ထိုင်ဝမ်က အကူအညီကို မြန်မာအစိုးရ လက်မခံလို့ ဘာကြောင့် သတင်းမှားဖြန့်ဝေနေသလဲ

၃၀. ၃. ၂၀၂၅
Written by Phyo Wei

ထိုင်ဝမ်က အကူအညီကို မြန်မာအစိုးရ လက်မခံဘဲ အဝင်မခံဘူးလို့ လူမှုကွန်ရက်မှာ သတင်းမှားဖြန့်ဝေနေကြတာ၊ မှားမှန်ရောထွေး ဖြန့်ဝေရေးသားနေတာကြတာ တွေ့ရပါတယ်။

ဒီသတင်းမှားကို NLD, CRPH,NUG နဲ့ PDF ထောက်ခံတဲ့ ထောက်ပို့လူတစ်စုက တင်နေကြတာဖြစ်ပြီး ဒီသတင်းမှာ ထိုင်ဝမ်ရှင်းကွမ်းကုမ္ပဏီကနေ မြန်မာပြည်ရုံးခွဲကတစ်ဆင့် ဒေါ်လာတစ်သိန်းလှူတာကို လက်ခံထားပေမဲ့ လူ ၁၂၀ ပါဝင်တဲ့ ထိုင်ဝမ် ကယ်ဆယ်ရေးအဖွဲ့ကိုတော့ လက်မခံဘူးလို့ ရေးသားနေတာဖြစ်ပါတယ်။

ဒီနေရာမှာ သတင်းနှစ်ပုဒ်ကို ရောထွေးရေးသားထားတာ တွေ့ရပြီး Shin Kong Hospital က မနေ့က ထုတ်ပြန်ရာမှာ “မြန်မာနိုင်ငံ စစ်ကိုင်းတိုင်းမြို့ကို မတ်လ ၂၈ ရက်နေ့ မွန်းလွဲ ၁၂ နာရီ ၅၂ မိနစ်အချိန် ဗဟိုပြု၍ ၇ ဒသမ ၇ အဆင့်ရှိ ပြင်းထန်သောငလျင်လူပ်ခတ်ခဲ့သည်။
ငလျင်ဒဏ်အထိခိုက်ဆုံးဖြစ်ပြီးနောက် ရှင်းကွမ်းဆေးရုံတာဝန်ရှိသူများက ဦးဆုံးမြန်မာနိုင်ငံရှိ Taipei Economic And Culture Office မှတာဝန်ရှိသူများနှင့် ဆက်သွယ်ပြီး ငလျင်ဘေးဒဏ်သင့်သောဒေသရှိ ပြည်သူများအတွက် မည်သည့်နည်းလမ်းဖြစ်စေ Taiwan Can Help လူသားချင်းစာနာသောစိတ်ဓာတ်ဖြင့်ဆောင်ရွက်ရန် ကယ်ဆယ်ရေးလုပ်သားများ စားနပ်ရိက္ခာ ဆေးဝါးပစ္စည်းများ စသည့် အထောက်အကူပြုပစ္စည်းများ ကူညီထောက်ပံ့ရန်အဆင့်သင့်ရှိကြောင်း၊ ရှင်းကွမ်းဆေးရုံသာမက ရှင်းကွမ်းအာမခံဖောင်ဒေရှင်းမှလည်း ၎င်းဒေသတွင်ဖြစ်ပွားနေသောအခြေအနေကိုလေ့လာပြီး ကူညီထောက်ပံ့ရန်လိုအပ်ပါကလည်း ချက်ချင်းဆောင်ရွက်သွားမည်ဖြစ်ကြောင်းကိုလည်း ရှင်းကွမ်းဆေးရုံဒုဆေးရုံအုပ် Hung,Tzu-Jenမှ ပြောကြားခဲ့သည်။ ရှင်းကွမ်းဆေးရုံမှ ညနေပိုင်းတွင် ရှင်းကွမ်းဆေးရုံဥက္ကဌ Eugene Wu ၊ ရှင်းကွမ်းဆေးရုံအုပ် Hou Sheng-Mao နှင့် ရှင်းကွမ်းဒုဆေးရုံအုပ် Hung,Tzu-Jen တို့မှ အမေရိကန်ဒေါ်လာ ၁ သိန်းနှင့် ညီမျှသော ထိုင်ဝမ်ဒေါ်လာသိန်း ၃၀ တန်ဖိုးရှိသော ဆေးဝါးရိက္ခာပစ္စည်းများကို မြန်မာနိုင်ငံရှိ ငလျင်ဘေးသင့်ဒဏ် ဒေသပြည်သူများဆီသို့ လူသားချင်းစာနာမူဖြင့် ချက်ချင်းကူညီထောက်ပံ့နိုင်ရန် အတူတကွဆုံးဖြတ်ခဲ့ကြတယ်”လို့ ထုတ်ပြန် ရေးသားဖော်ပြခဲ့တာပါ။

