မတရားဖမ်းဆီးထောင်ချခံ မြန်မာနိုင်ငံသား ဦးအောင်မြင့် သေဆုံးမှု တရားမျှတမှုရရှိရေးနှင့် မဏိပူရ်နှင့် အာသံပြည်နယ်များအတွင်း ဖမ်းဆီးထောင်ချခံ မြန်မာစစ်ဘေးဒုက္ခသည်များ အမြန်လွှတ်ပေးရန် အရပ်ဘက်အဖွဲ့အစည်း ၁၉၆ ဖွဲ့ကအိန္ဒိယနိုင်ငံဗဟိုအစိုးရထံ အိတ်ဖွင့်ပေးစာ ပေးပို့

၂၀ . ၃.၂၀၂၅
Written by Nay Moe

မတရားဖမ်းဆီးထောင်ချခံ မြန်မာနိုင်ငံသား ဦးအောင်မြင့် သေဆုံးမှု တရားမျှတမှုရရှိရေးနှင့် မဏိပူရ်နှင့် အာသံပြည်နယ်များအတွင်း ဖမ်းဆီးထောင်ချခံ မြန်မာစစ်ဘေးဒုက္ခသည်များ အမြန်လွှတ်ပေးရန် အရပ်ဘက်အဖွဲ့အစည်း ၁၉၆ ဖွဲ့ကအိန္ဒိယနိုင်ငံဗဟိုအစိုးရထံ ယနေ့ ပေးပို့သော အိတ်ဖွင့်ပေးစာတွင် ဖော်ပြထားသည်။

အိန္ဒိယဗဟိုအစိုးရအနေဖြင့် အသက်သေဆုံးခဲ့ရသည့် အကျဉ်းကျခံ မြန်မာပြည်သူများအတွက် တရားမျှတမှု ဆောင်ကျဉ်းပေးရန် လိုအပ်ပြီး အိန္ဒိယနိုင်ငံသို့ စစ်ဘေးတိမ်းရှောင် မြန်မာပြည်သူများအား ဖမ်းဆီးထောင်ချနေသည့် လုပ်ရပ်များအား အိန္ဒိယအစိုးရက အမြန်ဆုံး ရပ်တန့်ကာ စစ်ဘေးဒုက္ခသည်များအား လူဂုဏ်သိက္ခာနှင့်အညီ အသက်ရှင်သန်၊ နေထိုင်ခွင့်ပြုပါရန်နှင့် ဖမ်းဆီး ထောင်ချထားသူများအား အမြန်ဆုံး
လွှတ်ပေးရန် တောင်းဆိုသည်ဟုလည်း အိတ်ဖွင့်ပေးစာက ဖော်ပြသည်။

