၅. ၃. ၂၀၂၅
Written by Thettant
ဒီနေ့မနက်မှာ တစ်နာရီအတွင်း ငလျင်လေးကြိမ်လှုပ်ခတ်မှုအပါအဝင် ဇောက်တိမ်ပြီး ပြင်းအားများတဲ့ ငလျင်ငါးခု ဒီနှစ်ရက်အတွင်း ရန်ကုန်မြို့အနီး လှုပ်ခတ်ခဲ့ရာမှာ သုံးကြိမ်မှာ ငလျင်လှုပ်ခတ်မှုဒဏ်တွေကို ရန်ကုန်ပြည်သူတွေ သိသိသာသာ ခံစားခဲ့ကြရတယ်လို့ သိရပါတယ်။
ပထမအကြိမ် ငလျင်လှုပ်ခတ်မှုက မတ်လ ၃ ရက် မြန်မာစံတော်ချိန် နံနက် ၁၀ နာရီ ၃ မိနစ်၊ ၁၃ စက္ကန့်အချိန်မှာ ကမ္ဘာအေးမြေငလျင်စခန်းကနေ မြောက်-အနောက်မြောက်ဘက် (၂၇)မိုင်ခန့် ကွာဝေးတဲ့ မြန်မာနိုင်ငံပြည်တွင်း (တိုက်ကြီးမြို့၏ အရှေ့တောင်ဘက် (၇) မိုင်ခန့်အကွာ)၊ မြောက်လတ္တီတွဒ် ၁၇ ဒသမ ၂၅ ဒီဂရီ၊ အရှေ့လောင်ဂျီတွဒ် ၉၆ ဒသမ ၀၆ ဒီဂရီ၊ အနက် ၁၀ ကီလိုမီတာ (၆ ဒသမ ၂၁၄ မိုင်) ကို ဗဟိုပြုပြီး အင်အားရစ်ချ်တာ စကေး ၄ ဒသမ ၅ အဆင့်ရှိ မြေငလျင်တစ်ခု လှုပ်ရှားသွားခဲ့တာပါ။
ဒုတိယငလျင်လှုပ်ခတ်မှုက ပထမအကြိမ်ထက် ပြင်းထန်ခဲ့ပြီး ဒီနေ့ ၂၀၂၅ ခုနှစ်၊ မတ်လ ၅ ရက်နေ့၊ မြန်မာစံတော်ချိန် ၄ နာရီ ၃၆ မိနစ် ၄၇ စက္ကန့် အချိန်မှာ ကမ္ဘာအေးမြေငလျင်စခန်းကနေ အနောက်- အနောက်မြောက်ဘက် (၃၃) မိုင်ခန့်ကွာဝေးတဲ့ မြန်မာနိုင်ငံပြည်တွင်း (ညောင်တုန်းမြို၏ အရှေ့တောင်ဘက် (၆) မိုင်ခန့်အကွာ) မြောက်လတ္တီတွဒ် ၁၆ ဒသမ ၉၆ ဒီဂရီ၊ အရှေ့လောင်ဂျီတွဒ် ၉၅ ဒသမ ၆၆ ဒီဂရီ၊ အနက် ၁၀ ကီလိုမီတာ(၆ ဒသမ ၂၁၄ မိုင်) ကို ဗဟိုပြုလို့ အင်အားရစ်ချ်တာစကေး ၅ ဒသမ ၁ အဆင့်ရှိ မြေငလျင်တစ်ခု လှုပ်ရှားသွားခဲ့တာလို့ မိုးလေဝသနှင့် ဇလဗေဒညွှန်ကြားမှုဦးစီးဌာနက ထုတ်ပြန်ခဲ့တာပါ။