ရှင်းကွမ်းအုပ်စုဟာ ပုဂ္ဂလိကလုပ်ငန်းစုသာဖြစ်သလို မြန်မာနိုင်ငံမှာလည်း မြှုပ်နှံနေတာမို့လို့ သူတို့အလှူဟာ နိုင်ငံရေးအမြတ်ထုတ်တာ မပါဝင်ဘဲ လိုအပ်တဲ့နေရာ လိုအပ်သလို သူတို့လုပ်ငန်းစုသဘောနဲ့သာ လှူတာဖြစ်ပါတယ်။

အခြားတစ်ဖက်မှာ Focus Taiwan က မတ်လ ၂၈ ရက်မှာပဲ သတင်းဖော်ပြခဲ့ရာမှာ ထိုင်ဝမ် အမျိုးသား မီးသတ်ဦးစီးဌာန (NFA) က လူအင်အား ၁၂၀ ဦးပါ အရေးပေါ်ကယ်ဆယ်ရေးအဖွဲ့ဟာ မတ်လ ၂၈ ရက် မွန်းလွဲပိုင်းမှာ မြန်မာနိုင်ငံ အလယ်ပိုင်းကို လှုပ်ခတ်သွားတဲ့ ပြင်းအား ၇ ဒသမ ၇ ရှိ ငလျင်ကြောင့် ဖြစ်ပေါ်လာနိုင်တဲ့ အခြေအနေတွေ အတွက် အသင့်အနေအထားမှာ ရှိနေတယ်လို့ ပြောခဲ့ပြီး ကယ်ဆယ်ရေးဝန်ထမ်းတွေအပြင် အဲဒီအဖွဲ့မှာ ဆရာဝန် ၅ ဦး၊ သူနာပြု ၇ ဦး၊ တိရစ္ဆာန်ဆရာဝန် ၁ ဦး၊ ရှာဖွေကယ်ဆယ်ရေးခွေး ၆ ကောင်နဲ့ တန်ချိန် ၁၅ တန်ရှိတဲ့ စက်ကိရိယာတွေ ပါဝင်တယ်လို့ပြောခဲ့သလို ထိုင်ဝမ်သမ္မတနဲ့ ဝန်ကြီးချုပ်တို့ နှစ်ဦးစလုံးက သူတို့ ဖေ့စ်ဘွတ်ခ်စာမျက်နှာတွေမှာ သဘာဝဘေးအန္တရာယ်နဲ့ ပတ်သက်လို့ စိုးရိမ်ကြောင်း၊ အကူအညီတောင်းခံလာရင် ကယ်ဆယ်ရေးအဖွဲ့က တုံ့ပြန်ဖို့ အဆင်သင့်ရှိကြောင်း သောကြာနေ့ ည ၈ နာရီအထိ ထိုင်ဝမ်သို့ အကူအညီတောင်းခံမှု တစ်စုံတစ်ရာ ရောက်ရှိလာခြင်း မရှိသေးကြောင်း ဖော်ပြခဲ့တာ တွေ့ရပါတယ်။

ကမ္ဘာပေါ်မှာ နိုင်ငံပေါင်း ၂၀၀ နီးပါးရှိရာမှာ မြန်မာအစိုးရဟာ ငလျင်ဘေးအတွက် နိုင်ငံတကာကို အကူအညီတောင်းခံထားပြီး တစ်နိုင်ငံချင်းကိုတော့ ဒီကာလမှာ တောင်းခံတာမျိုး မရှိပါဘူး။ ဘယ်လိုနိုင်ငံမျိုးက သဘာဝဘေးကြုံကြုံ နိုင်ငံကြီးတွေကိုပဲ တချို့နိုင်ငံတွေက အမည်တပ်တောင်းဆိုတာကလွဲရင် နိုင်ငံပေါင်းစိကို စာပို့၊ ဖုန်းဆက်၊ သဝဏ်လွှာပို့ အကူအညီတောင်းခံတယ်ဆိုတာက သံတမန်လောကမှာလည်း အစဥ်အလာမရှိပါဘူး။

ဒီလိုမျိုး မရှိတဲ့အထဲမှာ တရုတ်တစ်နိုင်ငံတည်းမူဝါဒကို NLD အစိုးရဟောင်းအပါအဝင် အစိုးရအဆက်ဆက်က လက်ခံထားတဲ့ပြင် “တရုတ်တစ်နိုင်ငံတည်းမူကို လက်ခံကြောင်း” နိုင်ငံတော်အဆင့် စာထုတ်ထားတဲ့ နိုင်ငံတွေအဖို့တော့ ပိုပြီးတော့တောင် “ထိုင်ဝမ်နိုင်ငံရဲ့ အကူအညီကို မြန်မာနိုင်ငံက လက်ခံ”တယ်ဆိုတာမျိုးကို ပိုပြီးတော့ လုပ်လို့မရပါဘူး။

