MT News
၃၁. ၃. ၂၀၂၅
စစ်ကိုင်းငလျင်ကြောင့် စစ်ကိုင်းမြို့ရှိ သကျဓီတာသီလရှင်စာသင်တိုက်မှ ပဓာနနာယက သီလရှင်ဆရာတော်ကြီးတစ်ပါးအပါအဝင် ၉ ဦး သေပျောက်ခဲ့ရသည်။
မတ်လ ၂၈ ရက်က ဖြစ်ပွားခဲ့သော အင်အားပြင်းစစ်ကိုင်းငလျင်ကြောင့် သကျဓီတာသီလရှင်စာသင်တိုက်မှ ပဓာနနာယကဆရာကြီး ၁ ပါး၊ အကျိုးဆောင်နာယကစာချဆရာ ၂ ပါး၊ စာသင်သား ဆရာလေး ၃ ပါးနှင့် ကျောင်းအစ်မအလှူရှင် ၃ဦး စုစုပေါင်း ၉ ဦး သေပျောက်ပျက်စီးမှုရှိခဲ့သည်။
ထို့အပြင် တိုက်အုပ်နာယကဆရာကြီး ဒေါ်ပဝနထေရီနှင့် ဒေါ်ကုသလဝတီ ၂ ပါး ဒဏ်ရာပြင်းထန်စွာရရှိမှုများအတွက် (အသက်အန္တရာယ်စိုးရိမ်ဖွယ်မရှိ) လက်ရှိဆေးကုသမှုခံယူလျှက်ရှိနေပြီး ကျန်ရှိဆရာလေးများအားလုံး ဘေးအန္တရာယ် ကင်းရှင်းလုံခြုံကြကြောင်း သိရသည်။
ကျောင်းတိုက်အဆောက်အဦများမှာလည်း ဇမ္ဗူဒီပစာကြည့်တိုက်နှင့် ခိုင်ယဉ်နာယကစံကျောင်းဆောင် ၂ ဆောင် လုံးဝပြိုကျပျက်စီးပြီး ဘုရား ၂ ဆူနှင့် ကျန်ကျောင်းဆောင် ၈ ဆောင် အက်ကွဲပျက်စီး၍ အားလုံးနေထိုင်ရန်အန္တရာယ်ရှိသော အနေအထားဖြစ်သည်။
ယခုအခါ ပြန်လည်ထူထောင်ရေးအတွက် ဖွဲ့စည်းပုံများ ပုံမှန်ပြန်လည်လည်ပတ်နိုင်ရန် ကျေးဇူးတော်ရှင်ဆရာတော်ဘုရားကြီးများ၏ အကြံပြုလမ်းညွှန်မှု၊ အားပေးစောင့်ရှောက်မှုများနှင့် ပြည်တွင်းပြည်ပ စေတနာရှင်များနှင့် ဌာနဆိုင်ရာအသီးသီးတို့၏ ဝိုင်းဝန်းအားပေးကူညီဖြည့်ဆည်းမှုများ ပံ့ပိုးမှုများဖြင့် ကြိုးစားဆောင်ရွက်လျှက်ရှိနေကြောင်း သကျဓီတာသီလရှင်စာသင်တိုက်၊ သတင်းနှင့်ပြန်ကြားရေးအဖွဲ့က အသိပေးထားသည်။