ထို့ဖြစ်ရပ်တွင် ထောင်အာဏာပိုင်များ၏ လူသားချင်းစာနာမှုကင်းမဲ့မှုကြောင့် ဦးအောင်မြင့် အသက်ဆုံးရှုံးခဲ့ရသည့်အပြင် ရုပ်အလောင်းအား ခက်ခက်ခဲခဲ ပြန်လည်ရယူခဲ့ရကြောင်း၊ မြန်မာနိုင်ငံသားတစ်ဦးဖြစ်သော စစ်ကိုင်းဒေသခံ ဦးအောင်မြင့် (အသက် ၅၇ နှစ်) သည် အဆုတ်တွင် ရေဝင်သော ရောဂါခံစားနေရသဖြင့် ၂၀၂၁ ခုနှစ်၊ နိုဝင်ဘာလမှစတင်၍ အိန္ဒိယနိုင်ငံသို့ ဆေးကုသမှု ခံယူရန် ဝင်ရောက်ခဲဲ့ကြောင်း၊ ထို့နောက် အဆုတ်တွင်းရေကို နှစ်စဉ် စုပ်ထုတ်ကာ တတိယအကြိမ် ဆေးကုသမှုခံယူပြီး ဆေးရုံမှ အိမ်သို့အပြန်လမ်း ၂ဝ၂၄ ခုနှစ်၊ ဇန်နဝါရီလ ၂၉ ရက်နေ့တွင် ဖမ်းဆီးခံရကာ အဆုတ်မှရေများ စုပ်ထုတ်ထားသည့် ဒဏ်ရာဖြင့် အင်းဖားလ် ထောင်သို့ပို့ဆောင်ခံရပြီးနောက် Foreigners Act ဖြင့် တရားစွဲဆိုခံခဲ့ရကြောင်း၊ ထောင်တွင်း၌ ဦးအောင်မြင့်သည် ၎င်း၏ ကျန်းမာရေး အခြေအနေကို ထောင်အာဏာပိုင်များထံ အကြိမ်ကြိမ် တင်ပြထားသော်လည်း ရှေ့နေငှားရမ်းခွင့်မရ၊ ဆေးကုသခွင့်မပေးဘဲ အကိုက်အခဲ ပျောက်ဆေးသာ ပေးခြင်းခံခဲ့ရသောကြောင့် ဦးအောင်မြင့်၏ ကျန်းမာရေးသည် နေ့စဉ် ဆိုးရွားလာပြီး မခံစားနိုင်သည့် အခြေအနေသို့ ရောက်ချိန်တွင် ထောင်အာဏာပိုင်များက အပြင်ဆေးရုံသို့ ပို့ဆောင်ကာ ဆေးကုသခွင့် ပြုခဲ့သော်လည်း ဆရာဝန်များက အသက်ရှင်နိုင်ရန် မဖြစ်နိုင်တော့ကြောင်း အသိပေးလာချိန်တွင် ထောင်အာဏာပိုင်များက ဦးအောင်မြင့်အား လွှတ်ပေးခဲ့ပြီး တာဝန်မယူဘဲ ရှောင်ရှားခဲ့သည်။ ထို့နောက် ရက်ပိုင်းအတွင်း ၂၀၂၅ ခုနှစ်၊ မတ်လ (၁၀) ရက်နေ့၊ နံနက် ၆ နာရီခန့်တွင် ဦးအောင်မြင့် မှာ မိသားစုများနှင့် လုံးဝပြန်တွေ့ခွင့်မရရှိဘဲ ဆေးရုံတွင် သေဆုံးခဲ့သည်။ သေဆုံးပြီးနောက် ဦးအောင်မြင့်၏ အလောင်းအား မိသားစုဝင်များကိုယ်တိုင် လာယူခွင့်ပင်မရဘဲ အိန္ဒိယနိုင်ငံသား တစ်ဦး၏ အကူအညီဖြင့် ခက်ခဲစွာ ပြန်လည်ရယူခဲ့ရသည်။

ထို့အတူ မဏိပူရပြည်နယ်နှင့် အာသံပြည်နယ်များတွင် မြန်မာစစ်ဘေးဒုက္ခသည် ကလေးငယ် (၅၂) ဦးအပါအဝင် ဒုက္ခသည် (၁၄၇) ဦး အကျဉ်းချခံထားရပြီး ဦးအောင်မြင့်၏ သေဆုံးမှုသည် မဏိပူရပြည်နယ်အတွင်း ဖမ်းဆီးထောင်ချခံ မြန်မာနိုင်ငံသား ဒုတိယမြောက် သေဆုံးမှုဖြစ်ကာ ကမ္ဘာ့အကြီးဆုံး ဒီမိုကရေစီနိုင်ငံဖြစ်သော အိန္ဒိယနိုင်ငံ၏ ပုံရိပ်ကို ထိခိုက်စေသည်။ ထို့အပြင် ဦးအောင်မြင့်နှင့်အတူ ဖမ်းဆီးထောင်ချခံသူများတွင် သက်ကြီးပိုင်း နာတာရှည်ရောဂါသည်များ ၁၂ ဦး ပါဝင်နေသည်။ လက်ရှိတွင် မြန်မာစစ်ဘေး ဒုက္ခသည် အနည်းဆုံး ၁၄၇ ဦး ထောင်တွင်း၌ ရှိနေပြီး ၎င်းတို့ထဲတွင် ကိုယ်ဝန်ဆောင်အမျိုးသမီးများ၊ ထောင်တွင်း၌ မွေးဖွားခဲ့သော ကလေးငယ်များ၊ ကျောင်းနေအရွယ် လူငယ်များစွာနှင့် အမျိုးသမီးများနှင့် ကလေးငယ်များ အနည်းဆုံး ၅၂ ဦး ပါဝင်နေသည်။

