ပုံစာ။ ယနေ့လှုပ်ခတ်သော ငလျင်ကြောင့် မအူပင်မြို့ပေါ်မှ သာသနိကအဆောက်အအုံများ ထိခိုက်ပျက်စီးမှုများမြင်ကွင်း (Photo - စိမ်းမြကန်သာဂေါပကအဖွဲ့၊ ဒေါက်တာအရှင်ခေမိန္ဒ)
ဟုမ္မလင်းတွင် ပြင်းအား ၅ ဒသမ ၅ အဆင့်ရှိ ငလျင်တစ်ခု လှုပ်ခတ်သွား၍ ယနေ့ တစ်နေ့တာမကုန်ဆုံးခင် ငလျင် ၅ ကြိမ်လှုပ်ခတ်ထား
၅. ၃. ၂၀၂၅
Written by Thattant
ဒီနေ့မနက်မှာဖြစ်ပွားခဲ့ ငလျင် လေးကြိမ်ဆက်လှုပ်ခတ်မှုကြောင့် မအူပင်မြို့ကျက်သရေဆောင် စိမ်းမြကန်သာသတ္တဌာနဘုရားဝင်းတစ်ခုလုံး ပျက်စီးမှုများပြားခဲ့တဲ့အပြင် မအူပင်မြို့မှာ တိုက်တာနေအိမ်ပျက်စီးမှုများစွာ ဖြစ်ပေါ်ခဲ့တယ်လို့ သိရပါတယ်။
ဒီနေ့ ၂၀၂၅ ခုနှစ်၊ မတ်လ ၅ ရက်နေ့၊ မြန်မာစံတော်ချိန် ၄ နာရီ ၃၆ မိနစ် ၄၇ စက္ကန့် အချိန်မှာ ကမ္ဘာအေးမြေငလျင်စခန်းကနေ အနောက်- အနောက်မြောက်ဘက် (၃၃) မိုင်ခန့်ကွာဝေးတဲ့ မြန်မာနိုင်ငံပြည်တွင်း (ညောင်တုန်းမြို့၏ အရှေ့တောင်ဘက် (၆) မိုင်ခန့်အကွာ) မြောက်လတ္တီတွဒ် ၁၆ ဒသမ ၉၆ ဒီဂရီ၊ အရှေ့လောင်ဂျီတွဒ် ၉၅ ဒသမ ၆၆ ဒီဂရီ၊ အနက် ၁၀ ကီလိုမီတာ (၆ ဒသမ ၂၁၄ မိုင်) ကို ဗဟိုပြုလို့ အင်အားရစ်ချ်တာစကေး ၅ ဒသမ ၁ အဆင့်ရှိ မြေငလျင်တစ်ခု လှုပ်ရှားသွားခဲ့တာပါ။
ဒါ့အပြင် နောက်ဆက်တွဲငလျင်သုံးခုပါလာခဲ့ပြီး မနက် ၄ နာရီ ၅၄ မိနစ် ၉ စက္ကန့်မှာ ညောင်တုန်းမြို့ရဲ့ အရှေ့တောင်ဘက် ၁၀ မိုင်ခန့်အကွာကို ဗဟိုပြုပြီး အနက် ၁၈ ကီလိုမီတာ (၁၁ ဒသမ ၁၈၅ မိုင်) က လှုပ်ခတ်ခဲ့သလို စတုတ္ထအကြိမ် မနက် ၅ နာရီ ၂၀ မိနစ် ၄၈ မှာလည်း ညောင်တုန်းမြို့ အနောက်တောင်ဘက် ၂၃ မိုင်ခန့်အကွာကို ဗဟိုပြုပြီး အနက် ၁၀ ကီလိုမီတာကနေ ပြင်းအား ၃ ဒသမ ၅ ရှိတဲ့ ငလျင်ငယ်နဲ့ မနက် ၅ နာရီ ၂၃ မိနစ် ၅၅ စက္ကန့်မှာ ညောင်တုန်းမြို့အရှေ့ဘက် ၂၅ မိုင်ခန့်အကွာကို ဗဟိုပြုပြီး အနက် ၁၀ ကီလိုမီတာကနေ ပြင်းအား ၃ ဒသမ ၁ ရှိတဲ့ ငလျင်ငယ် လှုပ်ခတ်ခဲ့ပါတယ်။
