
၅.၃.၂၀၂၅
Written By Thandar
ဆွတ်ပျံ့ကြည်နူးဖွယ် အချစ်ဇာတ်လမ်းပုံစံ “ကံ့ကော်နီ” ရုပ်ရှင်ဇာတ်ကားကြီး Premiere Show ပွဲအခမ်းအနားကို မတ်လ ၄ ရက် ညနေ ၆ နာရီက ရန်ကုန်မြို့ သမ္မတအဆင့်မြင့်ရုပ်ရှင်ရုံမှာ ကျင်းပခဲ့ပါတယ်။



“ကျွန်တော့်အနေနဲ့ လွန်ခဲ့တဲ့ ၇ နှစ်လောက်က ရိုက်ထားတဲ့ကား အနုပညာရှင်ကိုယ့်ပရိသတ်တွေနဲ့ အတူတူကြည့်ရတာ ပျော်မိပါတယ်။ အောင်မြင်ပြီးသားဝတ္ထုကို ပုံဖော်ခဲ့ရတာမို့ Pressure လည်း များခဲ့ပါတယ်။ ဝတ္ထုရဲ့ မူရင်းရသမပျက်အောင် ရုပ်ရှင်ကြည့်ပရိသတ်တွေလည်း ရုပ်ရှင်ကားကောင်းတစ်ကားဖြစ်အောင် ဖန်တီးရပါတယ်။ တကယ်တော့ ဒီဇာတ်ကားက ဆွတ်ပျံ့ဖွယ်အချစ်ဇာတ်လမ်းတစ်ပုဒ်မို့ အရမ်းလည်းကြည်နူးရပါတယ်။ သရုပ်ဆောင်တွေလည်း ငယ်ရွယ်စဉ်ကာလလေးတစ်ခုကို မြင်တွေ့ရမှာပါ” လို့ အကယ်ဒမီဒါရိုက်တာ ဝိုင်းကပြောပါတယ်။
ခရေဖြူရုပ်ရှင်ထုတ်လုပ်ရေးက ၀တ္ထု မင်းလူ၊ ဇာတ်ညွှန်း လွင်မင်းအံ့က ရေးသားပြီးတော့ ဒါရိုက်တာ ဝိုင်း(Own Creator)က ၂၀၁၈ ခုနှစ်က ပဲခူးတိုင်း ဘီးလင်းမြို့နယ်ဘက်မှာ ရိုက်ကူးပုံဖော်ခဲ့တာလည်း ဖြစ်ပါတယ်။



သရုပ်ဆောင်တွေအနေနဲ့ အလင်းရောင်၊ ချမ်းမင်းရဲထွဋ်၊ အကယ်ဒမီဖွေးဖွေး၊ ရွှေသမီးတို့က အဓိကပါဝင်ထားကြပြီ တခြားအနုပညာရှင်များစွာကလည်း ပါဝင်သရုပ်ဆောင်ထားကြပါတယ်။
“တကယ်တော့ ကိုယ်တွေ ၄ ယောက်က အတွဲအစပ်အသစ်လေးပါ။ မြင်နေကြသူတွေလည်း မဟုတ်ဘူးပေါ့။ လွန်ခဲ့တဲ့ ၇ နှစ်လောက်က ရိုက်ကူးခဲ့တဲ့ကားကို ပြန်ကြည့်ရတော့ ပိုပြီး ရင်ခုန်စိတ်လှုပ်ရှားတယ်။ အိုက်တင်တွေ မျက်နှာအမူအယာတွေကလည်း လုံးဝမတူတော့ဘူးလေ။ ချစ်စရာကောင်းတဲ့ ဇာတ်ကားလေးပါ”လို့ သရုပ်ဆောင် ရွှေသမီးက ပြောပါတယ်။
“ကံကော်နီ” ရုပ်ရှင်ဇာတ်ကားကြီးကိုလာမယ့် မတ်လ ၁၄ ရက်နေ့မှာ စတင်ပြီး တစ်ပြည်လုံးမှာ ရုံတင်ပြသမှာဖြစ်ပါတယ်။