၂၈. ၃. ၂၀၂၅
Written by Thettant
ရန်ကုန်တိုင်းဒေသကြီး၊ စမ်းချောင်းမြို့နယ်၊ ရန်ကုန်-ပြည်လမ်း၊ မြေနီကုန်းခုံးကျော်တံတားအနီး၊ အထက (၂) စမ်းချောင်းရှေ့မှာ မနေ့ကည သန်းခေါင်ယံအချိန် အိမ်စီးယာဥ်တစ်စီး အရှိန်လွန် တိမ်းမှောက်မှု ဖြစ်ပွားခဲ့ရာမှာ ယာဥ်မောင်းလူငယ်သေဆုံးပြီး လိုက်ပါလာတဲ့ အမဖြစ်သူ စိုးရိမ်ဒဏ်ရာရခဲ့ပေမဲ့ ကလေးငယ်နှစ်ဦး မစိုးရိမ်ရဒဏ်ရာတွေသာ ရခဲ့တယ်လို့ သိရပါတယ်။
ဖြစ်စဥ်က မတ်လ ၂၇ ရက် ည ၁၀ နာရီ မိနစ် ၂၀ အချိန်ခန့်မှာ ရန်ကုန်တိုင်းဒေသကြီး၊ စမ်းချောင်းမြို့နယ်၊ မြေနီကုန်းမြောက်ရပ်ကွက်၊ ပြည်လမ်းမပေါ် မဟာမြိုင်ကားမှတ်တိုင်အနီး ခရစ်ယာန်ဘုရားကျောင်းရှေ့ ယာဉ်တိမ်းမှောက်မှုဖြစ်ပွားနေကြောင်း P2P ဆက်သွယ်ရေးကွန်ရက်က သတင်းရတာကြောင့် စမ်းချောင်းအရန်မီးသတ်က အရေးပေါ်လူနာတင်ယာဉ် ၂ စီးထွက်ခွာခဲ့ပြီး ဖြစ်စဉ်မှာ ယာဉ်ပေါ်ပါ ယာဉ်မောင်း အမျိုးသား ၁ ဦး (သေဆုံး) ကို စမ်းချောင်းအရန်မီးသတ်လူနာတင်ယာဉ်၊ အနီရောင်အဆင့် အမျိုးသမီးလူနာ ဦးခေါင်းထိခိုက်နဲ့ ကလေးငယ်၂ဦးပွန်းပဲ့ဒဏ်ရာအနည်းငယ်သာရရှိကို အကြင်နာကုသိုလ်ပြုရုံးခွဲ(စမ်းချောင်း) က လူနာတင်ယာဉ်နဲ့ ရန်ကုန်ဆေးရုံကြီးဆီ ပို့ဆောင်ကူညီပေးခဲ့တယ်လို့ စမ်းချောင်းက ရဲသူရိန်အရန်မီးသတ်တပ်ဖွဲ့ထံက သိရပါတယ်။
“အာတီဂါတစ်စီး အရှိန်လွန်ပြီး လမ်းလယ်နဲ့ လမ်းဘေးကို ဝင်တိုက်ပြီး မှောက်သွားတာပေါ့။ လိုက်ပါလာတာက လူငယ်အမျိုးသားနှစ်ယောက်၊ အမျိုးသမီးငယ်နှစ်ယောက်ပါ။ ဆုံးသွားတဲ့ ယာဥ်မောင်းလူငယ်က မောင်။ ဦးခေါင်း ပြင်းထန်ဒဏ်ရာရတာက အမ။ ကလေးနှစ်ယောက်မှာ တစ်ယောက်က သေဆုံးဒဏ်ရာရတဲ့မောင်နှမရဲ့ အငယ်ဆုံးမောင်နဲ့ ကလေးမလေးက ဒဏ်ရာပြင်းထန်တဲ့ အမရဲ့ သမီးပါ။ ကလေးနှစ်ယောက်က အသက်ဘေးက လွတ်ပါတယ်”လို့ ပါဝင်ကူညီခဲ့သူပရဟိတအဖွဲ့ဝင်တစ်ဦးက ကနဦးသူသိရတဲ့အခြေအနေအပေါ် MT News ကို ပြောပါတယ်။
ဒီဖြစ်ရပ်နဲ့ ပတ်သက်ပြီး မီးသတ်ဦးစီးဌာနကလည်း မနေ့ကည ၁၀ နာရီ မိနစ် ၂၀ ခန့်မှာ ရန်ကုန်တိုင်းဒေသကြီး၊ စမ်းချောင်းမြို့နယ်၊ မြေနီကုန်းမြောက်ရပ်ကွက်၊ ရန်ကုန်-ပြည်လမ်း၊ အထက(၂)ကျောင်းရှေ့ ဖြစ်ပွားတဲ့ ယာဉ်တိမ်းမှောက်မှုကို စမ်းချောင်းမြို့နယ်မီးသတ်စခန်းက 191 ယာဉ်(၁)စီး၊ သန္ဓေမီးသတ်တပ်ဖွဲ့ဝင်တွေနဲ့ ကယ်ဆယ်ရေးလုပ်ငန်း ဆောင်ရွက်ခဲ့ပြီး အဆိုပါယာဉ်တိမ်းမှောက်မှုကြောင့် ယာဉ်ပေါ်ပါ ကျား(၂)ဦး၊ မ(၂)ဦးစုစုပေါင်း (၄)ဦးအနက် ကျား (၁)ဦး ထိခိုက်ဒဏ်ရာ(မစိုးရိမ်ရ)၊ ကျား(၁)ဦး (သေဆုံး) နဲ့ မ(၁)ဦး ထိခိုက်ဒဏ်ရာ(မစိုးရိမ်ရ)၊ မ(၁)ဦး ထိခိုက်ဒဏ်ရာ(စိုးရိမ်ရ)တို့ကို ရဲသူရိန်စမ်းချောင်းအရန်မီးသတ်စခန်းက သူနာတင်ယာဉ်နဲ့ အင်းစိန်မြို့နယ်ပြည်သူ့ဆေးရုံကြီးဆီပို့ဆောင်ကူညီပေးခဲ့တယ်လို့ ထုတ်ပြန်ထားပါတယ်။
ဓာတ်ပုံ – ရဲသူရိန် ၊ YRO
