၅ .၃. ၂၀၂၅
Written by Hey Mar
အခုနှစ် မတ်လပထမ ၁၀ ရက်အတွင်း မကွေးတိုင်း၊ နေပြည်တော်၊ ပဲခူးတိုင်း၊ ဧရာဝတီတိုင်း၊ ရန်ကုန်တိုင်း၊ ကရင် ပြည်နယ်၊ မွန်ပြည်နယ်နဲ့ တနင်္သာရီတိုင်းတို့မှာ နေ့အပူချိန်တွေ ၄၀ ဒီဂရီ စင်တီဂရိတ်အထက်အထိ မြင့်တက်လာနိုင်ကြောင်း METEOBLUE ကြိုတင်ခန့်မှန်း Model တွေက အချက်အလက်တွေကို ကိုးကားပြီး မိုးလေဝသနဲ့ ရာသီဥတုပြောင်းလဲမှုဖြစ်စဉ်တွေကို စောင့်ကြည့်လေ့လာသူ ဦးဝင်းနိုင်က အသိပေးပါတယ်။
အခုနှစ်နွေရာသီမှာ ၂၀၂၄ ခုနှစ်ကထက် ၂၀၂၅ ခုနှစ် မတ်လနဲ့ ဧပြီလ ဖြစ်မြဲအပူချိန်ခန့်မှန်းချက်က လျော့နည်းမယ်လို့ သိရပြီး မနှစ်က နွေရာသီလောက် အပူချိန်မပြင်းထန်နိုင်ဘူးလို့ ဆိုပါတယ်။ မနှစ်က ၂၀၂၄ ခုနှစ်ဟာ အယ်နီညို သက်ရောက်မှုရှိတဲ့ ရာသီဥတုဖြစ်စဉ်တွေ ဖြစ်ပွားခဲ့တာကြောင့် အစွန်းရောက် ရာသီဥတုဖြစ်စဉ်တချို့ ကြုံတွေ့ခဲ့ရပြီး အခု ၂၀၂၅ ခုနှစ်မှာတော့ လာနီညာဖြစ်စဉ် သက်ရောက်မှု ရှိနေတဲ့ ရာသီဉတုဖြစ်စဉ်တွေဖြစ်ပေါ်နေသလို ပစိဖိတ်သမုဒ္ဒရာရေပြင်မှာ အရှေ့ဘက်ကရေအေးတွေက အနောက်ဘက်အထိ ရောက်လာ လွှမ်းမိုးသွားပါက လာနီညာနှစ်လို့ သတ်မှတ်တာကြောင့် ဒီနှစ်မှာ မနှစ်ကထက် အပူချိန်လျော့ကျနိုင်တာလို့ သိရပါတယ်။
မိုးလေဝသနဲ့ ရာသီဥတုပြောင်းလဲမှုဖြစ်စဉ်တွေကို စောင့်ကြည့်လေ့လာသူဦးဝင်းနိုင်က “အပူချိန်လျော့မယ်။ မိုးရာသီမှာ မုန်တိုင်းအန္တရာယ် သတိပြုရမယ်။ အအေးပိုမယ်။ လာနီညာနှစ်မှာ အအေးလှိုင်းဖြတ်တတ်တယ်။ အခုနှစ် နွေရာသီခန့်မှန်းချက်က အပူချိန်လျော့မယ်။ အပူလှိုင်းဆိုတာဖြတ်တဲ့အထိတော့ လာနီညာနှစ်မှာ မဖြစ်နိုင်ပါဘူး။ Heat wave လို့ခေါ်တဲ့ အပူလှိုင်းဆိုတာ နှစ်စဉ်ဖြစ်မြဲအပူချိန်တွေထက် ၅ ဒီဂရီ စင်တီဂရိတ်အထိ လွန်ကဲစွာပူပြင်းခြင်း ၅ ရက် ဆက်တိုက် တိုင်းတာရရှိရင် အပူလှိုင်းဖြတ်တယ်လို့ခေါ်ပါတယ်။ မြန်မာနိုင်ငံရဲ့ ၂၀၂၅ ခုနှစ်နွေရာသီမှာ ဖြစ်လာနိုင်မဲ့ အပူချိန်က နှစ်စဉ်ဖြစ်မြဲအပူချိန်အထက် ၁ ဒီဂရီ စင်တီဂရိတ်မှ ၁ ဒသမ ၅ ဒီဂရီ စင်တီဂရိတ်အထိသာ ပိုမိုပူပြင်းတာရှိမယ်လို့ ကြိုတင်ခန့်မှန်းချက်တွေမှာ တွေ့ရပါတယ်။၂၀၂၄ ခုနှစ်မှာရော၊ ၂၀၂၅ ခုနှစ်မှာပါ ဖြစ်မြဲထက် – 5 °C (9 °F)အထိ မပိုခဲ့တာကြောင့် ပြီးခဲ့တဲ့နှစ်မှာလည်း အပူလှိုင်းဖြတ်သန်းတယ်ဆိုတာမရှိခဲ့ပါဘူး” လို့ MT News ကို ပြောပါတယ်။
လာနီညာကြောင့် အပူချိန်မြင့်တက်မှုတွေက၂၀၂၄ ခုနှစ်(အယ်လိနီညိုနှစ်)ထက် လျော့နည်းပေမယ့် မတ်လအတွင်း စိုထိုင်းဆမြင့်တက်နေတဲ့ ဒေသတွေမှာ ခံစားရတဲ့ အပူချိန် (Temperature Felt) ၄၀ ဒီဂရီ စင်တီဂရိတ် အထက်အထိတော့ မြင့်တက်နေနိုင်တယ်လို့လည်း သိရပါတယ်။
