၂၀. ၁. ၂၀၂၃
တင်ဆက်/တည်းဖြတ် ပန်းအိ၊ ဟေမာ
Netflix ကနေ ဖေဖော်ဝါရီလအတွက် ထွက်ရှိလာမဲ့ ကိုရီးယားစီးရီး Love to Hate you ဆိုတဲ့ ဇာတ်လမ်းတွဲမှာ မြန်မာပရိသတ်တွေက ‘ဦး’လို့ ချစ်စနိုးခေါ်ကြတဲ့ မင်းသား Yoo Teo နဲ့ Arthdal Chronicles ထဲက မင်းသမီး Kim Ok Vin တို့က အဓိက ဇာတ်ဆောင်တွေအနေနဲ့ ပါဝင်ထားကြပါတယ်။
အချစ်တိုက်ပွဲလို့လည်း ခေါ်ကြတဲ့ ဒီစီးရီးရဲ့ ဇာတ်ညွှန်းကို Choi Soo Young က ရေးသားပေးထားတာဖြစ်ပြီး ဒါရိုက်တာ Kim Jung Kwon က ရိုက်ကူးဖန်တီးပေးထားပါတယ်။
စိတ်ကူးယဉ် ရိုမန်တစ် ဟာသ ဇာတ်လမ်း အမျိုးအစားဖြစ်တဲ့ Love to Hate you ဇာတ်လမ်းတွဲမှာ စုစုပေါင်း အပိုင်း ၁၀ ပိုင်းပါဝင်သွားမှာဖြစ်ပြီး မင်းသမီး Kim Ok Vin ရဲ့ ဒုတိယမြောက် Netflix စီးရီးလည်း ဖြစ်ပါတယ်။
ဒီဇာတ်လမ်းထဲမှာ မင်းသား Yoo Teo က မိန်းကလေးတွေကို ယုံကြည်စိတ်ချမှုမရှိတဲ့ ထိပ်တန်း မင်းသားတစ်ဦးအနေနဲ့ မြင်တွေ့ရမှာဖြစ်ပြီး မင်းသမီး Kim Ok Vin ကိုတော့ ဖျော်ဖြေရေးလုပ်ငန်းတွေမှာ အဓိကလုပ်ကိုင်နေတဲ့ ဥပဒေအဖွဲ့က တက်သစ်စ ရှေ့နေတစ်ဦး အနေနဲ့ တွေ့မြင်ရမှာပါ။
အချစ်ရေးကိစ္စတွေကို စိတ်မဝင်စားဘဲ ယောက်ျားလေးတွေကို ပြိုင်ဘက်အနေနဲ့ သတ်မှတ်ထားပြီး ရှုံးနိမ့်ရမှာ မကြိုက်တဲ့ ရှေ့နေမလေးနဲ့ မိန်းကလေးတွေကို ယုံကြည်မှုမရှိသလို လတ်တလောမှာ ရေပန်းအစားဆုံး သရုပ်ဆောင် ဖြစ်နေတဲ့ မင်းသားတို့ရဲ့ အချစ်ဇာတ်လမ်းကို ပေါ့ပေါ့ပါးပါး ကြည့်ရှုနိုင်ဖို့အတွက် Netflix ကနေ ဖေဖော်ဝါရီ ၁၀ ရက်နေ့မှာ ထုတ်လွှင့်တော့မဲ့ Love to Hate you ဇာတ်လမ်းတွဲကို MT News ပရိသတ်တွေအတွက် တင်ဆက်ပေးလိုက်ပါတယ်။
