၅.၃.၂၀၂၅
Written By Thandar
Golden Heart Film Production က ဟာသဇာတ်လမ်းပုံစံ “ကပ်ပူးလေး” ရုပ်ရှင်ဇာတ်ကားကြီး ကန်တော့ပွဲပေးအခမ်းအနားကို ယနေ့ မတ်လ ၅ ရက် နံနက်ပိုင်းက ရန်ကုန်မြို့၊ သင်္ဃန်းကျွန်းမြို့နယ်ရှိ ကျိုက္ကဆံဘုရားမှာ ကျင်းပခဲ့ပါတယ်။
“ကျွန်တော့်အနေနဲ့ ဒီဇာတ်ကားကို ပျော်ရွှင်ရယ်မောစရာ ဟာသပုံစံလေး ရိုက်ကူးမှာပါ။ ဟာသကိုမှ ကျွန်တော် မရိုက်ဖူးသေးတဲ့ပုံစံလေးမို့ ရိုက်ဖြစ်တာပါ။ ကိုနေဝင်းကတော့ တိုက်မှာလည်း စာချုပ်ရှိတယ်လေ။ ပိုးမမှီသာနဲ့က ကျွန်တော့်နဲ့ ပထမဦးဆုံးရိုက်ဖူးတာပါ။ ဒီကားက ဟာသကားဆိုပေမယ့် ပြောင်ပျက်သွားတဲ့ ဟာသကားမဟုတ်ဘူး။ အတည်ကိုမှ Plot လေးနဲ့ ရယ်စရာလေးဖန်တီးမှာပါ။ အမှန်ကတော့ ဇာတ်ရဲ့ပုံစံ သက်တော်စောင့်ကိုမှ ဒီနာမည်လေးပေးဖြစ်တာပါ”လို့ ဒါရိုက်တာ စိုးမိုးမင်းက ပြောပါတယ်။
ဒီဇာတ်ကားကိုတော့ ဇာတ်လမ်း၊ ဇာတ်ညွှန်းကို မင်းကိုစိုး(နတ်သံကွင်း) က ရေးသားပြီး DOP မင်းမင်းကျော်၊ ဒါရိုက်တာ စိုးမိုးမင်းက မတ်လပိုင်းအတွင်းမှာ ရန်ကုန်မြို့မှာ ပျော်ရွှင်ရယ်မောရမယ့် ဟာသဇာတ်လမ်းပုံစံ အရောလေး ရိုက်ကူးပုံဖော်သွားမယ်လို သိရပါတယ်။
သရုပ်ဆောင်တွေအနေနဲ့ နေဝင်း၊ ဟိန်းသီဟ၊ ပိုးမမှီသာ၊ ခြူးစစ်ဟန်၊ ဥဩသံသာ၊ ခင်လှိုင်၊ ဇော်ဝင်းနိုင် (မန်း)၊ သွက်လက်၊ မင်းသူ၊ မောင်ကင်း၊ မျိုးသူ စတဲ့သူတွေ ပါဝင်ထားကြပါတယ်။