ဒါဟာ ချစ်ကြည်ရင်းနှီးမှုရှိနေတဲ့ တရုတ် – မြန်မာ ဆက်ဆံရေးနဲ့ တရုတ်တစ်နိုင်ငံတည်းမူဝါဒအပေါ် အမြဲထောက်ခံပေးခဲ့တဲ့ မြန်မာနိုင်ငံအပေါ် ထိုင်ဝမ်ရဲ့ နိုင်ငံရေးကစားကွက်ပါ။ ထိုင်ဝမ်အနေနဲ့ မြန်မာ့ငလျင်ဘေးအတွက် တကယ့်စေတနာမှန်နဲ့ ကူညီချင်တယ်ဆိုရင် “တရုတ်တိုင်ပေက မြန်မာ့ငလျင်ဘေးအတွက် လူအင်အား ၁၂၀ စေလွှတ်ကူညီလိုပါသည်”ဆိုမှသာ မြန်မာနိုင်ငံက လက်သင့်ခံနိုင်ဖွယ်ရာ ရှိပါတယ်။

ဒီလိုမဟုတ်ဘဲ တရုတ်နိုင်ငံနဲ့ မြန်မာနိုင်ငံအကြား ရန်မီးပွားအောင် စေတနာဆိုးနဲ့ ထိုင်ဝမ်နိုင်ငံအမည်တပ်ပြီး ကူညီတာ၊ ဒီလိုမျိုး ထိုင်ဝမ်နိုင်ငံလို့ အမည်တပ်လာတာကို ကမ္ဘာသိဖို့ဟန်ပြ မြန်မာ့ငလျင်ကို အသုံးချမယ်ဆိုရင်တော့ မြန်မာနိုင်ငံကို ကမ္ဘာ့နိုင်ငံဆယ်ခုထက်မနည်းက တပ်ဖွဲ့ဝင်တွေ၊ စေတနာ့ဝန်ထမ်းတွေ စေလွှတ်နေကြပြီမို့လို့ ထိုင်ဝမ် (ဒါမှမဟုတ်) တရုတ်တိုင်ပေရဲ့ မြန်မာ့ငလျင်အခက် ထိုင်ဝမ်အချက်လုပ် အမြတ်ထုတ်မှုဟာ ဘယ်လိုမှ လက်ခံနိုင်ဖွယ်ရာ မရှိပါကြောင်း ပြောရမှာပါ။

ဒါ့အပြင် ဒီလို ငလျင်ဘေးဆိုးကို အစွမ်းကုန် ကယ်တင်နေရတဲ့ ကာလကြီးမှာတောင် မြန်မာနိုင်ငံကို အမေရိကန်သမ္မတထရမ့်ပ်ကပါ ကူညီမယ်ပြောတာ၊ တရုတ်သမ္မတနဲ့ အိန္ဒိယဝန်ကြီးချုပ်က ဖုန်းဆက်သွယ် သဝဏ်လွှာပို့ အင်တိုက်အားတိုက်ကူညီတာ၊ ရုရှားသမ္မတက သဝဏ်လွှာပို့ ကူညီပေးတာ၊ ဘင်္ဂလားဒေ့ရှ်၊ မလေးရှား၊ ဗီယက်နမ်၊ ထိုင်း၊ စင်ကာပူနဲ့ ကုလသမဂ္ဂ၊ EU စတာတွေနဲ့ တခြားနိုင်ငံတွေက ချက်ချင်း လာကူညီတာတောင် SAC အစိုးရကို မအောင်မြင်စေချင်လို့ ကမ္ဘာကအမြင်စောင်းအောင် အမုန်းမီးပွားအောင် လုပ်နေကြတာမျိုးဟာ စစ်ကိုင်း၊ မန္တလေး၊ နေပြည်တော်၊ ရမည်းသင်း၊ ပျော်ဘွယ် စတဲ့နေရာတွေက ငလျင်ဒဏ်ခံပြည်သူတွေပဲ ပို အခက်ကြုံစေမှာဖြစ်လို့ အစိုးရတစ်ရပ်အပေါ်မုန်းတီးမှုနဲ့ နိုင်ငံရေးထိုးနှက်မှုကို ဒီငလျင်ကာလတော့ ရပ်ထားပေးပါလို့ သတင်းမှားတွေနဲ့ ထိုးနှက်နေသူတွေကို ပြောပါရစေ။