ဖိလစ်ပိုင်ပင်လယ်ပြင်မှာ ဖိလစ်ပိုင်အလံတင်တွန်းသင်္ဘောနဲ့ ပနားမားအလံတင်ကုန်သင်္ဘောတို့ ဒီနေ့မနက်ဝင်တိုက်မှုဖြစ်ပွားရာက သင်္ဘောကပ္ပတိန်တစ်ဦးအပါအဝင် နှစ်ဦးသေဆုံး

၂၅. ၃. ၂၀၂၅
Translated by Thettant

ဖိလစ်ပိုင်နိုင်ငံရဲ့ ပိုင်နက်ပင်လယ်ပြင်မှာ ဒီနေ့မနက်အရုဏ်တက်ချိန်က ဖိလစ်ပိုင်အလံတင်တွန်းသင်္ဘောနဲ့ ပနားမားအလံတင်ကာဂိုကုန်သင်္ဘောတို့ ဝင်တိုက်မှုဖြစ်ပွားရာက သင်္ဘောကပ္ပတိန်တစ်ဦးနဲ့ သင်္ဘောသားတစ်ဦးသေဆုံးခဲ့တယ်လို့ လစ်ပိုင်ကမ်းခြေစောင့်တပ်ရဲ့ ထုတ်ပြန်ချက်အရ သိရပါတယ်။

ဖိလစ်ပိုင်ကမ်းခြေစောင့်တပ် (PCG) ထုတ်ပြန်ချက်အရ ဒီနေ့ မတ်လ ၂၅ ရက်နေ့ မနက် ၄ နာရီ မိနစ် ၂၀ ခန့်မှာ ဆာရန်ဂါနီပြည်နယ်၊ မာအာဆင်မြို့အနီး ပင်လယ်ပြင်မှာ ဖိလစ်ပိုင်အလံလွှင့်ထူထားတဲ့ တွန်းသင်္ဘော M/TUG Sadong 33 နဲ့ ပနားမားအလံလွှင့်ထူထားတဲ့ MV Universe Kiza တို့ တိုက်မိခဲ့တာလို့ ထုတ်ပြန်ခဲ့ပြီး သတင်းရရှိတာနဲ့တစ်ပြိုင်နက် PCG ဟာ အရေးပေါ် ရှာဖွေကယ်ဆယ်ရေး (SAR) အဖွဲ့နဲ့ ရေပေါ်ရှာဖွေရေးယာဉ် ၃ စင်းကို ချက်ချင်းစေလွှတ်ပြီး ကယ်ဆယ်ရှာဖွေ ရေးလုပ်ငန်းတွေကို ဆောင်ရွက်ခဲ့တယ်လို့ သိရပါတယ်။

ဖြစ်စဉ်ကို အကြောင်းကြားခဲ့တဲ့ M/TUG Sadong 33 ကုမ္ပဏီစီမံကိန်းအင်ဂျင်နီယာ ပြောကြားချက်အရ M/TUG Sadong 33 ပေါ်မှာ သင်္ဘောသား ၈ ဦး လိုက်ပါလာခဲ့တာဖြစ်ပြီး ဒီမနက် ၈ နာရီအချိန်အထိ ကမ်းခြေစောင့်တပ်ရဲ့ ရှာဖွေကယ်ဆယ်ရေးအစီရင်စာအရ သင်္ဘောသား ၈ ဦးထဲက ၆ ဦးကို ကယ်ဆယ်နိုင်ခဲ့ပြီး အားလုံးက ကျန်းမာရေးကောင်းမွန်စွာ ရှိနေခဲ့တာပါ။

ဒါပေမဲ့ M/TUG Sadong 33 ရဲ့ ကပ္ပတိန်နဲ့ အခြားသင်္ဘောသားတစ်ဦး ပျောက်ဆုံးနေတာကြောင့် ဆက်လက်ရှာဖွေခဲ့ရာမှာတော့ အသက် ၅၀ အရွယ် M/TUG Sadong 33 ရဲ့ ကပ္ပတိန် Andres Diaz Jr နဲ့ အသက် ၃၁ နှစ်အရွယ် Jan Jeter Labor တို့ရဲ့ ရုပ်အလောင်းတွေကို တွေ့ရှိခဲ့တယ်လို့ မင်ဒါနာအိုတောင်ပိုင်းကမ်းခြေစောင့်တပ်ရဲ့ ပြည်သူ့ဆက်ဆံရေးအရာရှိ Gideon Dulnuan က အတည်ပြုပေးခဲ့ပါတယ်။

ဖြစ်စဉ်ဖြစ်ပွားမှု အသေးစိတ်အခြေအနေကို မသိရသေးဘဲ လက်ရှိမှာတော့ PCG ဟာ ကယ်ဆယ်ရေးလုပ်ငန်းတွေပြီးဆုံးအပြီး လိုအပ်တဲ့ ဥပဒေဆိုင်ရာလုပ်ငန်းဆောင်တာတွေ ဆက်လက်လုပ်ဆောင်နေသလို ရေနံဖိတ်စင်မှု အန္တရာယ်ရှိ မရှိ စစ်ဆေးနိုင်ဖို့ ဆီဖိတ်စင်မှု အကဲဖြတ်ချက်ကို ပြုလုပ်ခဲ့ရာမှာလည်း ဆီဖိတ်စင်မှု မရှိကြောင်း အတည်ပြုနိုင်ခဲ့တယ်လို့ သိရပါတယ်။

Rrf , PCG & Manilar Bulletin