်အခြေအနေလိုအပ်ချက်များနှင့် လုံခြုံရေးအခြေအနေများကို ကြည့်ရှုသုံး သပ်ပြီးနောက် သဘာဝဘေးအန္တရာယ်ဆိုင်ရာအရေးပေါ်ကယ်ဆယ်ရေးအဖွဲ့ (JDR) ကို စေလွှတ်ရေးအတွက် ညှိနှိုင်း ဆောင်ရွက်မှုများ လုပ်ဆောင်သွားမည်ဖြစ်ကြောင်း သိရသည်။
ထို့အပြင် ဂျပန်အစိုးရအနေဖြင့် ငလျင်ဒဏ်သင့်ပြည်သူများအတွက် အခြေခံလိုအပ်သော ပစ္စည်းများအပါအဝင် အရေးပေါ်ကူညီကယ်ဆယ်ရေးဆိုင်ရာပစ္စည်းများကို JICA မှတစ်ဆင့် ထောက်ပံ့ပေးအပ်ရန် ဆုံးဖြတ်ထားကြောင်းလည်း သိရသည်။
ဂျပန်နိုင်ငံအစိုးရက လူသားချင်းစာနာထောက်ထားသည့်အနေဖြင့်လည်းကောင်း၊ မြန်မာနိုင်ငံသူနိုင်ငံသားများနှင့် ချစ်ကြည်ရင်းနှီးသောဆက်ဆံရေးအရလည်းကောင်း ငလျင် ဒဏ်သင့်ပြည်သူများအတွက် အရေးပေါ် ကူညီကယ်ဆယ်ထောက်ပံ့ရေးကို လုပ်ဆောင်ရန် ဆုံးဖြတ်ခဲ့ခြင်းဖြစ်ကြောင်း ဒေသတွင်းသတင်းများတွင် ရေးသားနေကြသည်။