ဒီလို လှုပ်ခတ်သွားတဲ့ငလျင်ဒဏ်ကြောင့် မအူပင်မြို့ကျက်သရေဆောင်စိမ်းမြကန်သာ သတ္တဌာနဘုရား မဟာဗောဓိလိုဏ်အတွင်း မှန်တံခါးမကြီးကွဲကျခြင်း၊ အက်ကြောင်းများဖြစ်ပေါ်ခြင်း၊ စေတီမကြီး ပတ်လည်အောက်ခြေ အက်ကြောင်းများဖြစ်ပေါ်ခြင်း၊ အရှေ့ဘက်မုခ်ဦးစေတီ ၃ ဆူ အောက်ခြေအက်ကြောင်းဖြစ်ပေါ်ခြင်း၊ ၁၀၈ တောင်ဘုရား အရှေ့တောင်ခြမ်းပြိုကျခြင်း၊ အမတော်မမြစိမ်းနန်း အုတ်နံရံပြိုကျခြင်း၊ ဂိုဒေါင် နံရံများပွင့်ထွက်ခြင်း စတဲ့ ပျက်စီးမှုတွေကို စစ်ဆေးတွေ့ရှိရတယ်လို့ စိမ်းမြကန်သာဂေါပကအဖွဲ့ထံက သိရပါတယ်။
ဒီလို ထိခိုက်ပျက်စီးမှုတွေအပြင် မအူပင်၊ ဇောတိကာရုံကျောင်း ဘုရားဆောင် အမောက်ကွန်ကရစ်ပြားက စွန်းလွန်းရိပ်သာ လှေကားဆောင်အမိုးပေါ် ပြုတ်ကျတာကြောင့် စွန်းလွန်းရိပ်သာရဲ့ အရှေ့နေကာ အမိုးတစ်ဝက် ပြိုကျသွားခဲ့တယ်လို့လည်း ဆရာတော်ဒေါက်တာအရှင်ခေမိန္ဒက ဆိုပါတယ်။
ဒါ့အပြင် ပြည်ထောင်စု သာမဏေကျော်စာသင်တိုက်မှာ ကျောင်းဆောင်ဟောင်း ပြိုကျပျက်စီးမှုနဲ့ မအူပင်မြို့ပေါ် လူနေအိမ်တချို့ ပျက်စီးခဲ့မှုတွေလည်း ဖြစ်ပွားခဲ့တယ်လို့ သိရပါတယ်။
ဒီနေ့မနက်က တစ်နာရီအတွင်း လေးကြိမ်လှုပ်ခတ်မှုအပြင် ဒီနေ့လယ် မြန်မာစံတော်ချိန် ၁၂ နာရီ၊ ၀၆ မိနစ်၊ ၃၅ စက္ကန့်အချိန်မှာ တမူးမြေငလျင်စခန်းက အရှေ့မြောက်ဘက် ၃၅ မိုင်ခန့်ကွာဝေးတဲ့ မြန်မာနိုင်ငံ ပြည်တွင်း ဟုမ္မလင်းမြို့ရဲ့ အနောက်တောင်ဘက် ၂၃ မိုင်ခန့်အကွာ)၊ မြောက်လတ္တီတွဒ် ၂၄ ဒသမ ၆၂ ဒီဂရီ၊ အရှေ့လောင်ဂျီတွဒ် ၉၄ ဒသမ ၆၇ ဒီဂရီ၊ အနက် ၆၄ ကီလိုမီတာ (၃၉ ဒသမ ၇၆၈ မိုင်) ကို ဗဟိုပြုပြီး အင်အား ရစ်ချ်တာစကေး ၅ ဒသမ ၅ အဆင့်ရှိ အင်အားအသင့်အတင့်ရှိ မြေငလျင်တစ်ခု လှုပ်ရှားသွားမှုလည်း ဖြစ်ပေါ်ခဲ့တာကြောင့် တစ်နေ့တာအတွင်းမှာ ပြင်းအားများတဲ့ငလျင် ငါးကြိမ်အထိ လှုပ်ခတ်ခဲ့ပြီး ဟုမ္မလင်းငလျင်ကတော့ မြေအောက်အနက်မိုင် များပြားတဲ့အတွက် ပျက်စီးထိခိုက်မှု နည်းခဲ့ပါတယ်။
ပုံစာ။ ယနေ့လှုပ်ခတ်သော ငလျင်ကြောင့် မအူပင်မြို့ပေါ်မှ သာသနိကအဆောက်အအုံများ ထိခိုက်ပျက်စီးမှုများမြင်ကွင်း (Photo – စိမ်းမြကန်သာဂေါပကအဖွဲ့၊ ဒေါက်တာအရှင်ခေမိန္ဒ)
