၃၁. ၃. ၂၀၂၅
Written by Nyein Kyaw
လက်ရှိနောက်ဆုံးရရှိသော စာရင်းများအရ ငလျင်ဒဏ်ကြောင့် သေဆုံးသူ ၁,၇၀၀ ကျော်၊ ဒဏ်ရာရရှိသူ ၃,၄၀၀ ကျော်နှင့် ပျောက်ဆုံးသူ ၃၀၀ ကျော်အထိရှိလာကြောင်းနှင့် ဒဏ်ရာရရှိသူများကို ကြိုးစားကုသပေးနေသလို ပျောက်ဆုံးသူများကိုလည်း ဆက်လက်ရှာဖွေနေကြောင်း နိုင်ငံတော်စီမံအုပ်ချုပ်ရေးကောင်စီ၏ သတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းက ပြောကြားသည်။
“နောက်ဆုံးရရှိတဲ့ သေဆုံးဒဏ်ရာရ၊ ပျောက်ဆုံးစာရင်းများ ပြောပေးပါမယ်။ သေဆုံးသူအနေနဲ့ ၁,၇၀၀ ကျော်ရှိပါတယ်။ ဒဏ်ရာရရှိသူ ၃,၄၀၀ ကျော်ရှိပါတယ်။ ပျောက်ဆုံးနေသူ ၃၀၀ ကျော်ရှိပါတယ်။ ဒဏ်ရာရရှိသူများကို ကျွန်တော်တို့ ကြိုးစားပြီး ကုသပေးလျက်ရှိပါတယ်။ ပျောက်ဆုံးနေသူများကိုလည်း ဆက်လက်ရှာဖွေလျက်ရှိပါတယ်” ဟု ဗိုလ်ချုပ်ဇော်မင်းထွန်းက ပြောကြားသည်။
မြန်မာ့ငလျင်ဘေးကို ကူညီကယ်ဆယ်ပေးကြသည့် ကူညီကယ်ဆယ်ရေးအဖွဲ့များနှင့် ကူညီကယ်ဆယ်ရေးအဖွဲ့များ စေလွှတ်ပေးကြသည့် တရုတ်နိုင်ငံ၊ အိန္ဒိယနိုင်ငံ၊ ရုရှားနိုင်ငံ၊ အာဆီယံအဖွဲ့ဝင်နိုင်ငံများ အားလုံးကို ကျေးဇူးတင်ရှိကြောင်း ဗိုလ်ချုပ်ဇော်မင်းထွန်းက ပြောကြားသည်။
နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ၊ နိုင်ငံတော်ဝန်ကြီးချုပ်၏ မန္တလေးဒေသခရီးစဉ်၊ နေပြည်တော်အတွင်း ခရီးစဉ်များတွင် ကူညီကယ်ဆယ်ရေးအဖွဲ့ဝင်များ၏ အခက်အခဲများကိုလည်း တွေ့ဆုံမေးမြန်းခဲ့ကြောင်း ဗိုလ်ချုပ်ဇော်မင်းထွန်းက ပြောကြားသည်။
“ကျန်းမာရေးဆိုင်ရာ သတိပေးချက်များနဲ့ ပတ်သက်ပြီးတော့ နံပါတ် (၁) အချက်အနေနဲ့ နောက်ဆက်တွဲ ဖြစ်ပေါ်လာနိုင်တဲ့ ကျန်းမာရေးဆိုင်ရာကိစ္စရပ်များဖြစ်ပါတယ်။ ကူညီကယ်ဆယ်ရေးအဖွဲ့များအနေနဲ့ ကျွန်တော်တို့ စွန့်စွန့်စားစား ဆောင်ရွက်နေတာတွေ့ရပါတယ်။ Dead body များကိုလည်း သူတို့ကိုင်တွယ်ရတာတွေရှိတယ်။ ဖော်ရတာတွေရှိတယ်။ အသက်ရှင်ကျန်ရစ်သူများကိုလည်း ကြိုးစားပမ်းစား ဆောင်ရွက်ပေးနေတာတွေရှိပါတယ်။ ဒါနဲ့ပတ်သက်ပြီးတော့လည်း သန့်ရှင်းမှုအဓိကလုပ်ဖို့အရေးကြီးပါတယ်” ဟု ဗိုလ်ချုပ်ဇော်မင်းထွန်းက ပြောကြားသည်။
