၅.၃.၂၀၂၅
Written By Thandar
ဟာသ၊ သရဲ ဇာတ်လမ်းပုံစံ “ညောင်ပင်တစ္ဆေ” ဇာတ်ကားကြီး စတင်ရိုက်ကူးမယ့်အကြောင်း ဇာတ်ကားကန်တော့ပွဲပေး အခမ်းအနားကို ယနေ့ မတ်လ ၅ ရက် နံနက် ၉ နာရီက ရန်ကုန်မြို့၊ သင်္ဃန်းကျွန်းမြို့နယ်ရှိ ကျိုက္ကစံစေတီတော်မှာ ကျင်းပခဲ့ပါတယ်။
“ညောင်ပင်တစ္ဆေက ပထမ ဇာတ်လမ်းတွဲရိုက်ဖို့။ နောက်တော့ ရုပ်ရှင်ပဲ ဖန်တီးတော့မယ်ဆိုပြီး ဇာတ်ကို ပြန်ချုံ့ပြီးရိုက်မှာပေါ့။ ဇာတ်လေးကို နည်းနည်းလေးပဲ ပြင်ထားတာပါ။ ဇာတ်ကားကောင်းရင် ငါ့ဇာတ်ပေါ့။ ဇာတ်ကား မကောင်းရင်တော့ ခင်လှိုင်ဖျက်တာပေါ့။ အဓိက ကာရိုက်တာအနေနဲ့ ဇာတ်ကားထဲမှာပါတဲ့ ကောင်မလေးက ခဝါသည် အဝတ်လျှော်ရတဲ့ ထုံထုံအအကောင်မလေးပေါ့။ အဲဒီမှာ နော်ဖောကို ပြေးမြင်တာပေါ့။ သူ့ပုံစံ မျက်နှာထားက ညှိုးငယ်တဲ့ပုံစံလေးပေါက်ပြီး ဇာတ်နဲ့လည်းလိုက်တော့ သူ့ကိုရွေးလိုက်တာပါ။ မာန်ဟိန်းဆိုရင်လည်း သူမလုပ်ဖူးတဲ့ စိတ်ကောင်းရှိတဲ့ကာရိုက်တာနဲ့မြင်ရမှာပါ”လို့ ဒါရိုက်တာ မောင်သီက ပြောပါတယ်။
အဆိုပါ ဇာတ်ကား ကန်တော့ပွဲပေးအခမ်းအနားကိုတော့ ဇာတ်ကားမှာ ပါဝင်ကြမယ့် သရုပ်ဆောင် ခင်လှိုင်၊ ဒါရိုက်တာ မောင်သီ၊ မာန်ဟိန်း၊ မှူးသခင်နဲ့အတူ ဟာသအနုပညာရှင်များစွာ တက်ရောက်ခဲ့ပါတယ်။
ဒီဇာတ်ကားကိုတော့ ဇာတ်လမ်း မောင်ငယ်ရင်သွေး၊ ဇာတ်ညွှန်းကို ချစ်ချောနဲ့ 7 Day တို့က ရေးသားပြီးတော့ DOP ကိုတိုး၊ လက်ထောက်ဒါရိုက်တာ သဲစု၊ ဒါရိုက်တာ ခင်လှိုင် (ဉာဏ်ကြီးရှင်) က ဟာသ သရဲကားပုံစံ ရိုက်ကူးပုံဖော်မှာဖြစ်ပါတယ်။
သရုပ် ဆောင်တွေအနေနဲ့ မာန်ဟိန်း၊ နော်ဖောအယ်ထား၊ ခင်လှိုင်၊ တက္ကသိုလ်ဂွမ်းပုံ၊ ဥဩသံသာ၊ မှူးသခင်ကို၊ ဇော်ဝင်းနိုင်(မန်း)၊ ဆင်မ၊ သွက်လက်၊ စူပါလင်း၊ စိစိ၊ မေတ္တာမြင့်မြတ်ဟိန်း စတဲ့ သရုပ်ဆောင် များစွာက ပါဝင်သရုပ်ဆောင်ကြမှာဖြစ်ပါတယ်။