“ဒီမနက် ငလျင် ပထမဆုံးအကြိမ်က အိမ်တွေပါ သွက်သွက်ခါအောင်လှုပ်တာ။ အိပ်ပျော်နေတဲ့အချိန်ဆိုတော့ တစ်ခုခုကိုင် လှုပ်ရမ်းသလိုကို ခံစားလိုက်ရလို့ လန့်နိုးလာမှ ငလျင်လှုပ်တာ သိတာ။ နောက်ဆက်တွဲငလျင်တွေလည်း ပထမအကြိမ်လောက်မဟုတ်ပေမဲ့ သိသိသာသာလှုပ်တယ်။ အဲဒါကြောင့် ဆက်မအိပ်ရဲတော့ဘဲ အပြင်ထွက်နေရတာ”လို့ ညောင်တုန်းမြို့ခံတစ်ဦးဖြစ်တဲ့ ကိုထက်က ဒီမနက် ငလျင်လေးခါဆက်တိုက်လှုပ်တဲ့အချိန် သူသိရှိခံစားရမှုပြောပြပါတယ်။
ဒုတိယအကြိမ် ငလျင်လှုပ်ခတ်မှုမှာ နောက်ဆက်တွဲငလျင်သုံးခုပါလာခဲ့ပြီး မနက် ၄ နာရီ ၅၄ မိနစ် ၉ စက္ကန့်မှာ ညောင်တုန်းမြို့ရဲ့ အရှေ့တောင်ဘက် ၁၀ မိုင်ခန့်အကွာကို ဗဟိုပြုပြီး အနက် ၁၈ ကီလိုမီတာ( ၁၁ ဒသမ ၁၈၅ မိုင်) က လှုပ်ခတ်ခဲ့သလို စတုတ္ထအကြိမ် မနက် ၅ နာရီ ၂၀ မိနစ် ၄၈ မှာလည်း ညောင်တုန်းမြို့အနောက်တောင်ဘက် ၂၃ မိုင်ခန့်အကွာကို ဗဟိုပြုပြီး အနက် ၁၀ ကီလိုမီတာကနေ ပြင်းအား ၃ ဒသမ ၅ ရှိတဲ့ ငလျင်ငယ်နဲ့ မနက် ၅ နာရီ ၂၃ မိနစ် ၅၅ စက္ကန့်မှာ ညောင်တုန်းမြို့အရှေ့ဘက် ၂၅ မိုင်ခန့်အကွာကို ဗဟိုပြုပြီး အနက် ၁၀ ကီလိုမီတာကနေ ပြင်းအား ၃ ဒသမ ၁ ရှိတဲ့ ငလျင်ငယ် လှုပ်ခတ်သွားတာဖြစ်ပြီး ဒီလိုဆက်တိုက်လှုပ်ခတ်မှုကြောင့် မိုးလေဝသနှင့် ဇလဗေဒညွှန်ကြားမှုဦးစီးဌာနက ငလျင်သတိပေးချက်ပါ ထုတ်ပြန်ခဲ့ရပါတယ်။
ဒီ ငလျင် လှုပ်ခတ်ခဲ့မှုငါးကြိမ်မှာ ပြင်းအားများတဲ့ သုံးကြိမ်ကို ညောင်တုန်း၊ တိုက်ကြီး၊ ထိန်းတပင်၊ သန်လျင်၊ ရန်ကင်း၊ မြောက်ဒဂုံ၊ လသာ၊ မြောက်ဥက္ကလာ၊ တာမွေ၊ ဗိုလ်တထောင်၊ အင်းစိန်၊ လှိုင်သာယာ၊ ဗဟန်း၊ သာကေတ၊ တောင်ဒဂုံ၊ သင်္ဃန်းကျွန်း၊ ကျောက်တံတား၊ တွံတေး၊ ရေကြည်၊ ဖျာပုံ အစရှိတဲ့မြို့နယ်တွေနဲ့ အခြားမြို့များစွာအပြင် ပဲခူးတိုင်းမြို့တွေပါ သိသိသာသာခံစားခဲ့ရပါတယ်။ ဒါ့အပြင် နေအိမ်တချို့ ပြိုကျပျက်စီးမှု အသေးစားဖြစ်စဥ်တွေလည်းရှိခဲ့ပြီး ကြီးမားတဲ့ထိခိုက်မှုဖြစ်စဥ်ကို MT News က ဆက်လက်စုံစမ်းနေပါတယ်။
