၂၀.၃.၂၀၂၅.
Translated by Htwe Ko Tun
အိန္ဒိယနိုင်ငံရဲ့ စုံစမ်းစစ်ဆေးရေးဦးစီးဌာန (ED-Enforcement Directorate) က နိုင်ငံခြားငွေလဲလှယ်ရေး စီမံကွပ်ကဲမှုအက်ဥပဒေပါ ညွှန်ကြားချက်တွေကို ချိုးဖောက်ခဲ့တယ်လို့ စွပ်စွဲမှုနဲ့ ဘီလျံနာသူဌေးကြီး ဂျော့ဂျ်ဆိုးရော့စ် တည်ထောင်ထားတဲ့ Open Society Foundation ရုံးတွေကို မတ်လ ၁၈ ရက်မှာ ဝင်ရောက်ရှာဖွေစစ်ဆေးမှုတွေလုပ်ခဲ့တယ်လို့ သိရပါတယ်။
စုံစမ်းစစ်ဆေးခဲ့မှုတွေအရ ဖောင်ဒေးရှင်းက အစိုးရမဟုတ်တဲ့ အဖွဲ့အစည်းတွေကို ထောက်ပံ့ဖို့အတွက် ဥပဒေစည်းကမ်းချက်တွေကို ရှောင်ကွင်းပြီး သံသယဖြစ်ဖွယ်အစီအစဉ်တွေနဲ့ အိန္ဒိယကုမ္ပဏီတွေဆီ ငွေတွေပို့ပေးခဲ့တာ ဖော်ထုတ်နိုင်ခဲ့ပါတယ်။ ဒါဟာ သမ္မတ ဒေါ်နယ်ထရန့်ကို ဆိုးရော့စ်ကဆန့်ကျင်ခဲ့ပြီးနောက်မှာ အမေရိကန်မှာ သူရင်ဆိုင်ခဲ့ရတဲ့ အငြင်းပွားဖွယ်အခြေအနေတွေနဲ့လည်း တူညီနေတယ်လို့ ဆိုရမှာပါ။
အာဏာရ BJP နိုင်ငံရေးပါတီကနေ အိန္ဒိယနိုင်ငံရဲ့ အကျိုးစီးပွားကို တိုက်ခိုက်နေတယ်လို့ စွပ်စွဲခံထားရတဲ့ အမေရိကန် ဘီလျံနာငွေကြေးကစားသူနဲ့ အကာအကွယ် ရန်ပုံငွေ အော်ပရေတာ ဆိုးရော့စ်ရဲ့ ဖောင်ဒေးရှင်းရုံးတွေကို စုံစမ်းစစ်ဆေးရေးဦးစီးဌာနက ကျယ်ပြန့်တဲ့ရှာဖွေမှုတွေလည်း လုပ်ခဲ့တယ်လို့ သိရပါတယ်။
စုံစမ်းစစ်ဆေးမှုရလဒ်တွေအရ ဆိုးရော့စ်ဖောင်ဒေးရှင်းဟာ နိုင်ငံခြားငွေလဲလှယ်ရေး စီမံကွပ်ကဲမှု အက်ဥပဒေပါ ညွှန်ကြား ချက်တွေကို ချိုးဖောက်ခဲ့တာတွေ့ရတဲ့အတွက် ဘန်ဂလိုမြို့မှာဆိုရင် ဖောင်ဒေးရှင်းရုံးတွေနဲ့ ဆက်စပ်အဖွဲ့အစည်းတွေကိုပါ ဝင်ရောက်စီးနင်းရှာဖွေတာခံခဲ့ရတယ်လို့ သတင်းတွေက ဆိုပါတယ်။
စုံစမ်းစစ်ဆေးရေးဦးစီးဌာနရဲ့ ခုလိုရှာဖွေမှုတွေက အမေရိကန်မှာ ဆိုးရော့စ် အိမ်ပြန်ရောက်ချိန်နဲ့ သွားရောက်တိုက်ဆိုင်နေတယ်လို့ ဆိုကြပါတယ်။
သတင်းအရင်းအမြစ်တွေအရ ဆိုးရော့စ်စီးပွားရေးဖွံ့ဖြိုးမှုဘဏ်လို့ခေါ်တဲ့ ဆိုးရော့စ်ဖောင်ဒေးရှင်း ရန်ပုံငွေကနေ အိန္ဒိယကုမ္ပဏီကြီးသုံးခုဖြစ်တဲ့ Rootbridge Services Pvt Ltd(RSPL), Rootbridge Academy Pvt Ltd(RSAR) နဲ့ ASAR Social Impact Advisors Pvt Ltd(ASAR) တို့ကို ငွေထောက်ပံ့ခဲ့တာကို စုံစမ်းမှုတွေမှာတွေ့ခဲ့တယ်လို့ ဆိုပါတယ်။ ဒီကုမ္ပဏီကြီးသုံးခုက ၂၀၂၀-၂၀၂၁ မှ ၂၀၂၃-၂၀၂၄ အတွင်း အိန္ဒိယရူပီးငွေ ၂၅ ကုဋေခန့် ဆိုးရော့စ် ဖောင်ဒေးရှင်းက လက်ခံရရှိခဲ့ကြတာကိုလည်း စုံစမ်းစစ်ဆေးမှုတွေအရ တွေ့ခဲ့ကြပါတယ်။
ဂျော့ဂျ်ဆိုးရော့စ်ဖောင်ဒေးရှင်းအနေနဲ့ ပြည်ထဲရေးဝန်ကြီးဌာနရဲ့အတည်ပြုချက်မပါဘဲ အိန္ဒိယနိုင်ငံအတွင်း အစိုးရမဟုတ်တဲ့ အဖွဲ့အစည်းတွေကို ပြည်ပမှလှူဒါန်းမှုအနေနဲ့ တိုက်ရိုက်မပြုလုပ်နိုင်တာကြောင့် ဒီစည်းမျဉ်းတွေကို ရှောင်ကွင်းဖို့ ခုလိုဆောင်ရွက်ခဲ့တာလို့ ဆိုရမှာပါ။
ဂျော့ဂျ်ဆိုးရော့စ်ကတော့ အမေရိကန်မှာလည်း သဘောထားတင်းမာတဲ့ လစ်ဘရယ်ဝါဒီတွေနဲ့တောင် သဘောကိုက်ညီမှုရှိပြီး သမ္မတထရန့် ကိုတော့ ပွင့်ပွင့်လင်းလင်း ဆန့်ကျင်လာသူတစ်ဦးဖြစ်ပါတယ်။
Ref- Timed of India