ဤသို့သော လုပ်ရပ်များသည် အိန္ဒိယနိုင်ငံ၏ ဒီမိုကရေစီစံနှုန်းများနှင့် မကိုက်ညီဘဲ လူ့အခွင့်အရေးကို အကြီးအကျယ် ထိပါးနေသည့် လုပ်ရပ်များဖြစ်သည်။

ထို့ကြောင့် အိန္ဒိယနိုင်ငံဗဟိုအစိုးရအား မဏိပူရ်ပြည်နယ်ထောင်တွင် သေဆုံးခဲ့သော ဦးအောင်မြင့်နှင့် မိသားစုများ တရားမျှတမှုရရှိရန်၊ ၂ဝ၂၃ ခုနှစ်၊ ဖေဖော်ဝါရီလ ၂၆ ရက်နေ့တွင် သေဆုံးခဲ့သော Mr. Demkholun Guite (အသက် ၃၂ နှစ်) နှင့် မိသားစုများ တရားမျှတမှုရရှိရန်၊ မဏိပူရ်နှင့် အာသံပြည်နယ်တို့တွင် ဖမ်းဆီးထောင်ချခံ မြန်မာ စစ်ဘေးဒုက္ခသည်များ အားလုံး အမြန်ဆုံး လွှတ်ပေးရန် အလေးအနက် တောင်းဆိုအပ်ပါကြောင်းနှင့် အိန္ဒိယနိုင်ငံသည် ကမ္ဘာ့အကြီးဆုံး ဒီမိုကရေစီနိုင်ငံဖြစ်သည့်အတွက် အိမ်နီးချင်းမြန်မာနိုင်ငံ၏ ပြည်တွင်း နိုင်ငံရေးအခြေအနေများကို အသေးစိတ် သိရှိနေသည်ဟု မိမိတို့ အပြည့်အဝ ယုံကြည်ပါကြောင်း၊ ထို့ကြောင့် အိန္ဒိယနိုင်ငံမှ စစ်ဘေးဒုက္ခသည်များအား ဖမ်းဆီးထောင်ချခြင်း၊ ထောင်တွင်း၌ သေဆုံးစေခြင်း၊ ကိုယ်ဝန်ဆောင်အမျိုးသမီးများအား ထောင်ထဲတွင် မီးဖွားစေခြင်း၊ ပညာသင်ယူသူ လူငယ်များအား ထိန်းသိမ်းခြင်းများသည် အိန္ဒိယနိုင်ငံ၏ ရေရှည်နိုင်ငံရေး အကျိုးစီးပွား အတွက် အကျိုးမရှိသည့်အပြင် လူ့အခွင့်အရေးကို ထိပါးသည့် လုပ်ရပ်များဖြစ်သောကြောင့် အိန္ဒိယနိုင်ငံအနေဖြင့် ဒီမိုကရေစီစံနှုန်းများကို အလေးထားပြီး အိန္ဒိယ-မြန်မာနိုင်ငံနှစ်နိုင်ငံ ပြည်သူများ အကြားရေရှည်ဆက်ဆံရေးကို အလေးထားကာ မြန်မာနိုင်ငံသားများအား အမြန်ဆုံးလွှတ်ပေးရန် အလေးအနက် တောင်းဆိုအပ်ပါကြောင်း အိတ်ဖွင့်ပေးစာတွင် ဖော်ပြထားသည်။